លោក បែរ មករា អគ្គលេខាធិការក្លិបបាល់ទាត់បឹងកេត បានបង្ហោះសានៅលើកហ្វេសបុកផ្ទាល់ខ្លួនរបស់លោកនៅថ្ងៃនេះ អំពីដំណឹងរបស់ខ្សែរប្រយុទ្ធ សៀង ចន្ធា ដែលបានចេញទៅប្រកបអាជីពនៅក្រៅប្រទេស កាលពីពេលថ្មីៗនេះ។
លោក បែរ មករា បានសរសេររៀបរាប់ថា៖ «ជាច្រើនរដូវកាលចុងក្រោយនេះ សៀង ចន្ធា ជាកីឡាករសំខាន់បំផុតម្នាក់ក្នុងជម្រើស ១១នាក់ដំបូងរបស់បឹងកេតនៅក្នុងការប្រកួតប្រជែងពានរង្វាន់នានា ទាំង Cambodian Premier League និងពានរង្វាន់សម្ដេចអគ្គមហាសេនាបតីតេជោហ៊ុនសែន។ ក្នុងបាល់ទាត់ ដេីម្បីឈ្នះការប្រកួត យេីងត្រូវទាត់ឱ្យចូលទីគេ ហើយដើម្បីទាត់ចូលទីគេបាន យើងត្រូវការខ្សែប្រយុទ្ធល្អ។ ចន្ធា គឺជាម្នាក់ក្នុងចំណោមនោះ។ ប៉ុន្តែបឹងកេតមិនគិតប្រយោជន៍របស់ខ្លួនធំជាងប្រយោជន៍ជាតិនិងកីឡាករនោះទេ»។
លោកបាន រៀបរាប់បន្តថា៖ «តាំងពីដើមមក នៅពេលមានឱកាសល្អសម្រាប់កីឡាករមកដល់ បឹងកេតមិនដែលរារាំងឡើយ ផ្ទុយទៅវិញបឹងកេតមានតែលើកទឹកចិត្តថែម ជំរុញថែមឱ្យកីឡាកររបស់ខ្លួនបានចេញទៅប្រកបអាជីពនៅក្រៅប្រទេស ទៅដល់លីគដែលល្បីជាង ខ្លាំងជាង ដើម្បីលើកស្ទួយមុខមាត់បាល់ទាត់កម្ពុជា ជ្រោងទង់ជាតិកម្ពុជាឱ្យបក់រវិចនៅលើឆាកអន្តរជាតិ ដើម្បីឱ្យអន្តរជាតិស្គាល់អំពីសក្ដានុពលកម្ពុជាកាន់តែច្រើនឡើង»។
លោកបានបន្ថែមថា៖ «ជាមួយគ្នានេះ បឹងកេតចង់ឱ្យកីឡាករបាល់ទាត់កម្ពុជាឡើងកម្រិតស្តង់ដាកាន់តែខ្ពស់ ក្លាយជាតួអង្គគំរូសម្រាប់យុវជនជំនាន់ក្រោយឱ្យមានក្ដីសុបិនធំនិងក្លាហាន ហ៊ានស្រមៃ និងអាចបោះជំហានវែងបានដល់ទីកាន់តែខ្ពស់នៅលីគក្រៅប្រទេសបានកាន់តែច្រើន។ កន្លងទៅ បឹងកេតបានធ្វើវាជាមួយកីឡាករ ចាន់ វឌ្ឍនាកា ក្លាយជាកីឡាករកម្ពុជាដំបូងគេដែលលេងនៅជប៉ុន»។
អគ្គលេខាធិការរូបនេះក៏បានបន្ថែមទតៀតថា៖«ឥឡូវនេះយើងធ្វើវាម្ដងទៀតជាមួយ សៀង ចន្ធា ឱ្យក្លាយជាកីឡាករកម្ពុជាដំបូងបង្អស់ដែលបានទៅលេងនៅលីគក្នុងប្រទេសកាតារ ខណៈនៅរង់ចាំការធ្វើតេស្តសុខភាពមួយដំណាក់កាលទៀត។ នៅពេលតេស្តសុខភាពជោគជ័យ នៅទីនោះ ចន្ធា នឹងបានហាត់ជាមួយកីឡាករល្អៗ គ្រូបង្វឹកពូកែៗ លេងទល់នឹងក្រុមខ្លាំងៗ សម្រាប់ជាជំហានក្នុងការអភិវឌ្ឍខ្លួនបន្ថែមទៀតដែលអាចឱ្យគេឡើងកម្រិតទៅលេងនៅលីគកាន់តែខ្ពស់និងកាន់តែធំ»។
ជាចុងក្រោយលោកបានលើកឡើងថា ប្រសិនអ្វីៗជោគជ័យ ខ្ញុំសង្ឃឹមថាយុវជនទាំងឡាយដែលកំពុងហាត់បាល់ទាត់នឹងកាន់តែមានភាពក្លាហានក្នុងការស្រមៃឱ្យធំ សំដៅឱ្យខ្ពស់ ដែលជាកម្លាំងចិត្តនៅក្នុងការប្រឹងប្រែងរបស់ពួកគេ និងមានកីឡាករខ្មែរគំរូល្អកម្រិតខ្ពស់សម្រាប់ពួកគេខិតខំតាម។ សូមជូនពរឱ្យ ចន្ធា ទទួលបានជោគជ័យនៅក្នុងបេសកកម្មថ្មីនិងធំមួយនេះ។
គួរបញ្ជាក់ថា កាលពីល្ងាចថ្ងៃទី១៩ កក្កដា អ្នកស្រី ពុធ ធីតា ប្រធានក្លិបបាល់ទាត់បឹងកេត ប្រាប់ពីពុំមានវត្តមានរបស់ខ្សែប្រយុទ្ធសៀង ចន្ធា ចូលរួមជាមួយក្រុមក្នុងដំណើរប្រកួត Pre-season នៅថៃ ព្រោះត្រូវត្រៀមចេញទៅលេងនៅលីគកាតារក្រោមកិច្ចសន្យាខ្ចីពីបឹងកេត។ ខណ: សៀង ចន្ធា នឹង ចេញដំណើរនៅថ្ងៃទី២២ កក្កដាដើម្បីឱ្យទាន់ដំណើរ Pre-season របស់ក្លិបថ្មីនៅកាតារដែលត្រូវចេញទៅ Pre-Season នៅអឺរ៉ុប៕