សិល្បៈអន្តរជាតិ៖ ប្រទេសវៀតណាមបានដាក់បម្រាមមិនឱ្យបញ្ចាំងភាពយន្ត Barbie ដែលមានបង្ហាញរូបភាពផែនទីដែលអះអាងជាម្ចាស់សិទ្ធិជាឯកតោភាគីរបស់ចិននៅលើសមុទ្រចិនភាគខាងត្បូង។
ភាពយន្ត «Barbie» ដែលរងនូវការហាមឃាត់នេះបរិយាយពីតុក្កតាដ៏ល្បី ហើយកំពុងតែមានការពេញនិយមខ្លាំងណាស់និងមានការជជែកយ៉ាងច្រើននៅលើបណ្ដាញសង្គម បន្ទាប់ពីដាក់បញ្ចាំងនៅតាមរោងភាពយន្តនានាកន្លងចាប់តាំងពីថ្ងៃទី២១ ខែកក្កដា កន្លងមក។
ថ្វីត្បិតមិនមានការបញ្ជាក់ថាតើឈុតឆាកណាមួយឱ្យពិតប្រាកដប៉ុន្តែមន្ត្រីជាន់ខ្ពស់របស់វៀតណាមបានហៅរូបភាពនោះថាជារូបភាពមិនល្អដែលស្ដែងពីបន្ទាត់ក្រហម៩របស់ចិន។ ខ្សែបន្ទាត់ទាំង៩ឆ្នូតរបស់ចិននេះគឺប្រើប្រាស់នៅលើផែនទីឯកតោភាគីដែលចិនគូសលើផែនទីសមុទ្រចិនភាគខាងត្បូងដើម្បីកំណត់ភាពជាម្ចាស់កម្មសិទ្ធិ។
ទីក្រុងប៉េកាំងបានកសាងបន្ទាយទាហាននៅលើកោះសិប្បនិម្មិតក្នុងតំបន់បរិវេណនោះជាច្រើនមកហើយ ហើយថែមទាំងធ្វើការល្បាតដោយនាវានៅទីនោះដើម្បីអាងសិទ្ធិជាម្ចាស់របស់ខ្លួននៅទីនោះផងដែរ។
កាលពីឆ្នាំ២០១៦ តុលាការអន្តរជាតិនៅទីក្រុងឡាអេបានចេញច្បាប់ប្រឆាំងនឹងការអះអាងសិទ្ធិរបស់ចិនចំពោះសមុទ្រចិនខាងកើតនេះ ប៉ុន្តែភាគីទីក្រុងប៉េកាំងមិនព្រមទទួលស្គាល់សេចក្ដីសម្រេចរបស់តុលាការនេះឡើយ។ មែនទែនទៅភាពយន្ត «Barbie» របស់ផលិតកម្ម Warner Bros មិនមែនជាផលិតកម្មដំបូងនោះឡើយដែលត្រូវបានដាក់បម្រាមមិនឱ្យបញ្ចាំងដោយសារតែបញ្ហាចម្រូងចម្រាស់ចំពោះបន្ទាត់ក្រហម៩ឆ្នូតរបស់ចិននេះ ព្រោះកាលពីឆ្នាំ២០១៩ ភាពយន្តតុក្កតា Animation របស់ DreamWorks ក៏ជួបនិងទទួលរងវិបត្តិដូចគ្នានេះដែរ ។ ដោយឡែកកាលពី២ឆ្នាំមុនភាពយន្តស៊ើបអង្កេតបែបភ្នាក់ងារសម្ងាត់របស់អូស្ត្រាលីរឿង Pine Gap ក៏ត្រូវបានបញ្ជាឱ្យដកចេញពីទីផ្សារភាពយន្តលើ App Netflix ដែរ ដោយសារតែមានការរិះគន់មកមន្ត្រីរដ្ឋាភិបាល។
បញ្ហាចម្រូងចម្រាសដ៏ក្ដៅគគុករឿងដែនសមុទ្រចិនភាគខាងត្បូងនេះមានប្រទេសចំនួន ៦ពាក់ព័ន្ធគ្នារួមមាន ចិន វៀតណាម ហ្វីលីពីន កោះតៃវ៉ាន់ ម៉ាឡេស៊ី និងប្រ៊ុយណេ ដោយប្រទេសនីមួយអះអាងរៀងខ្លួនថាជាម្ចាស់កម្មសិទ្ធិនៅក្នុងដែនទឹកនៃសមុទ្រចិនភាគខាងត្បូងនេះ៕
ប្រភព៖ BBC