វគ្គជម្រុះពានរង្វាន់ជើងឯកពិភពលោក 2026 FIFA World Cup ដែលមានអាមេរិក ម៉ិចស៊ីកូ និងកាណាដា ជាសហម្ចាស់ផ្ទះ បានចាប់ឆ្នោតបែងចែកគូ និងពូលរួចរាល់ហើយ នៅក្នុងទ្វីបអាស៊ី សម្រាប់ជុំទី១ និងជុំទី២ ដើម្បីស្វែងរកក្រុមខ្លាំងបន្តឡើងទៅជុំទី៣ ទី៤ និងទី៥ មុនកក់សំបុត្រយន្តហោះទៅជុំផ្ដាច់ព្រ័ត្រ។
សហព័ន្ធកីឡាបាល់ទាត់អាស៊ី (AFC) បានកំណត់ឱ្យប្រទេសជាសមាជិកទាំង៤៦ របស់ខ្លួនប្រកួត៥ជុំ ពីថ្ងៃទី១២ តុលា ២០២៣ ដល់ ខែវិច្ឆិកា ឆ្នាំ២០២៥ ដើម្បីរកក្រុមខ្លាំងចំនួន៨ក្រុមកន្លះតំណាងទ្វីបធ្វើដំណើរទៅប្រកួត 2026 FIFA World Cup។
អត្ថបទពាក់ព័ន្ធ៖World Cup ឆ្នាំ២០២៦ នឹងកើនក្រុមចូលរួមពី៣២ ក្រុមទៅ ៤៨ក្រុម! ចុះទ្វីបអាស៊ីមានប៉ុន្មានកៅអី?
ក្នុងដែលមានតារាងចំណាត់ថ្នាក់ FIFA ទាបជាងគេចំនួន២០ ត្រូវចាប់គូគ្នាប្រកួតនៅជុំទី១ មុនគេដែលធ្វើឡើង២ជើងមានលក្ខណៈប្តូរទឹកដីទៅវិញទៅមក (Home/Away) ដើម្បីស្វែងរកអ្នកឈ្នះទៅចូលរួមតាមពូល ក្នុងជុំទី២ ដែលចាប់ឆ្នោតរួចរាល់ជាសម្រាប់។
ដោយឡែកក្រុមដែលឈរលេខ១និងលេខ២តាមពូលនីមួយៗនៅជុំទី២ នឹងបន្តទៅប្រកួតជុំទី៣ ដោយក្រុមទាំង១៨នេះ ត្រូវបែងចែកជា៣ពូលទៀត ដើម្បីប្រកួតសន្សំពិន្ទុយកក្រុមលេខ១និងលេខ២ ទទួលសិទ្ធិស្វ័យប្រវត្តិទៅប្រកួត 2026 FIFA World Cup ខណៈក្រុមលេខ៣និងលេខ៤ ត្រូវបន្តទៅប្រកួតជុំទី៤។
ជុំទី៤ នេះយកក្រុមលេខ៣និងលេខ៤ទាំង៣ពូលមាន៦ក្រុម ចាប់ឆ្នោតបែងចែកជា២ពូល ប្រកួតគ្នា ស្វែងករកអ្នកឈរលេខ១តាមពូល បន្តបានសំបុត្រទៅ 2026 FIFA World Cup ជាមួយក្រុមទាំង៦មុន ក្នុងជុំទី៣។ ចំណែកក្រុមលេខ២ក្នុងពូលទាំង២ ត្រូវបន្តសិទ្ធិទៅប្រកួតជុំទី៥។
ព័ត៌មានពី FIFA World Cup សូមចុចអានទីនេះ…
ជុំទី៥នេះយកក្រុមលេខ២ ទាំង២ពូលនៅជុំទី៤ ប្រកួតគ្នាចំនួន២ជើង (Home/Away) រកអ្នកឈ្នះតំណាងឱ្យទ្វីបអាស៊ី ទៅប្រកួតជាមួយក្រុមណាមួយមកពីទ្វីបផ្សេង រកអ្នកឈ្នះបន្តឱកាសទៅ 2026 FIFA World Cup៕
