មន្ត្រីឆ្លើយតបគ្រោះមហន្តរាយបាននិយាយថា យ៉ាងហោចណាស់កម្មករ ១៧នាក់ត្រូវបានសង្កត់ស្លាប់នៅភាគខាងលិចប្រទេសឥណ្ឌា នាថ្ងៃទី១ ខែសីហានេះ នៅពេលដែលដងស្ទូចបានធ្លាក់ពីលើផ្លូវល្បឿនលឿនដែលកំពុងសាងសង់នៅខាងក្រៅរដ្ឋធានីបុមបៃ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី១ ខែសីហា ឆ្នាំ២០២៣។
មន្រ្តីឆ្លើយតបគ្រោះមហន្តរាយជាតិ (NRDF) របស់ប្រទេសឥណ្ឌា បាននិយាយថា ដងស្ទូចបានក្រឡាប់ទៅលើផ្ទាំងបេតុងធំៗនៅពេលយប់ ហើយសង្កត់លើកម្មករធ្វើការនៅលើផ្លូវ Samruddhi Expressway ក្នុងរដ្ឋ Maharashtra។
NRDF បាននិយាយថា សាកសពចំនួន ១៧នាក់ត្រូវបានរកឃើញ ហើយអ្នករបួស ៣នាក់ត្រូវបានគេបញ្ជូនទៅព្យាបាលនៅមន្ទីរពេទ្យ។
ទន្ទឹមនោះនាយករដ្ឋមន្ត្រីឥណ្ឌា លោក Narendra Modi ដែលគ្រោងនឹងសម្ពោធគម្រោងហេដ្ឋារចនាសម្ព័ន្ធនៅទីក្រុង Maharashtra នៅថ្ងៃអង្គារ បាននិយាយថា លោក «ឈឺចាប់ ដោយសារការស្លាប់របស់កម្មករ ហើយលោកបានបញ្ជាឲ្យផ្តល់សំណងដល់គ្រួសារកម្មករដែលស្លាប់ និងរបួស»។
ផ្លូវល្បឿនលឿន Samruddhi ដែលតភ្ជាប់ទីក្រុងបុមបៃ ជាមួយទីក្រុង Nagpur គឺជាផ្នែកមួយនៃការជំរុញហេដ្ឋារចនាសម្ព័ន្ធផ្លូវដ៏ធំទូលាយមួយនៅក្នុងបណ្តាប្រទេសដែលមានសេដ្ឋកិច្ចរីកលូតលាស់លឿនបំផុតរបស់ពិភពលោក។
សូមជម្រាបថា គ្រោះថ្នាក់លើការដ្ឋានសំណង់ហេដ្ឋារចនាសម្ព័ន្ធធំៗ គឺកើតមានជាទូទៅក្នុងប្រទេសឥណ្ឌា។ ក្នុងឆ្នាំ២០១៦ ការដួលរលំនៃស្ពានអាកាសនៅលើផ្លូវដ៏មមាញឹកក្នុងទីក្រុង Kolkata បានសម្លាប់មនុស្សយ៉ាងហោចណាស់ ២៦នាក់ ហើយកាលពីខែតុលាឆ្នាំមុន មនុស្ស ១៣០នាក់បានស្លាប់នៅក្នុងរដ្ឋ Gujarat នៅពេលដែលស្ពានមួយបានដួលរលំភ្លាមៗ បន្ទាប់ពីវាកំពុងជួសជុល៕