ក្រុមបាល់ទាត់ជម្រើសជាតិកម្ពុជា ណាត់ក្រុមជម្រើសជាតិហុងកុង ប្រកួតមិត្តភាពអន្តរជាតិ នៅខែកញ្ញា ឆ្នាំ២០២៣ ដែលអាចប្រព្រឹត្តិទៅចន្លោះពីថ្ងៃទី៤ ដល់ទី១២ ខែកញ្ញា ដែលជាពេលវេលាថ្ងៃសម្រាប់ការប្រកួតអន្តរជាតិរបស់សហព័ន្ធកីឡាបាល់ទាត់អន្តរជាតិ (FIFA Day) ដើម្បីត្រៀមខ្លួនសម្រាប់ការប្រកួតអន្តរជាតិនានា នៅពេលខាងមុខ។
ការប្រកួតមិត្តភាពកម្តៅសាច់ដុំអន្តរជាតិជាមួយក្រុមជម្រើសជាតិហុងកុងនេះ គឺដើម្បីពង្រឹងសមត្ថភាពក្រុម ក្នុងការត្រៀមខ្លួនសម្រាប់ការប្រកួតជម្រុះជើងឯកពិភពលោក World Cup ឆ្នាំ២០២៦ ដែលត្រូវជួបជាមួយប៉ាគីស្ថាន ជើងទី១ នៅថ្ងៃទី១២ ខែតុលា នៅទឹកដីកម្ពុជា និងជើងទី២ នៅថ្ងៃទី១៧ ខែតុលា ឆ្នាំ២០២៣៕
