ក្រុមជម្រើសជាតិនារីជប៉ុន និងអូស្ត្រាលី គឺជាក្រុមតែ ២មកពីតំបន់អាស៊ីដែលបានឡើងមកកាន់វគ្គ ១៦ក្រុមចុងក្រោយ នៃព្រឹត្តិការណ៍បាល់ទាត់ពិភពលោក FIFA Women’s World Cup ឆ្នាំ២០២៣។ ខណ: ក្រុមក្រុមជម្រើសជាតិនារីចិន និងកូរ៉េខាងត្បូង បានធ្លាក់ចេញត្រឹមវគ្គជម្រុះក្នុងពូល។
ដោយឡែក ២ក្រុមមកពីតំបន់អាស៊ាន មានក្រុមជម្រើសជាតិហ្វីលីពីន និងវៀតណាម បានធ្លាក់ចេញពីការប្រកួតជម្រុះក្នុងពូល FIFA Women World Cup 2023។ ហ្វីលីពីន ធ្លាក់ចេញក្រោយបរាជ័យក្រោមថ្វីជើងន័រវេស ក្នុងលទ្ធផល ៦-០ ដោយឈរលេខរៀងទី៤ ឆ្លងកាត់៣ប្រកួត ឈ្នះ១ និងចាញ់២ មាន៣ពិន្ទុ។ ដោយវៀតណាម ចាញ់ក្រុមជម្រើសជាតិព័រទុយហ្គាល់ ក្នុងលទ្ធល ២-០ ឈរលេខ៤ ពូល E ក្រោយឆ្លងកាត់២ប្រកួត ចាញ់ទាំង២ប្រកួត មានសូន្យពិន្ទុ។
ក្រុមទាំង ១៦ដែលបានឡើងទៅកាន់វគ្គ ១៦ក្រុមមានដូចជា៖ ប្រទេសស្វីស, អេស្ប៉ាញ, ជប៉ុន, ន័រវេស, ហូឡង់, អាព្រិចខាងត្បូង, ស៊ុយអែត, សហរដ្ឋអាមេរិក, អង់គ្លេស, នីហ្សេរីយ៉ា,អូស្ត្រាលី, ដាណឺម៉ាក, កូឡុំប៊ី, ហ្សាម៉ាអ៊ីក, បារាំង និងម៉ារ៉ុក។ ការប្រកួត នឹងចាប់ផ្ដើមនៅថ្ងៃទី០៥ ខែសីហា ដោយ ស្វីស ត្រូវជួបជាមួយអេស្ប៉ាញ និង ជប៉ុន ត្រូវជួបជាមួយ ន័រវេស។
សម្រាប់ព្រឹត្តិការណ៍បាល់ទាត់ពិភពលោក FIFA Women’s World Cup ឆ្នាំ២០២៣ ដែលប្រទេសអូស្ត្រាលី និងនូវែលសេឡង់ ទទួលរៀបចំធ្វើជាសហម្ចាស់ផ្ទះ ដោយមាន ៣២ក្រុមចូលរួម បែងចែកជា ៨ពូល នៅលើ១០ទីលាន ក្នុងចំណោម៩ទីក្រុងផ្សេងគ្នា។ ពានរង្វាន់នេះ បានចាប់ផ្តើមពីថ្ងៃទី២០ ខែកក្កដា នឹងគ្រោងបញ្ចប់នៅថ្ងៃទី២០ ខែសីហា។
គួរបញ្ជាក់ថា ព្រឹត្តិការណ៍បាល់ទាត់ពិភពលោក FIFA Women’s World Cup បង្កើតឡើងដំបូងនៅឆ្នាំ១៩៩១ មានអាយុកាល៣២ ខណ:សហរដ្ឋអាមេរិក ឈ្នះពាននេះច្រើនជាងគេសរុប ៤លើក រីឯអាល្លឺម៉ង់ ២លើក, ន័រវេស និងជប៉ុនជាក្រុមមកពីតំបន់អាស៊ីតែមួយគត់បានឈ្នះពាននេះបាន ១លើក នៅឆ្នាំ២០១១ ខណ:ចិន ធ្លាប់បានឡើងដល់វគ្គផ្ដាច់ព្រ័ត្របានម្ដងនៅឆ្នាំ១៩៩៩ បានត្រឹមលេខ ២ក្រោយចាញ់សហរដ្ឋអាមេរិក ដោយបានប៉េណាំងទី (៥-៤) ក្រោយប្រកួតស្មើគ្នា ០ទល់នឹង០៕
