សិល្បៈជាតិ៖ ថ្មីៗនេះតារាចម្រៀងស្រីជួរមុខនៅក្នុងផលិតកម្មរស្មីហង្សមាសគឺអ្នកនាង ពេជ្រ សោភា បានបង្ហោះរូបភាពមួយសន្លឹករបស់ សាន ស្រីឡៃ និងបានសរសេរពាក្យពេចន៍មួយចំនួនដែលធ្វើឱ្យអ្នកគាំទ្រនឹកស្រណោះដល់អ្នកនាង សាន ស្រីឡៃ។ បើគិតមកទល់ពេលនេះ អ្នកនាង សាន ស្រីឡៃ បានលាចាកលោកនេះអស់រយៈពេល ៦ ឆ្នាំហើយ។
អ្នកនាង ពេជ្រ សោភា បានរៀបរាប់នៅលើបណ្ដាញសង្គមហ្វេសប៊ុកថា ៖ «ហេតុ អីប៉ុន្មានថ្ងៃនេះនឹកខ្លាំងនេះ មនុស្សល្អរបស់បងអើយ ទៅដល់កន្លែងណាហើយ ទៅទាំងមិនបានត្រៀមខ្លួន ស្អប់ណាត់ជួបបង សន្យាថា១០នាទីទៀតដល់ផ្ទះអ្នកគ្រូហើយ តែ១០នាទីពិតមែន គឺទៅបាត់ហើយ ដឹងទេគេគ្រប់គ្នានឹក»។
ដូចអ្នកគ្រប់គ្នាបានដឹងស្រាប់ហើយថា អ្នកនាង សាន ស្រីឡៃ គឺជាកូនក្រុមរបស់អ្នកនាង ពេជ្រ សោភា ក្នុងកម្មវិធីប្រឡងចម្រៀងលំដាប់ពិភពលោក The Voice Cambodia រដូវកាលទី ២ ក្នុងឆ្នាំ ២០១៦ ដែលកាលនោះអ្នកនាង សាន ស្រីឡៃ ទើបតែមានវ័យ ២៣ ឆ្នាំប៉ុណ្ណោះ។ ដោយសារសមត្ថភាពរបស់អ្នកនាង សាន ស្រីឡៃ ខ្លាំងជាងបេក្ខជនដៃទៀតនៅក្នុងក្រុមតែមួយ ទើបធ្វើឱ្យអ្នកនាងមានភាពលេចធ្លោជាងគេ និងបានបន្តឡើងប្រកួតរហូតដល់វគ្គ Live Show ផ្ដាច់ព្រ័ត្រតែម្ដង។ ក្រោយចប់ការប្រកួត អ្នកនាង សាន ស្រីឡៃ បានក្លាយជាតារាចម្រៀងកុងត្រានៅក្នុងផលិតកម្ម រស្មីហង្សមាស ដែលមានបទចម្រៀងល្បីជាច្រើនបានបញ្ចេញដូចជាបទ «ឈឺចាប់ពីរដងបានហើយ» «នឹកគេស្ទើរស្លាប់ខ្លួន» «អាការៈស្នេហ៍» និងបទ «ទឹកភ្នែកសាប» ជាដើម។
គេនៅចាំបានថា តារាចម្រៀង សាន ស្រីឡៃ ត្រូវបានខ្មាន់កាំភ្លើងដែលត្រូវជាអតីតស្វាមីរបស់ខ្លួនបាញ់សម្លាប់យ៉ាងសាហាវនៅក្នុងគ្លីនិកកែសម្ផស្សមួយកន្លែង ស្ថិតនៅតាមបណ្តោយផ្លូវ ៣១០ សង្កាត់បឹងកេងកង១ ខណ្ឌចំការមន នៅថ្ងៃទី ១៦ ខែតុលា ឆ្នាំ ២០១៧ ស្របពេលដែលប្រជាប្រិយភាពរបស់អ្នកនាង សាន ស្រីឡៃ កំពុងឡើងខ្លាំង ជាតារាចម្រៀងស្រីល្បីមួយរូបក្នុងដួងចិត្តយុវវ័យនាពេលនេះ។ តាមការបញ្ជាក់ពីខាងក្រុមគ្រួសារ អ្នកនាង សាន ស្រីឡៃ ធ្លាប់ទទួលរងអំពើហិង្សាពីសំណាក់អតីតស្វាមីញឹកញាប់ ហើយណាមួយមិនចង់មានឈ្មោះជាស្រីដណ្តើមប្តីគេនៅពេលដែលធ្លាយរឿងថា អតីតស្វាមីខ្លួនប្រពន្ធនិងកូន៤នាក់ហើយ ទើបអ្នកនាងបានអង្វរសុំស្វាមីចែកផ្លូវគ្នាច្រើនដង តែប្ដីមិនព្រមដោះលែង រហូតដល់ថ្ងៃមានរឿងកើតហេតុនោះតែម្ដង។
នៅពេលបាត់បង់អ្នកនាង សាន ស្រីឡៃ ត្រឹមមួយប៉ប្រិចភ្នែកភ្នែក ភ្លាមៗនោះធ្វើឱ្យអ្នកនាង ពេជ្រ សោភា ស្លុតចិត្តជាខ្លាំង ក្នុងអារម្មណ៍កាន់តែក្ដុកក្ដួលសោកស្រណោះ និងអាណិតដល់កូនក្រុមរបស់ខ្លួនដែលបានបណ្ដុះបណ្ដាលឱ្យក្លាយជាតារាល្បីដោយផ្ទាល់ដៃ។ អ្នកនាង ពេជ្រ សោភា ធ្លាប់និយាយឡើងថា ៖ «ខ្ញុំនិយាយត្រង់ខ្ញុំអាណិតក្មេងស្រីម្នាក់នេះណាស់ នាងមានភាពស្មោះត្រង់ណាស់ ខ្ញុំជាអ្នកបង្វឹកខ្ញុំស្គាល់ចរិតគាត់»។ ហើយអ្នកនាង ពេជ្រ សោភា ក៏បាននៅកំដរសពរបស់អ្នកនាង សាន ស្រីឡៃ រហូតដល់វិនាទីចុងក្រោយ។
សម្រាប់តារាចម្រៀង សាន ស្រីឡៃ បានត្រឹមតែបន្សល់នូវការចងចាំតាមរយៈបទចម្រៀងដែលនៅសល់តែប៉ុណ្ណោះ អ្នកគាំទ្រនៅតែនឹកស្រណោះចំពោះអ្នកនាង ហើយបទចម្រៀងរបស់អ្នកនាង សាន ស្រីឡៃ ក៏ត្រូវបានគ្រូបង្វឹក ពេជ្រ សោភា លើកយកមកឱ្យកូនក្រុមរបស់ខ្លួនច្រៀងក្នុងការប្រឡង The Voice Cambodia រដូវកាលទី ៣ ឆ្នាំ ២០២៣ នេះ ដើម្បីជាការរំលឹកដល់ការខិតខំប្រឹងប្រែងរបស់អ្នកនាង សាន ស្រីឡៃ នៅពេលប្រឡងចម្រៀង និងឈានជើងចូលប្រឡូកក្នុងវិស័យសិល្បៈ៕