កីឡាករ អាត អូនតូច ត្រូវបានលោកគ្រូបង្វឹក ឡុង ឬទ្ធា ដាក់ចូលក្នុងបញ្ជីប្រកួតរបស់ព្រៃវែងអែហ្វស៊ី ឡើងវិញ ក្នុងសប្ដាហ៍ទី២នៃពានរង្វាន់លីគកំពូលកម្ពុជា Cambodian Premier League 2023-24 ក្រោយរូបគេបានដាច់សរសៃជង្គង់ (ACL+LCL) កាលពីថ្ងៃទី១៩ ខែកុម្ភៈ ឆ្នាំ២០២៣ អំឡុងពេលប្រកួតសន្សំពិន្ទុក្នុងពូលនៃពានរង្វាន់ Cambodian League Cup ទល់ក្រុមគីរីវង់សុខសែនជ័យ។
រំលងបាន១៧៥ថ្ងៃរបួសរបស់កីឡាកររូបនេះបានជាសះស្បើយឡើងវិញ ព្រមទាំងមានឈ្មោះជួយក្រុមព្រៃវែងអែហ្វស៊ី ឡើងវិញក្នុងបេសកកម្មនៅឆ្នាំ២០២៣ ជាពិសេសរូបគេមានឈ្មោះក្នុងបញ្ជីជម្រើសកីឡាករ២១នាក់ ប្រកួតទល់នឹងក្រុមម្ចាស់ផ្ទះ ISI ដង្កោសែនជ័យ នារាត្រីថ្ងៃសៅរ៍ ទី១២ ខែសីហា ឆ្នាំ២០២៣ លើទីលានកីឡដ្ឋាន AIA Stadium, KMH Park។
អត្ថបទពាក់ព័ន្ធ៖ប្រធានក្លិបព្រៃវែង បង្ហាញចំណាប់អារម្មណ៍ ក្រោយឡើងទៅកាន់លីគកំពូលកម្ពុជា (វីដេអូ)
យ៉ាងណាក្ដីលោក ឡុង ឬទ្ធា មិនបានប្តូរ អាត អូនតូច ចូលប្រកួតនៅឡើយទេ ដោយដាក់ក្នុងបញ្ជីបម្រុង សិន ស្របពេលដែលក្រុមមកពីព្រំដែនវៀតណាម មួយនេះ បានយកឈ្នះម្ចាស់ផ្ទះឯផ្លូវវេងស្រេង រាជធានីភ្នំពេញ ដោយលទ្ធផលលើសលប់ ៥-០។
ការត្រឡប់មកទីលានវិញ របស់កីឡាករ អាត អូនតូច បានដាក់រូបគេចេញបញ្ជីកីឡាកររបួសរបស់ក្រុមព្រៃវែងអែហ្វស៊ី ខណៈមិត្តរួមក្រុមខ្លួនចំនួន៤នាក់ទៀត កំពុងតែសម្រាកព្យាបាលនៅឡើយ ដូចជា៖
- ខ្សែបម្រើ ភួង ឌីណា ដាច់សសៃជង្គង់ ACL និង បែកទ្រនាប់ជង្គង់ អំឡុង Pre-Season
- អ្នកចាំទី សឿន រិទ្ធិវីរៈវឌ្ឍនា ដាច់សសៃជង្គង់ ACL ពេលប៉ះ Tiffy Army FC ពានរង្វាន់ Cambodian League Cup 2023
- ខ្សែបម្រើ សរ សាមុត ដាច់សសៃជង្គង់ ACL និង បែកទ្រនាប់ជង្គង់ អំឡុងពេលហ្វឹកហាត់
- ខ្សែប្រយុទ្ធស្លាប គី រីណា ដាច់សរសៃជង្គង់ ACL ពេលប៉ះណាហ្គាវើលដ៍ ពានរង្វាន់ Cambodian Premier League 2023-24
អត្ថបទពាក់ព័ន្ធ៖ឪពុកបន្តលើកទឹកចិត្តកូន បើទោះ អាត អូនតូច មិនទាន់បង្ហាញខ្លួនឱ្យក្រុមព្រៃវែងអែហ្វស៊ី ដោយសាររបួស
សម្រាប់ប្រកួតបន្តក្រុមព្រៃវែងអែហ្វស៊ី នឹងត្រូវបើកទ្វាកីឡដ្ឋានខេត្តព្រៃវែង របស់ខ្លួនទទួលក្រុមជើងឯក៤សម័យកាលបឹងកេត នៅថ្ងៃទី២០ សីហា ឆ្នាំ២០២៣ ខាងមុខ វេលាម៉ោង៣:៤៥នាទីរសៀល ប្រចាំសប្ដាហ៍ទី៣ នៃពានរង្វាន់ Cambodian Premier League 23-24៕