ប្រធានបទស្ដីពីដំណើរទស្សនកិច្ចផ្លូវការរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ទៅកាន់ទីក្រុងប៉េកាំង សាធារណៈរដ្ឋប្រជាមានិតចិន ត្រូវបានលើកយកមកពិភាក្សាក្នុងជំនួបរវាងឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ កម្ពុជា ជាមួយឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្រ្តីក្រសួងការបរទេស ចិន នៅក្រសួងការបរទេសកម្ពុជា នាថ្ងៃទី១៣ ខែសីហា ឆ្នាំ២០២៣។
«ដំណើរទស្សនកិច្ចផ្លូវការរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ទៅកាន់រដ្ឋធានីប៉េកាំង រួមទាំង ការអញ្ជើញចូលរួមក្នុងពិព័រណ៍អាស៊ាន-ចិនលើកទី២០ និងកិច្ចប្រជុំកំពូលស្តីពីធុរកិច្ចនិងការវិនិយោគអាស៊ាន-ចិន នៅទីក្រុងណាននីង ព្រមទាំងវេទិកាលើកទី៣ ស្តីពី គំនិតផ្តួចផ្តើមខ្សែក្រវ៉ាត់និងផ្លូវ ក៏ត្រូវបានពិភាក្សាផងដែរ»។ នេះបើតាមខ្លឹមសារបញ្ជាក់ក្នុងសេចក្ដីប្រកាសព័ត៌មានដែលបានចេញផ្សាយនៅថ្ងៃដដែល។
ក្នុងសេចក្ដីប្រកាសព័ត៌មាននោះ ក្រសួងការបរទេសកម្ពុជា មិនបានបញ្ជាក់អំពីគម្រោងលម្អិតនៃដំណើរទស្សនកិច្ចឯកឧត្តម ហ៊ុន ម៉ាណែត នៅឡើយទេ។ ប៉ុន្តែបើតាមអ្នកតាមដានការវិវត្តន៍ផ្នែកនយោបាយនៅកម្ពុជា ទស្សនកិច្ចផ្លូវការទំនងជានឹងត្រូវធ្វើឡើងបន្ទាប់ពីឯកឧត្តម ហ៊ុន ម៉ាណែត ឡើងកាន់មុខតំណែងជានាយករដ្ឋមន្រ្តីកម្ពុជាផ្លូវការ ខណៈចិនអាចជារដ្ឋដំបូងក៏ថាបានដែលនឹងត្រូវក្រាលព្រំក្រហមទទួលទស្សនកិច្ចនាយករដ្ឋមន្រ្តីថ្មីរបស់កម្ពុជា។
គួរកត់សម្គាល់ក្នុងឱកាសបំពេញទស្សនកិច្ចនកិច្ចនៅកម្ពុជា ឯកឧត្តម វ៉ាង យី ដែលទើបវិលចូលកាន់មុខតំណែងប្រមុខការទូតចិនវិញ បានដឹកនាំគណៈប្រតិភូចូលជួបពិភាក្សាការងារជាមួយសម្ដេចតេជោ ហ៊ុន សែន នាយករដ្ឋមន្រ្តីជិតផុតអាណត្តិ និងបានជួបពិភាក្សាការងារដាច់ដោយឡែកជាមួយឯកឧត្តម បណ្ឌិត ហ៊ុន ម៉ាណែត ផងដែរ។ ឯកឧត្តម វ៉ាង យី អះអាងថាទស្សនកិច្ចកម្ពុជាលើកនេះ គឺជាបង្ហាញថាចិនគាំទ្រកម្ពុជា។
ជាការកត់សម្គាល់ថា ដំណើរទស្សនកិច្ចរបស់រដ្ឋមន្ត្រីការបរទេសចិន បានធ្វើឡើងស្របពេលមានការប្រារព្ធខួបអនុស្សាវរីយ៍លើកទី ៦៥ ឆ្នាំនៃទំនាក់ទំនងការទូតរវាងកម្ពុជានិងចិន ហើយ ឯកឧត្តម វ៉ាង យី បានក្លាយជារដ្ឋមន្រ្តីការបរទេសដំបូងគេបង្អស់ដែលបានជួបពិភាក្សាការងារជាមួយឯកឧត្តម ហ៊ុន ម៉ាណែត បន្ទាប់ពីឯកឧត្តម ត្រូវបានចាត់តាំងជានាយករដ្ឋមន្រ្តីកម្ពុជាដោយនឹងកាន់អំណាចចាប់ពីថ្ងៃទី ២២ ខែសីហា។
រដ្ឋសភា នឹងបើកសម័យប្រជុំដំំបូងនៅថ្ងៃទី២១ ខែសីហា ឆ្នាំ២០២៣ និងបន្តបោះឆ្នោតបង្កើតរចនាសម្ព័ន្ធរដ្ឋសភា និងផ្ដល់សេចក្ដីទុកចិត្តរាជរដ្ឋាភិបាលថ្មីនៅថ្ងៃទី២២ ខែសីហា។ នៅខែកញ្ញា ឆ្នាំ២០២៣ ក្នុងឋានៈជានាយករដ្ឋមន្រ្តីនៃកម្ពុជា ឯកឧត្តម ហ៊ុន ម៉ាណែត ក៏នឹងត្រូវដឹកនាំគណៈប្រតិភូជាន់ខ្ពស់ចូលរួមមហាសន្និបាតប្រចាំឆ្នាំរបស់អង្គការសហប្រជាតិនៅទីក្រុងញ៉ូវយ៉កសហរដ្ឋអាមេរិកផងដែរ៕