ជើងឯកបាល់ទះបុរសក្នុងសាលប្រចាំទ្វីបអាស៊ី Asian Men’s Volleyball Championship ដែលរៀបចំឡើងរាល់២ឆ្នាំម្តង នឹងបន្តការប្រកួតលើកទី២២របស់ខ្លួននៅរសៀលថ្ងៃទី១៩ ខែសីហា ឆ្នាំ២០២៣ នេះដោយប្រទេសអ៊ីរ៉ង់ ជាម្ចាស់ផ្ទះ។
ការប្រកួតនេះមានក្រុមចូលរួមចំនួន១៧ក្រុម មកពីតំបន់នានាក្នុងទ្វីប ដោយក្នុងនោះមាន៖
- ពូល A ហុងកុង, អ៊ីរ៉ង់, អ៊ីរ៉ាក់
- ពូល B ជប៉ុន ថៃ អ៊ូប៊ែគីស្ថាន
- ពូល C ចិន ឥណ្ឌូណេស៊ី កាហ្សាក់ស្ថាន
- ពូល D ប៉ារ៉ែន និងតៃវ៉ាន់
- ពូល E អាហ្វហ្គានីស្ថាន ឥណ្ឌា កាតារ
- ពូល F បង់ក្លាដេស ប៉ាគីស្ថាន កូរ៉េខាងត្បូង
*សូមបញ្ជាក់ថាល្វែងម៉ោងនៅទីក្រុង Urmia យឺតជាងម៉ោងនៅកម្ពុជា ចំនួន២ម៉ោង
សម្រាប់កម្មវិធីប្រកួតនៅថ្ងៃបើកឆាកមាន៖
- ឥណ្ឌូណេស៊ី ប៉ះ ចិន
- ជប៉ុន ប៉ះ ថៃ
- ហុងកុង ប៉ះ អ៊ីរ៉ាក់
- កាតារ ប៉ះ ឥណ្ឌា
- បង់ក្លាដេស ប៉ះ កូរ៉េខាងត្បូង
- តៃវ៉ាន់ ប៉ះ ម៉ុងហ្គោលី
ពានរង្វាន់នេះបានកំណត់ថាក្រុមដែលចូលរួមនេះគឺមាន១ក្រុមជាប្រទេសម្ចាស់ផ្ទះ ហើយ១០ក្រុមជាសមាជិកកាលពីឆ្នាំចាស់ និង៥ក្រុមជាប្រទេសដែលខ្លាំងនៅតំបន់ក្នុងទ្វីបអាស៊ី។
នេះជាលើកទី៥ហើយដែលអ៊ីរ៉ង់ រៀបចំធ្វើជាម្ចាស់ផ្ទះ កម្រិតទ្វីប ខណៈ៤លើកកន្លងទៅធ្វើនៅទីក្រុង Tehran។ លើកទី៥នេះធ្វើនៅទីក្រុង Urmia ចាប់ពីថ្ងៃទី១៩ដល់២៦ខែសីហា ឆ្នាំ២០២៣ ដោយប្រើប្រាស់ទីលាន Ghadir Arena អាចផ្ទុកអ្នកគាំទ្របាន៦០០០នាក់ និងទីលានShahidan Ahandoust Hall អាចផ្ទុកអ្នកគាំទ្របាន៣០០០នាក់។
តាំងពីរៀបចំដំបូងក្នុងឆ្នាំ១៩៧៥មក ប្រទេសជប៉ុន ជាអ្នកឈ្នះពានរង្វាន់នេះច្រើនជាងគេគឺរហូតដល់៩លើក ខណៈកូរ៉េខាងត្បូង និងអ៊ីរ៉ង់ ឈ្នះម្នាក់៤លើកស្មើគ្នា ចិនឈ្នះបាន៣លើក និងអូស្រ្តាលី ឈ្នះបាន១លើក។ ចំណែកប្រទេសតំបន់អាស៊ានចំនួន៣ធ្លាប់ធ្វើជាម្ចាស់ផ្ទះព្រឹត្តិការន៍កម្រិតទ្វីបនេះ ដោយថៃ ធ្វើឡើងនៅឆ្នាំ១៩៩៣និង២០០៥ ឥណ្ឌូណេស៊ី នៅឆ្នាំ២០០៧ និង២០១៧ និងហ្វីលីពីន នៅឆ្នាំ២០០៩៕