សិល្បៈជាតិ៖ ជារឿយៗអគ្គនាយិកាក្រុមហ៊ុន ដាណា ទ្រី ទោះមមាញឹកក្នុងមុខជំនួញនិងអាជីវកម្មក្ដី នៅតែឆ្លៀតរកពេលវេលា ធ្វើបុណ្យចែកទានជូនដល់ បងប្អូនក្រីក្រខ្សត់ខ្សោយ ចាស់ជរា កុមារ និងអ្នកខ្វះលទ្ធភាព ដើម្បីជាចំណែកមួយជួយសម្រួលដល់ការចិញ្ចឹមជីវិតប្រចាំថ្ងៃដែលកំពុងតែជួបការលំបាកនិងខ្វះខាត។
ក្រៅពីចូលរួមជ្រះថ្លាជាមួយសាមីដើមទានប្រធានដើមបុណ្យហើយនោះ បែរជាមានអ្នកចាប់អារម្មណ៍សួរនាំរឿងចង្កេះអង្ក្រង និង ពោលសរសើរថាបច្ចុប្បន្ន អ្នកម្ដាយកូន៣ រូបនេះមើលទៅកាន់តែក្មេងស្អាតប្លែកចំណែកឯចង្កេះអង្ក្រង Size XS កាន់តែធ្វើឲ្យរូបសម្រស់អ្នកនាង ស្រស់ស្អាតឡើង រហូតមានអ្នកខ្លះសង្ស័យថា ប្រហែលជាអាចដោយសារមានថ្នាំពិសេស ឬអ្នកស្អំបេះដូង ទើបធ្វើឲ្យអ្នកនាង មើលទៅកាន់តែរីករាយជាងមុន និងស្រស់ស្អាតឡើង។
ខណៈដែលតួឯកស្រីអ្នកគ្រូនួន នៅក្នុងរឿង «តាមចាប់ស្នេហ៍» មិនបានឆ្លើយតបអ្វីទាំងអស់ពាក់ព័ន្ធនឹងរឿងផ្ទាល់ខ្លួនឬរឿងបេះដូង។ ងាកមកការចូលរួមធ្វើបុណ្យ និង ជួយសម្រាលបន្ទុកប្រជាពលរដ្ឋរស់នៅភូមិវិហារសួគ៌ ស្រុកខ្សាច់កណ្ដាល ខេត្តកណ្ដាល បានធ្វើឡើងកាលពីថ្ងៃសៅរ៍ទី១៨ ខែសីហា កន្លងទៅ។ ជាការពិតណាស់ ការធ្វើបុណ្យចែកទាននេះគឺជាសកម្មភាពមួយដ៏ល្អ ដែលជួយបំផុសឲ្យបងប្អូនដែលមានធនធានច្រើន ឬអ្នកមានលទ្ធភាពខ្ពស់ ចែករំលែកទ្រព្យធនជួយដល់អ្នកដែលមិនសូវធូរធារ ដូចសម័យកាលដែលព្រះពុទ្ធនៅយោងកំណើតជាព្រះវេស្សន្តរ ព្រះអង្គក៏រមែងប្រកាន់ខ្ជាប់នូវទង្វើចែកទាននេះផងដែរ។
តាមដឹងលោកជំទាវឧកញ៉ា បានចំណាយទឹកប្រាក់រហូតដល់ទៅខ្ទង់ម៉ឺនដុល្លារ ដើម្បីទិញអង្ករ ទឹកស៊ីអ៊ីវ ត្រីខ មី ទឹកសុទ្ធ សម្ភារៈសិក្សា ព្រមទាំងថវិកា ចែកជូនក្នុងឱកាសនោះ៕
