អតីតហ្វេសស៊ី ថៃ នារីសុជាតា ហៅ ហ្វីយ៉ាតា បានធ្វើឱ្យមហាជនមានការភ្ញាក់ផ្អើល និងជជែកវែកញែកគ្នាបែកខ្ទិះលើបណ្ដាញសង្គម រហូតមានអ្នកខ្លះរកភស្តុតាងផ្សេងៗមកបញ្ជាក់ថែមទៀត ពាក់ព័ន្ធនឹងបុរសអាថ៌កំបាំងឃើញតែខ្នងថតកៀកកើយជាមួយកញ្ញាក្នុងរថយន្ត។
រូបថត ៣សន្លឹកដែលតារាស្រីរូបស្អាតម្នាក់នេះបានបង្ហោះនៅលើហ្វេសប៊ុកផេករបស់ខ្លួនដែលមានឈ្មោះថា Fiyata – ហ្វីយ៉ាតា បានរៀបរាប់ពីជម្រៅដួងចិត្តនិងក្រអៅបេះដូងរបស់ខ្លួន ដោយប្រៀបធៀបសៀវភៅចាស់មួយក្បាលទៅនឹងស្នេហារបស់ខ្លួន។ តាមការរៀបរាប់កញ្ញាហាក់បង្ហាញថាកញ្ញា ត្រលប់ទៅត្រូវរ៉ូវនឹងគូស្នេហ៍ចាស់របស់ខ្លួន ដោយកញ្ញាបានរៀបរាប់ថាទោះជាបុរសម្នាក់នោះធ្លាប់ខុសឬត្រូវបែបណាកន្លងមក តែគេជាមនុស្សដែលកញ្ញាគោរពស្រលាញ់ ជាបុរសដែលកញ្ញាអាចរត់ទៅឱបបានគ្រប់ពេល ជាខ្យល់ដង្ហើម និងជួយសម្រចក្ដីស្រមៃឱ្យកញ្ញា។ នៅក្នុងសំណេរនោះក៏បានរៀបរាប់អរគុណចំពោះបុរសអាថ៌កំបាំងរូបនោះថែមទៀតផង។
បន្ទាប់ពី ហ្វីយ៉ាតា រៀបរាប់ពាក្យពេចន៍ចេញពីក្រអៅបេះដូង ក៏មានអ្នកលេងបណ្ដាញសង្គមជាច្រើននាក់បានចូលមកជជែកវែកញែកគ្នាបែកខ្ទិះទៅលើសំណេររបស់កញ្ញា ព្រមទាំងទំនាក់ទំនងអ្នកទាំងពីរ ដោយម្នាក់ៗមានអំណះអំណាង និង ការយល់ឃើញខុសៗគ្នា។ ក្រុមអ្នកបញ្ចេញមតិខ្លះបានលើកឡើងថា ហ្វីយ៉ាតាផុសប្រូម៉ូតបទចម្រៀងថ្មីជាមួយនឹងលោក ហេង ពិទូ ព្រមទាំងភ្ជាប់រូបថតជាមួយផង ខណៈក្រុមខ្លះទៀតបានយករូបជាច្រើនសន្លឹកមកផ្គូផ្គងដើម្បីបញ្ជាក់អះអាងថាបុរសក្នុងរូបនោះគឺលោក ហេង ពិទូ។ ចំណែកក្រុមអ្នកជឿជាក់ថាហ្វីយ៉ាតា និង លោក ហេង ពិទូមានស្នេហាពិតប្រាកដបានលើកយករូបភាពមួយសន្លឹក ដែលមានរូបលោក ហេង ពិទូ និង កញ្ញា ហ្វីយ៉ាតា មានអក្សរ ឆ្នាំ២០១៦ និង ឆ្នាំ២០២១ មកប្រៀបធៀប ភ្ជាប់ដោយសំណេរស៊ីអារម្មណ៍យ៉ាងដូច្នេះថា៖
«នៅតែមានស្នាមញញឹមដដែលសម្រាប់គ្នា តាំងពីស្គាល់បងរហូតដល់សព្វថ្ងៃមិនដែលមានពេលណាគ្មានវត្តមានរបស់បងទេ មិនថាអូនមានអ្នកណាឬនៅម្នាក់ឯង ពេលអូនលំបាកឬក៏ពេលអូនសប្បាយចិត្តតែងតែមានបងនៅពីក្រោយខ្នងអូនរហូត អូនស្គាល់សេចក្ដីសុខពិតប្រាកដពីបងសំខាន់ថាយើងនឹងមិនបែកគ្នាម្ដងទៀតជារៀងរហូត»។
យ៉ាងណាមិញនេះគ្រាន់តែជាការលើកឡើងនិងជជែកវែកញែកពីសំណាក់អ្នកគាំទ្ររបស់តារាប្រុសស្រីទាំងពីររូបនេះ ចំណែកភាគីតារាល្បីទាំងពីរមិនបានចេញមកស្រាយបំភ្លឺ ឬធ្វើការឆ្លើយតបចំពោះចម្ងល់របស់ហ្វេនថាយ៉ាងណានោះទេ៕
