ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំយុវជន និង កីឡា បានអញ្ជើញចុះត្រួតពិនិត្យមើលកន្លែងស្នាក់នៅហូបចុងរបស់កីឡាករការិនី ដែលបានកោះប្រជុំជាមួយថ្នាក់ដឹកនាំអង្គភាពចំណុះអគ្គនាយដ្ឋាន ដើម្បីស្គាល់គ្នា ហើយពិនិត្យមើលនូវការងារមួយចំនួន ពិសេសគឺការងារបន្ទាន់ ដែលរាជរដ្ឋាភិបាល ក៏ដូចជាក្រសួងអប់រំ យុវជន និងកីឡា ដែលទទួលបានការណែនាំដ៏ខ្ពង់ខ្ពស់ពីឯកឧត្តមបណ្ឌិតសភាចារ្យ ហង់ជួន ណារ៉ុន ឲ្យមើលការរៀបចំនូវយុទ្ធសាស្ដ្រកែទម្រង់ និងអភិវឌ្ឍវិស័យអប់រំកាយ និងកីឡា របស់ក្រសួងឡើងវិញ។
រដ្ឋលេខាធិការក្រសួងអប់រំយុវជន និង កីឡាបានថ្លែងថា៖ «នេះគឺជាការជួបជុំដំបូង ដើម្បីស្គាល់គ្នាផង និងពិនិត្យការងារមួយចំនួន ពិសេសការងារបន្ទាន់ ក្រោយទទួលបានការណែនាំពីលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា ដើម្បីបានជ្រូតជ្រាប និងរៀបចំនូវយុទ្ធសាស្ដ្រកែទម្រង់ និងអភិវឌ្ឍន៍ការងារអប់រំកាយ និងកីឡា ស្របតាមគោលនយោបាយរបស់រាជរដ្ឋាភិបាល អាណត្តិថ្មី»។
ឯកឧត្តម បានផ្ដល់នូវខ្លឹមសារសំខាន់ៗមួយចំនួន ដើម្បីជំរុញដល់ការអនុវត្តការងារ រួមមាន៖ «យោងតាមគោលនយោបាយរបស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ជាពិសេសការដាក់ចេញនូវយុទ្ធសាស្ដ្របញ្ចកោណ ដែលក្នុងនោះមានការណែនាំ និងបញ្ជាក់ច្បាស់ពីសម្ដេចមហាបវរធិបតី ហ៊ុន ម៉ាណែត ក៏ដូចជាឯកឧត្តមបណ្ឌិតសភាចារ្យ ហង់ជួន ណារ៉ុន បានដាក់ចេញនូវកំណែទម្រង់ស៊ីជម្រៅ ច្បាស់លាស់៖
ទី១-រឿងអភិបាលកិច្ចល្អ ដែលឯកឧត្តមបណ្ឌិតសភាចារ្យ ហង់ជួន ណារ៉ុន បានដាក់ចេញនូវយុទ្ធសាស្ដ្រ និងចំណុចកែទម្រង់ច្បាស់លាស់ ទាំងសាលារៀន ការអប់រំ យុវជន និងកីឡា ។ ក្នុងកីឡា យើងត្រូវគោរពគោលការណ៍នេះ ដើម្បីមានតម្លាភាព គណនីភាព មានសង្គតិភាព ហើយចេញជាលទ្ធផល សូចនាករច្បាស់លាស់ ដើម្បីបង្កើននូវសុខដុមនីយកម្មការងារ នៅក្នុងអគ្គនាយកដ្ឋាន និងនាយកដ្ឋានទទួលបន្ទុករបស់យើង។
ទី២-ការអភិវឌ្ឍន៍ធនធានមនុស្សបន្ថែម ។ ធនធានមនុស្សសំខាន់ គឺជំនាញ ដែលរាជរដ្ឋាភិបាលបានដាក់ថា “មូលធនមនុស្ស” ។ មូលធនមនុស្សរបស់រាជរដ្ឋាភិបាល ក៏មានការរួមចំណែកនៅក្នុងមូលធនមនុស្ស នៃវិស័យអប់រំកាយ និងកីឡាដែរ ។ ដូច្នេះវិស័យអប់រំកាយ និងកីឡា ត្រូវតែផ្ដោតទៅលើភាពខ្វះ ឬលើស ដែលឯកឧត្តមបណ្ឌិតសភាចារ្យរដ្ឋមន្ដ្រី ជំរុញឲ្យពិនិត្យ និងប្រើប្រាស់ឲ្យអស់លទ្ធភាពនូវធនធានមនុស្សដែលមាន» ។
ឯកឧត្តម បន្ថែមថា មួយវិញទៀត គឺការដើរទៅរកកំណែទម្រង់ស៊ីជម្រៅមួយ ដើម្បីស្វែងរកឧត្តមភាពកីឡា និងថែរក្សាឧត្តមភាពកីឡានេះ តាមរយៈការត្រួតពិនិត្យឡើងវិញ គ្រប់នាយកដ្ឋានទាំងអស់ តើត្រូវដើរនូវយុទ្ធសាស្ដ្រណា? ដូច្នេះយុទ្ធសាស្ដ្រដែលត្រូវដើរ គឺការអភិវឌ្ឍជំនាញ និងកែសម្រួលជំនាញទាំងអស់ នៅក្នុងនាយកដ្ឋាន ដោយការធ្វើបច្ចុប្បន្នភាព និងស្វែងរកការគាំទ្រ ។ កិច្ចការនេះ ត្រូវធ្វើជាជំហានៗ ដើម្បីធ្វើកំណែទម្រង់ ប្រកបដោយលទ្ធផលច្បាស់លាស់ ។
ឯកឧត្តម វ៉ាត់ ចំរើន បានបញ្ជាក់ថា៖ «ឯកឧត្តមបណ្ឌិតសភាចារ្យ ហង់ជួន ណារ៉ុន ចង់ឃើញ លទ្ធផលជាក់ស្ដែង នៅក្នុងការកែទម្រង់ ។ អ៊ីចឹង យើងនឹងធ្វើឲ្យចេញលទ្ធផលជាក់ស្ដែង ក្នុងការកែទម្រង់នេះឲ្យមានរបៀបរបបធ្វើការត្រឹមត្រូវ មានការគោរពឋានានុក្រមល្អ មានតម្លាភាពក្នុងយន្ដការការងារទាំងអស់គ្នា ចែករំលែកចំណេះដឹង និងជំនាញ ដែលបានសិក្សារៀនសូត្រ ដើម្បីកសាងនូវវិស័យអប់រំកាយ និងកីឡា ឲ្យទៅជាមូលដ្ឋានគ្រឹះនៃការអភិវឌ្ឍសង្គម សេដ្ឋកិច្ច និងអភិវឌ្ឍន៍ជាតិរបស់យើង ជាមួយរាជរដ្ឋាភិបាល»៕
