ក្រុមបាល់ទាត់ជម្រើសជាតិកម្ពុជា បានយកឈ្នះលើក្រុមកោះម៉ាកាវ ដោយលទ្ធផល ៤ទល់០ លើទីលានពហុកីឡដ្ឋានជាតិក្នុងរាជធានីភ្នំពេញ នាល្ងាចថ្ងៃចន្ទ ទី១១ ខែកញ្ញា ឆ្នាំ២០២៣ ដែលជាជំនួបមិត្តភាពអន្តរជាតិ។
ជំនួបដែលកាត់សេចក្តីដោយលោកអាជ្ញាកណ្ដាលជនជាតិវៀតណាម Hoang Ngoc Haចាប់ផ្ដើមផ្លុំកញ្ចែប្រកួតនៅម៉ោង៧យប់។ ម្ចាស់គ្រាប់បាល់របស់កម្ពុជារកបានដោយកីឡាករ សៀង ចន្ធា ២គ្រាប់ សឿយ វិសាល និង រ៉ឹម ប៊ុនហៀង រកបានម្នាក់១គ្រាប់។
ដូច្នេះ គិតត្រឹមពេលនេះជំនួបរវាងកម្ពុជា ជាមួយម៉ាកាវ កើនដល់៧ប្រកួតហើយ ខណៈក្រុមទាំងប៉ះគ្នាលើកដំបូងកាលឆ្នាំ២០០៨ ស្របពេលដែលកម្ពុជា បានទាត់បញ្ជូលទីក្រុមម៉ាកាវ ចំនួន១៨គ្រាប់ ហើយម៉ាកាវ ទាត់ចូលវិញចំនួន៧គ្រាប់។
គ្រាប់បាល់ទាំង១៨គ្រាប់របស់កម្ពុជា រកបានដោយកីឡាករ៖
- សំអ៊ែល ណាសា ចំនួន៣គ្រាប់
- នុត ស៊ីនួន ចំនួន២គ្រាប់
- ឃួន ឡាបូរ៉ាវី ចំនួន២គ្រាប់
- ចាន់ វឌ្ឍនាកា ចំនួន២គ្រាប់
- សៀង ចន្ធា ចំនួន២គ្រាប់
- ចាន់ រិទ្ធី ចំនួន១គ្រាប់
- កែវ សុខង៉ន ចំនួន១គ្រាប់
- ទៀប វឌ្ឍនៈ ចំនួន១គ្រាប់
- ឃីម បូរី ចំនួន១គ្រាប់
- ធារី ចន្ថាប៊ីន ចំនួន១គ្រាប់
- សឿយ វិសាល ចំនួន១គ្រាប់
- រ៉ឹម ប៊ុនហៀង ចំនួន១គ្រាប់
ក្រុមបាល់ទាត់ជម្រើសជាតិកម្ពុជា កំពុងត្រៀមខ្លួន ប្រកួតវគ្គជម្រុះវគ្គដំបូងពានរង្វាន់ជើងឯកពានរង្វាន់ 2026 FIFA World Cup ប្រចាំទ្វីប ដែលត្រូវប្រកួតទល់ក្រុមប៉ាគីស្ថាន ចំនួន២ជើង ក្នុងខែ តុលា ឆ្នាំ២០២៣ ខាងមុខ៕
