សិល្បៈអន្តរជាតិ៖ ថ្មីៗនេះតារាចម្រៀងបុរសរូបសង្ហា២ដួងរបស់កូរ៉េខាងត្បូង គឺ D.O សមាជិកក្រុម EXO និង Jungkook សុទ្ធតែធ្លាក់ចូលទៅក្នុងរឿងអាស្រូវ និងរងប្រតិកម្មពីមហាជនចំពោះករណីដែល IDOL ទាំងពីរដួងនេះបានឈរបង្ហុយបារីនៅទីសាធារណៈ ក៏ដូចជាកន្លែងហាមឃាត់។
ជុំវិញករណីចម្រូងចម្រាសរបស់ D.O កើតឡើងដោយសារតែបុរសសង្ហារូបនេះបានជក់បារីនៅ Music Core ដែលជាទីកន្លែងហាមឃាត់មិនឱ្យជក់បារី ដោយរូបភាពវីដេអូនោះត្រូវបានអ្នកប្រម៉ាញ់បានយកទៅចែកចេញនៅលើបណ្ដាញសង្គម និងមានប្រព័ន្ធផ្សពផ្សាយនានារបស់កូរ៉េខាងត្បូងយកទៅចុះផ្សាយយ៉ាងគគ្រឹកគគ្រេង។ ថ្វីត្បិតករណីនេះមានការអន្តរាគមន៍ពីផលិតកម្ម SM Entertainment ដោយមានការកែសម្រួលរូបភាពក្ដី ឬលុបចោលរូបភាពក្ដី ក៏ឃ្លីបដែលបែកធ្លាយនោះនៅតែបន្តចរាចរណ៍នៅលើប្រព័ន្ធផ្សព្វផ្សាយដដែល។
ឆ្លើយតបចំពោះករណីនេះតំណាងរបស់ D.O បានចេញមកបកស្រាយថាតារារូបនេះបានប្រើបារីអេឡិចត្រូនិចមិនមានសារធាតុនីកូទីននោះឡើយ ប៉ុន្តែនៅពេលត្រួតពិនិត្យឧបករណ៍នេះ សាធាតុនីកូទីនត្រូវបានរកឃើញនៅក្នុងឈ្មោះគ្រឿងផ្សំ ដូច្នេះលោកត្រូវបានផាកពិន័យចំពោះការប្រើប្រាស់ឧបករណ៍មួយនេះដដែល។
ងាកមកករណីរបស់ Jungkook ឯណោះវិញក៏មានវាសនាមិនខុសពី D.O ប៉ុន្មាននោះឡើយត ព្រោះសមាជិក BTS រូបនេះត្រូវបានគេលួចថតបានកំពុងឈរជក់បារី នៅក្រៅភោជនីយដ្ឋានមួយកន្លែងនៅសហរដ្ឋអាមេរិក។ ប៉ុន្តែក្រុមអ្នកគាំទ្ររបស់គេបានចេញមកការពារ Idol បន្ទាប់លោកទទួលរងការរិះគន់ពេញបណ្ដាញអ៊ិនធឺណិតករណីបោះកន្ទុយបារីចោលនៅទីសាធារណៈ។ ដោយក្រុមអ្នកគាំទ្របានបញ្ចេញភស្តុតាងសំខាន់មួយបញ្ជាក់ថាភោជនីយដ្ឋានខាងអនុញ្ញាតឱ្យភ្ញៀវជក់បារីនៅខាងក្រៅបាន ហើយនៅជិតកន្លែងដែលលោកឈរនោះក៏មានធុងសំរាមសម្រាប់ចោលកន្ទុយបារីផងដែរ មិនមែនចោលនៅទីសាធារណៈដូចការចោទប្រកាន់នោះឡើយ៕
