កាលពីថ្ងៃទី១៧ ខែកញ្ញា តំណាងសារព័ត៌មានត្រយង១រូប រួមជាមួយស្ថាប័នសារព័ត៌មានចំនួន ១៨ល្បីៗនៅកម្ពុជា ដែលមានវត្តមានអ្នកសារព័ត៌មានចំនួន ៤៤រូប បានអញ្ជើញមក ក្រសួងកសិកម្ម រុក្ខាប្រមាញ់ និងនេសាទ រួមជាមួយរដ្ឋបាលជលផល និងអង្គការ UNIDO នឹងចូលរួមក្នុង ដំណើរទស្សនកិច្ចសិក្សា និងផ្សព្វផ្សាយអំពីសហគ្រាសជលផលក្រោយប្រមូលផលដែលទទួលផលពីគម្រោង CAPFish ក្រោមការអនុវត្តរួមគ្នាដោយ FiA និង UNIDO ក្រោមសហហិរញ្ញប្បទានពីសហភាពអឺរ៉ុប។
កម្មវិធីទស្សនៈនេះ ដឹកនាំនិងសម្របសម្រួលដោយ លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ (MAFF)។ ដំណើរទស្សនកិច្ច ដើម្បីឈ្វេងយល់ ពីគម្រោង CAPFISH-Capture ជំរុញសុវត្ថិ ភាពម្ហូបអាហារនៅកម្ពុជា ធ្វើឡើងនៅរាជធានីភ្នំពេញ ខេត្តកណ្ដាល កំពង់ធំ និងខេត្តសៀមរាប ចាប់ពីថ្ងៃទី១៧ ដល់២០ ខែកញ្ញា ឆ្នាំ២០២៣។
លោកជំទាវ អ៊ឹម រចនា បានមានប្រសាសន៍ថា៖ «នេះគឺជាលើកទី១ហើយដែលក្រសួងកសិកម្ម រួមជាមួយរដ្ឋបាលជលផល និងអង្គការ UNIDO រៀបចំដំណើរទស្សនកិច្ចនេះឡើង។ វត្តមានចូលរួម ពីប្រព័ន្ធផ្សព្វផ្សាយដែលមានអ្នកសារព័ត៌មាន ជួបជុំគ្នាមិនត្រឹមតែនៅក្នុងបន្ទប់នេះទេ យើងនឹងចុះទៅកាន់សហគ្រាសកែច្នៃផលផលិតផលជលផលផ្ទាល់ ដើម្បីស្វែងយល់ឱ្យបានកាន់តែស៊ីជម្រៅអំពីគោលគំនិតគន្លឹៈ ស្តីពីសុវត្ថិភាពម្ហូបអាហារ ការអភិវឌ្ឍអាជីវកម្ម ពិសេសការអនុវត្តសុវត្ថិភាពម្ហូបអាហារនៅតាមបណ្តាសហគ្រាស»។
លោកជំទាវ បានបន្ថែមថា៖ «ខ្ញុំសូមយកឱកាសនេះជាថ្មី អំពាវនាវឱ្យបងប្អូនអ្នកសារព័ត៌មាន ដែលជាតួអង្គផ្សព្វផ្សាយដ៏មានប្រសិទិ្ធភាពបំផុត មេត្តាពាំនាំសារស្តីពីសុវត្ថិភាព ម្ហូបអាហារនេះទៅជូនសារធារណជនឱ្យបានជ្រួតជ្រាបកាន់តែទូលំទូលាយបន្ថែមទៀត។ នេះគឺជាអ្វី ដែលយើងទាំងអស់គ្នាអាចធ្វើបាន និងរួមចំណែក ធ្វើបានក្នុងគោលដៅលើកកម្ពស់ការយល់ដឹងស្តីពីសុវត្ថិភាពម្ហូបអាហារ»។
ដំណើរទស្សនកិច្ចសិក្សា រៀបចំជាពិសេសសម្រាប់ក្រុម អ្នកសារព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ និងស្ថាប័នផ្សេងៗក្នុងមានគោលបំណងជាក់លាក់ដូចខាងក្រោម៖
-ផ្តល់សារអប់រំមួយចំនួនដល់បណ្ដាញសារព័ត៌មានស្តីពីការអភិវឌ្ឍអាជីវកម្ម គោលគំនិតនិងការ អនុវត្ត សុវត្ថិ ភាពម្ហូបអាហារ និងការអភិវឌ្ឍវិស័យឯកជន ។
-ផ្សព្វផ្សាយអំពីភាពជោគជ័យនៃការអនុវត្តរបស់គម្រោងរបស់រដ្ឋបាលជលផល និងអង្គការ UNIDO -បង្ហាញអំពីការអនុវត្តតាមលក្ខខណ្ឌតម្រូវសុវត្ថិភាពម្ហូបអាហារ និងដំណើរការទទួលវិញ្ញាបនប័ត្រ ។
-ផ្សព្វផ្សាយដល់សាធារណជនអំពីសារសំខាន់ៗនិងអត្ថប្រយោជន៍របស់សុវត្ថិភាពម្ហូបអាហារ។
គម្រោង CAPFish សហការផ្ដល់មូលនិធិដោយសហភាពអឺរ៉ុប និងអនុវត្តដោយ រដ្ឋបាលជលផល និងអង្គការ UNIDO ។
មានរយៈពេល ៤ថ្ងៃ និង៣យប់ ប្រតិភូ និងក្រុមការងារសារពត័ត៌មាន នឹងចេញដំណើរពីក្រសួងកសិកម្ម រុក្ខាប្រមាញ់ និងនេសាទ រាជធានីភ្នំពេញបន្ទាប់ពី និងទស្សនកិច្ចសហគ្រាសនៅរាជធានីភ្នំពេញ មុននិងបន្តដំណើរទៅតាមសហគ្រាស តាមបណ្តាខេត្តចំនួន ៣ទៀតដែលរួមមាន៖ ខេត្តកណ្ដាល ខេត្តកំពង់ធំ និងខេត្តសៀមរាប។
កម្មវិធីនេះដែរ នឹងមានសកម្មភាព ច្រើនដែលរួមមានដូចការ ការបណ្តុះបណ្តាលអំពីសុវត្ថិភាពម្ហូបអាហារ សន្និសីទសារព័ត៌មាន ដំណើរទស្សនកិច្ចទៅ សហគ្រាសជលផល ជួបផ្ទាល់ជាមួយម្ចាស់សហគ្រាស ដែលទទួលបានការគាំទ្រពីគម្រោង បទសម្ភាសន៍ជាមួយអ្នកជំនាញ ម្ចាស់អាជីវកម្ម រួមទាំងអ្នកបើប្រាស់។
សូមបញ្ជាក់ថា ដំណើរទស្សនកិច្ចនេះ គឺបង្ហាញអំពីកិច្ចសហប្រតិបត្តិការជិតស្និទ្ធរវាង រដ្ឋាភិបាល ផ្នែកឯក ជន និងប្រព័ន្ធផ្សព្វផ្សាយ ក្នុងការលើកកំពស់ និងផ្សព្វផ្សាយសមិទ្ធិផលរបស់គម្រោង CAPFish ដែលជាកិច្ចសហការណ៍ ល្អរវាងរដ្ឋាភិបាល និង សហភាពអឺរ៉ុប។លើសពីនេះក៏ជួយផ្ដល់នូវព័ត៌មានត្រឹមត្រូវ ច្បាស់លាស់ និងទាន់ពេលវេលា អំពីកិច្ចអន្តរាគមន៏របស់ គម្រោង CAPFish និងជួយបង្កើនទំនាក់ទំនងរវាង ផ្នែកឯកជន និងប្រព័ន្ធផ្សព្វផ្សាយ ។
គូសបញ្ជាក់ថា គម្រោង CAPFish-Capture បានគាំទ្រដល់សហគ្រាសចំនួន២៨ ជាជំនួយបច្ចេកទេស និង សម្ភារបរិក្ខារ ទៅដល់សហគ្រាសនីមួយៗដែលមានតម្លៃចាប់ពី ២៥ ០០០ដុល្លារ ដល់ ១០០ ០០០ដុល្លារអាមេរិក ដើម្បីកែលម្អប្រតិ្តបត្តិការអាជិវកម្ម និងអនុវត្តស្តង់ដារសុវត្ថិភាពម្ហូបអាហារ CQS ។ មកទល់ពេលនេះ សហគ្រាសចំនួន០៨ ទទួលបាន CQS ដែលក្នុងនោះ CQS ពេញលេញ ចំនួន០៤ និង CQS ធម្មតាចំនួន០៤៕