យោងតាមរបាយការណ៍ចេញផ្សាយថ្ងៃទី ១១ ខែមេសា ឆ្នាំ២០២៤ ដោយធនាគារអភិវឌ្ឍន៍អាស៊ី (ADB) បានឱ្យដឹងថា សេដ្ឋកិច្ចកម្ពុជាត្រូវបានព្យាករថា នឹងកើនឡើងក្នុងអត្រា ៥,៨% ក្នុងឆ្នាំ ២០២៤ និង ៦,០% ក្នុងឆ្នាំ ២០២៥។ ការព្យាករនេះធ្វើឡើងដោយយោងទៅលើអត្រាកំណើនក្នុងវិស័យកម្មន្តសាល និងការស្ទុះឡើងវិញ នៃវិស័យទេសចរណ៍។
នាយិកាប្រចាំប្រទេសកម្ពុជារបស់ ADB លោកស្រី ច្យុតសាណា វ៉ារម៉ា (Jyotsana Varma) បានពន្យល់ថា «ទោះបី ជាមានបញ្ហាប្រឈមនៃសេដ្ឋកិច្ចពិភពលោកក៏ដោយ ក៏សេដ្ឋកិច្ចកម្ពុជាបានដំណើរការល្អក្នុងឆ្នាំ ២០២៣ ។ យើងរំពឹងថា កំណើនសេដ្ឋកិច្ចនឹងកាន់តែប្រសើរក្នុងឆ្នាំ ២០២៤–២០២៥ ដោយសារវិស័យកាត់ដេរសំលៀកបំពាក់ និងស្បែកជើង និងផលិតផលទេសចរណ៍ (GFT) ទំនងជានឹងមានកំណើនខ្ពស់ ដោយផ្អែកលើសន្ទុះវិជ្ជមាន ដែលបានកើតឡើងក្នុងត្រីមាសចុងក្រោយនៃឆ្នាំ ២០២៣»។
គម្រោងទស្សនវិស័យអភិវឌ្ឍន៍អាស៊ី (Asian Development Outlook ឬ ហៅកាត់ថា ADO) សម្រាប់ ខែមេសា ២០២៤ បានប៉ាន់ប្រមាណថា កំណើនសេដ្ឋកិច្ចកម្ពុជាបានកើន ៥,០% នៅឆ្នាំ ២០២៣ បើប្រៀបធៀបទៅ២០២២។ កំណើននេះ ត្រូវបានជំរុញដោយការស្ទុះឡើងវិញយ៉ាងខ្លាំង នៃវិស័យទេសចរណ៍។ របាយការណ៍នេះ បានព្យាករពីកំណើន ដែលនឹងមានជាបន្តទៀតសម្រាប់សេដ្ឋកិច្ចនៅឆ្នាំ ២០២៤- ២០២៥ ដោយមានការគាំទ្រកាន់តែខ្លាំងពីផលិតកម្មវិស័យកម្មន្តសាលសម្រាប់ការនាំចេញ។
អតិផរណា ជាមធ្យមប្រចាំឆ្នាំដែលមានការថយចុះមក ២,១% នៅក្នុងឆ្នាំ ២០២៣ ដោយសារមានការថយចុះនៃថ្លៃថាមពលអន្តរជាតិ។ ហើយវាត្រូវបានព្យាករថា នឹងបន្តចុះមកនៅក្នុងរង្វង់ ២% ក្នុងរយៈពេល២ឆ្នាំខាងមុខនេះ។
រាជរដ្ឋាភិបាលកម្ពុជាគ្រោងអនុវត្តការគ្រប់គ្រងថវិកា (fiscal consolidation) ជាបណ្ដើរៗចាប់ ពីឆ្នាំ ២០២៤ ដើម្បីស្ដារឡើងវិញនូវទុនបម្រុង ដែលបានស្រកចុះ ដោយសារវិបត្តិជំងឺកូវីដ-១៩។
ទោះជាយ៉ាងណា បញ្ហាប្រឈមដូចជា និន្នាការធ្លាក់ចុះនៃសេដ្ឋកិច្ចសកល កំណើនបំណុលឯកជន ការប្រែប្រួលថ្លៃថាមពល និងការប្រែប្រួលអាកាសធាតុ អាចជះឥទ្ធិពលដល់ទស្សនវិស័យរយៈពេលវែងឆ្ងាយ។
លោកស្រី ច្យុតសាណា វ៉ារម៉ា (Jyotsana Varma) លើកឡើងថា «បញ្ហាប្រឈមទាំងនេះកំពុងបន្ថែមភាពស្មុគស្មាញដល់ទស្សនវិស័យ នៃសេដ្ឋកិច្ចកម្ពុជា។ ទោះជាយ៉ាងនេះក្ដី កម្ពុជានៅតែឈានទៅមុខជាមួយនឹងសុទិដ្ឋិនិយមប្រកបដោយការប្រុងប្រយ័ត្ន»។
របាយការណ៍ខាងលើ ក៏ជាផ្នែកមួយនៃទស្សនទានក្នុងការរៀបចំជាយុទ្ធសាស្ត្រសេដ្ឋកិច្ចរបស់កម្ពុជា ដើម្បីឆ្លងផុតពីបញ្ជី នៃក្រុមប្រទេសអភិវឌ្ឍន៍កម្រិតទាប (Least-Developed Country) របស់អង្គការសហប្រជាជាតិ នៅឆ្នាំ ២០២៧។
គេបានកត់សម្គាល់ថា ការងើបផុតពីក្រុមប្រទេសអភិវឌ្ឍន៍កម្រិតទាប នឹងធ្វើអោយប្រសើរឡើងកិត្យានុភាពរបស់កម្ពុជាលើឆាកអន្តរជាតិ និងភាពទាក់ទាញផ្នែកវិនិយោគរបស់ខ្លួន។ ប៉ុន្តែក្នុងពេលជាមួយគ្នានេះដែរ កម្ពុជាក៏នឹងបង្កើតបញ្ហាប្រឈមមួយចំនួន ដូចជាការថយចុះនៃលទ្ធភាពទទួលបានកម្ចីសម្បទាន និងការអនុគ្រោះផ្នែកពាណិជ្ជកម្មនានា ដល់វិស័យមួយចំនួន ដែលបានរួមចំណែកដល់ការបង្កើតការងារ និងកំណើនសេដ្ឋកិច្ចខ្ពស់។
ADB បានលើកឡើងបន្ថែមថា ដើម្បីធ្វើការផ្លាស់ប្ដូរប្រកបដោយប្រសិទ្ធភាព ប្រទេសកម្ពុជាត្រូវបង្កើនសមាហរណកម្មសេដ្ឋកិច្ចទៅក្នុងពិភពលោក ការធ្វើពិពិធកម្មទីផ្សារ ដោយផ្ដោតលើផលិតផល ដែលមានតម្លៃបន្ថែមខ្ពស់ ការវិនិយោគលើហេដ្ឋារចនាសម្ព័ន្ធប្រកបដោយនិរន្តរភាព ការវិនិយោគលើធនធានមនុស្ស និងពង្រឹងការកៀរគរធនធានវិនិយោគក្នុងស្រុក។