កសិដ្ឋានវារីវប្បកម្ម Cambodia Fresh Farm គឺជាកសិដ្ឋានចិញ្ចឹមត្រីទីឡាព្យា ដែលបានអនុវត្តតាមគោលការណ៍វារីវប្បកម្មល្អ និងចិញ្ចឹមលើផ្ទៃដីចំនួន ៤.៥ហិកតា និងមានស្រះចំនួន២១។ បច្ចុប្បន្ន ផលិតផលដែលក្រុមហ៊ុន ចែកចាយលើទីផ្សារ គឺកែច្នៃផលចេញពីកសិដ្ឋានផ្ទាល់ ដើម្បីធានាគុណ ភាពនិងសុវត្ថិភាពជូនអតិថិជនគោលដៅ សហគ្រាសទិញពូជកូនត្រីពី Smiling Gecko និងទិញចំណីពីអ្នកចែកចាយក្នុងស្រុក។
លោក ចាវ សួស្ដី ម្ចាស់សិប្បកម្ម Cambodia Fresh Farm បានមានប្រសាសន៍ថា៖«ការកែច្នៃសាច់ត្រីទីឡាព្យា នៅកសិដ្ឋាននេះត្រូវបានប្រើប្រាស់បច្ចេកវិទ្យាជប៉ុន ដោយទទួលបាន ជំនួយបច្ចេកទេសពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA)។ សហគ្រាសបច្ចុប្បន្នមានបុគ្គលិកសរុបចំនួន ១៤រូប (ស្រី៤ រូប)។ លើកពីនេះកសិដ្ឋានវារីវប្បកម្ម ក៏មានផែនការសហការជាមួយវាវីវប្បករផ្សេងៗទៀតក្នុងតំបន់ដើម្បី ពង្រីកការនាំចេញ ដោយយកកសិដ្ឋានរបស់ខ្លួនជាស្តង់ដារតម្រូវ»។
ក្នុងនោះដែរក្រុមហ៊ុនមានផលិតផលសំខាន់ៗចំនួ៤ រួមមាន៖
-សាច់ត្រីស្រស់ និងសាច់ត្រីបង្កក៖ សាច់ត្រីទីឡាព្យាស្រស់បង្កកដែលអាចទទួលទានបានភ្លាមៗ និងងាយស្រួលចម្អិន។
-សាច់ត្រីទីឡាព្យាស្ទើរឆ្អិន៖ សាច់ហ្វីឡេត្រីទីឡាព្យា ហាលស្ងួត អាចញ៉ាំបានភ្លាមដោយគ្រាន់តែកំដៅ ។
-ត្រីបំពងណាន់ហ្គុឃីដៃ៖ សាច់ត្រីទីឡាព្យាអត់ស្បែក អត់ឆ្អឹង បំពងស្រួយជាមួយម្សៅនំប៉័ង។ អាចប្រើប្រាស់ជាអាហារសម្រន់ ស្នូលសន វិច បឺហ្គ័រសាច់ ជាដើម។
-ត្រីឆ្អើរ៖ ញ៉ាំបានភ្លាម ត្រីឆ្អើរទីឡាព្យាមានរសជាតិកាន់តែឆ្ងាញ់ដោយបន្ថែមម្រេច គ្រប់មុខ គ្រប់រសជាតិ។
ផលិតផលទាំងនេះមានតម្លៃជាមធ្យមចន្លោះពី ២ដុល្លារ ដល់ ៦,៥០ដុល្លារក្នុងមួយកញ្ចប់ ដែលមានទម្ងន់ចន្លោះពី ១០០ក្រាមទៅ ៣៥០ក្រាម។ ក្រុមហ៊ុនប្រើប្រាស់ត្រីរបស់កសិដ្ឋានផ្ទាល់ដើម្បីផលិត ក្នុងគោលដៅធានាគុណភាព និងសុវត្ថិភាពរបស់ផលិតផល។ អតិថិជនអាចរកជាវផលិត ផលទាំងនេះនៅតាមផ្សារទំនើបចំនួន ១០កន្លែង និងភោជនីយដ្ឋានចំនួន ១០កន្លែងផ្សេងទៀត ខណៈដែលការបញ្ជាទិញកំពុងមានការកើនឡើងផងដែរ។
លោក ចាវ សួស្ដី មានប្រសាសន៍បន្ថែមថា៖«កិច្ចគាំទ្ររបស់គម្រោង CAPFISH នេះដែលខ្ញុំបានទទួលនូវចំណេះដឹងជាច្រើន កាលពីមុនខ្ញុំគ្រាន់តែផលិតធ្វើយ៉ាងណាដើម្បីឲ្យមានគុណភាពល្អ នាំចេញទៅកាន់ភោជនីដ្ឋាន ឬក៏ផ្សារទំនើបធ្មតា ប៉ុន្តែដោយមានការជ្រោមជ្រែងពីសំណាក់រដ្ឋបាលជលផល និងអង្គការ UNIDOធ្វើឲ្យខ្ញុំកាន់តែ យល់ពីសុវត្តិភាពចំណីអាហារ ពិសេសខ្ញុំកំពុងមានក្ដីស្រមៃថានឹងនាំចេញត្រីទីឡាព្យានេះទៅកាន់ទីផ្សារបរទេស»។
លោក ចាវ សួស្ដី បានបន្ថែមថា៖«ចំពោះការនាំចេញគឺជួនកាលវាទាំងមូលគឺវាធម្មតាដូចតែគេ ដូចនេះកសិដ្ឋានរបស់ខ្លោកត្រូវកែច្នៃចេញជាបន្ទះសាច់មានស្បែក ឬអត់ស្បែក និងម្ស៉ៅ ទើបាននាំចេញ។ លោកបានដាក់ក្ដីសង្ឃឹម១០០% សម្រាប់នៅឆ្នាំ២០២៤ខាងមុខនេះ នឹងអាចនាំចេញសាច់ត្រីទីឡាព្យាទៅកាន់ទីផ្សារអ៊ឺរ៉ុបបាន ដោយសារលោកបានដើរតាមការណែនាំរបស់អង្គការ UNIDO និងមានការបង្រៀនបន្ថែមពីរដ្ឋបាលជលផល ក្រោមការគ្រប់គ្រង់បានយ៉ាងច្បាស់លស់ពីក្រសួងកសិកម្ម រុក្ខាប្រមាញ់ និងនេសាទ»។
សូមបញ្ជាក់ថា ក្នុងចំណោមសហគ្រាសទាំង ២៨ ដែលគាំទ្រដោយកម្មវិធីគាំទ្រសហគ្រាសជលផលខ្នាតតូចនិងមធ្យម (VCIS) មានតែសហគ្រាសនេះមួយទេដែលពុំបានរៀបចំគម្រោងសំណេ អាជីវកម្ម ហើយសុំការគាំទ្រតែផ្នែកបច្ចេកទេស ។ បច្ចុប្បន្នកំពុងរៀបចំពាក្យស្នើសុំសម្ភារ បរិក្ខាបន្ថែមសម្រាប់បំពេញតាមលក្ខខណ្ឌ័តម្រូវស្តង់ដារ ប្រទេសជប៉ុន ។
តាមរយៈកិច្ចគាំទ្រពីគម្រោង CAPFISH សហគ្រាស Cambodia Fresh Farm រំពឹងថានឹងទទួលបានវិញ្ញាបនប័ត្រ HACCP និងពង្រីកចំណែក ទីផ្សារក្នុងស្រុក អាចនាំចេញផលិតផលទៅកាន់ទីផ្សារប្រទេសជប៉ុន និងសហភាពអឺរ៉ុប ក៏ដូចជាទីផ្សារក្រៅស្រុកផ្សេងទៀត។ គម្រូល្អរបស់ Cambodia Fresh Farm លើកទឹកចិត្តនិងផ្ដល់អត្ថប្រយោជន៍ឱ្យកសិដ្ឋានវារីវប្បកម្មជិតខាងទទួលយកនិងជំរុញការអនុវត្តអនាម័យល្អ។
ក្រុមហ៊ុន Rainbow Progress Enterprises Co., Ltd បានបង្កើតកសិដ្ឋានវារីវប្បកម្ម ដែលមានឈ្មោះថា Cambodia Fresh Farm នៅឆ្នាំ ២០១៧។ កសិដ្ឋានវារីវប្បកម្ម មានទីតាំងស្ថិតនៅក្នុងស្រុកពញាឭ ខេត្តកណ្ដាល វាជាទីកន្លែងចិញ្ចឹមត្រី ទីឡាព្យាសម្រាប់យកសាច់ បរិមាណនៃការលក់ក្នុង ១ខែ មានទំហំត្រីទីឡាព្យាស្រស់ពី៤០០-៥០០ សម្រាប់ផ្គត់ផ្គង់ ចូលទីផ្សារទំនើប ភោជនីយដ្ឋាន និងនាំចេញទៅកាន់ទីផ្សារអន្តរជាតិ។ សម្រាប់ព័ត៌មានទំនាក់ទំនងCambodia Fresh Farm ៖ លោក ចាវ សួស្តី លេខទំនាក់ទំនង៖ ០៧៦ ៣៣ ៧៧៧៧៣/០៨៨ ៣៣៧៧៧៧៣៕
