យោងតាមការប្រកាសរបស់ផេកហ្វេសប៊ុក Universe Pageant , Cambodia International Models និង Missosology Cambodia ដែលជាផេកគាំទ្រនិងជួយផ្សព្វផ្សាយវេទិកាប្រកួតស្រីស្អាតរបស់ប្រទេសកម្ពុជាបានចេញមកប្រកាសឱ្យដឹងថា អតីតតួឯកស្រីសាច់សខ្ចីស្អាត ពីបទចម្រៀងល្បីរបស់លោក កែវ វាសនា «ស្រីក្បត់ចិត្តហ៊ា» នឹងចូលរួមជាបេក្ខភាពមួយរូបក្នុងការប្រកួតកញ្ញាឯកចក្រវាឡកម្ពុជាឆ្នាំ២០២១នេះ។
តួឯកស្រីបទចម្រៀងល្បី «ស្រីក្បត់ចិត្តហ៊ា» របស់លោក កែវ វាសនា និង «ហ៊ាចេះតែចោទ» របស់កញ្ញា លីនដា មានឈ្មោះពិត ពេជ្រ សុវណ្ណវិជ្ជរ៉ា បច្ចុប្បន្នមានអាយុ ២៤ឆ្នាំ មានកម្ពុជា ១.៦៨ ម៉ែត្រ ជានិស្សិតឆ្នាំទី២ សិក្សានៅសកលវិទ្យាល័័យ National University of Management (NUM) ផ្នែក Business។ កញ្ញា សុវណ្ណវិជ្ជរ៉ា មិនត្រឹមតែមានមុខមាត់ស្អាតប៉ុណ្ណោះទេ តែកញ្ញាមានសមត្ថភាពអាចប្រើប្រាស់ភាសាអង់គ្លេសបានយ៉ាងល្អ ជាពិសេសកញ្ញាធ្លាប់ជាបវរកញ្ញាឯកទេសចរណ៍ឆ្នាំ២០០៨ ផងដែរ។ សម្រាប់អ្នកដែលចាប់អារម្មណ៍និងពេញចិត្តចង់តាមដានកញ្ញាអាចចូលទៅ Add Friend ជាមួយកញ្ញាឬទៅតាម Follow កញ្ញា តាមរយៈ FB ដែលមានឈ្មោះថា Moon Queenie ។
បើតាមការឆ្លើយតបរបស់ ពេជ្រ សុវណ្ណវិជ្ជរ៉ា តាមរយៈសារអេឡិចត្រូនិច ប្អូនស្រីមានបំណងចង់ប្រកួតកម្មវិធី Miss Universe Cambodia នេះជាយូរណាស់មកហើយប៉ុន្តែដោយកន្លងៗមកប្អូនស្រីជាប់បំពេញកិច្ចការងារនិងរៀនផងម្យ៉ាងមិនទាន់បានត្រៀុមលក្ខណៈបានគ្រប់គ្រាន់ផង។
រហូតឈានមកដល់ឆ្នាំ២០២១នេះ ប្អូនស្រី បានត្រៀមលក្ខណៈរួចរាល់ទាំងទៅលើការហ្វឹកហាត់ដើរ ការឆ្លើយសំនួរ Q&A ធ្វើឱ្យប្អូនមានជំនឿចិត្តថាប្អូនបានត្រៀមលក្ខណៈគ្រប់គ្រាន់ហើយដើម្បីចូលរួមប្រកួតក្នុងវេទិកាមួយនេះ។ ប្អូនស្រីបានឱ្យដឹងបន្ថែមដែរថាការដែលប្អូនចូលរួមប្រកួតគឺមានការលើកទឹកចិត្តពីអ្នកម្ដាយនិងប្អូនស្រី ម្យ៉ាងវិញទៀតប្អូនស្រីក៏ចង់យកឱកាសនេះបើសិនជាប្អូនបានជាប់ជាកញ្ញាឯកចក្រវាឡ ប្អូននឹងមានឱកាសបាននាំយកសិល្បៈ វប្បធម៌ របស់ព្រះរាជាណាចក្រកម្ពុជាទៅបង្អួតខ្សែភ្នែកពិភពលោក ដើម្បីឱ្យបរទេសដឹងថាកម្ពុជាមាន វប្បធម៌ អារ្យធម៌ខ្ពង់ខ្ពស់មិនចាញ់បណ្ដាប្រទេសក្នុងតំបន់អាស៊ានជាមួយគ្នានោះឡើយ។
ថ្វីត្បិតតែបេក្ខនារីដែលចូលរួមប្រកួតកញ្ញាឯកចក្រវាឡ (MUC 2021) សុទ្ធតែមានសមត្ថភាពខ្លាំងពូកែ និងមានរូបសម្រស់ស្អាតៗ ប៉ុន្តែយុវតីដ៏ស្រស់សោភារូបនេះមិនបានបង្ហាញពីការព្រួយបារម្ភណាមួយឡើយព្រោះប្អូនស្រីមានភាពជឿជាក់យ៉ាងមុតមាំទៅលើសមត្ថភាពនិងការខិតខំប្រឹងប្រែងហ្វឹកហាត់របស់ប្អូនមួយរយៈកន្លងមកនេះ។
ចាំមើលតើបេក្ខនារីដែលមានដើមកំណើតនៅទីក្រុងភ្នំពេញរូបនេះអាចនឹងសម្រេចក្ដីប្រាថ្នាក្ដាប់បានតំណែងជាកញ្ញាឯកចក្រវាឡឆ្នាំ២០២១ របស់ព្រះរាជាណាចក្រកម្ពុជា ចេញទៅប្រកួតតំណាងជាតិនៅទឹកដីនៃប្រទេសអ៊ីស្រាអែលបានឬក៏អត់? សម្រាប់អ្នកដែលស្រលាញ់និងពេញចិត្តអាចលើកទឹកចិត្តតាមរយៈ Comment Like និង Share រូបប្អូនស្រីឱ្យបានច្រើនដើម្បីបង្ហាញពីការគាំទ្រដល់ប្អូនស្រី៕