សិល្បៈជាតិ៖ កាលពីពេលថ្មីៗនេះ ប្រិយមិត្តអ្នកគាំទ្របានដឹងហើយថា លោកជំទាវ ឧកញ៉ា ទ្រី ដាណា បានចេញមកទម្លាយរឿងដែលអ្នកនាងបានចាយលុយជិត១០ម៉ឺនដុល្លារជួយយិតយោង ប៊ុត សីហា ដែលជាមនុស្សមានសមត្ថភាពផ្នែកចម្រៀងមួយរូប ប៉ុន្តែគួរឱ្យស្ដាយ ជាលទ្ធផលទីបំផុតប៊ុត សីហា មិនកែចរិត ធ្វើឱ្យលោកស្រីចាយលុយដោយអសាបង់។ យ៉ាងណាមិញស្ត្រីជាអ្នកជំនួញដ៏លេចធ្លោរូបនេះ បានចេញមកទម្លាយជាបន្តទៀតថាអ្នកនាងចំណាយលុយសុទ្ធ ៥ម៉ឺនដុល្លារដើម្បីទិញឡានមួយគ្រឿង។ តើអ្នកនាងទិញរថយន្តខ្លាញ់គោថ្មីនេះ ចង់កាដូឱ្យអ្នកណា? តើអ្នកណាគឺជាមនុស្សដែលមានសំណាងទទួលបានកាដូនោះ?
នៅក្នុងការបង្ហោះវីដេអូថ្មីមួយកាលពីថ្ងៃទី១៩ ខែកញ្ញា ម្សិលមិញនេះ លោកជំទាវឧកញ៉ា ទ្រី ដាណា អគ្គនាយិកាក្រុមហ៊ុន ដាណា ទ្រី បានធ្វើឱ្យមហាជន ក៏ដូចជាអ្នកគាំទ្ររបស់អ្នកនាងមានការភ្ញាក់ផ្អើលជាខ្លាំងព្រោះក្រៅពីការចែករំលែកពីជីវិតប្រចាំថ្ងៃរបស់ខ្លួនជាមួយនឹងអ្នកគាំទ្រហើយនោះ អ្នកនាង ក៏បានសម្ញែងលុយដុល្លារសុទ្ធចំនួន ៥ដុំ ដែលមានតម្លៃស្នើនឹង៥ម៉ឺនដុល្លារ ថែមទាំងទម្លាយតាមរយៈវីដេអូខ្លីមួយនេះដែរថាអ្នកនាង នឹងយកលុយសុទ្ធចំនួន៥ម៉ឺនដុល្លារទៅទិញរថយន្តថ្មីមួយគ្រឿង។ តាមការបញ្ជាក់ពីអ្នកនាង រថយន្តខ្លាញ់គោ ដែលអ្នកនាងជះលុយទិញនោះ គឺសម្រាប់យកធ្វើការ Surprise នៅក្នុងថ្ងៃទី២៤ ខែកញ្ញា ខាងមុខនេះ ពោលគឺចែករង្វាន់ដល់អ្នកមានសំណាង ជាអតិថិជនដែល ជាគាំទ្រសារ៉ាយសមុទ្រ NNP ដោយក្រៅពីនោះក៏មានរង្វាន់ជាច្រើនមុខផ្សេងៗទៀតផងដែរ។
ក្រោយឃើញមានការសម្ញែងលុយទាំងបាច់ៗ របស់អ្នកនាង ទ្រី ដាណា ហើយនោះគេសង្កេតឃើញថាមានអ្នកពោលសរសើរអ្នកនាងចំពោះទឹកចិត្តល្អ ក៏ប៉ុន្តែក៏មានអ្នកចូលមកតិះទៀនចំពោះអ្នកនាងដូចគ្នាដែរ ដោយមានមតិខ្លះបានលើកឡើងថាអ្នកនាង ចាយតែលុយដុល្លារ ធ្វើឱ្យបាត់លុយខ្មែរនៅលើទីផ្សារ៖ «សូមចាយលុយខ្មែរ។ខ្លះទៅលោកអ្នកមានបាត់លុយខ្មែរទៅណាអស់ហើយ»។
សូមជម្រាបជូនថា អ្នកនាង ទ្រី ដាណា បច្ចុប្បន្នក្រៅពីជាអ្នកជំនួញដ៏ជោគជ័យនិងមមាញឹកហើយនោះ អ្នកក៏កំពុងតែបោះជំហាននៅក្នុងវិស័យសិល្បៈសម្ដែង ដោយអ្នកនាងបានសម្ដែងជាតួឯកស្រីនៅក្នុងភាពយន្តភាគរឿង «តាមចាប់ស្នេហ៍» ចាប់ដៃគូជាមួយនឹងតារាសម្ដែងរូបសង្ហា សេង មង្គល ដែលជា BA ផលិតផលនៅក្នុងក្រុមហ៊ុន ដាណា ទ្រី ផងដែរ៕
