សិល្បៈអន្តរជាតិ៖ ខណៈនេះមិនថារង្គៀកខ្លួនធ្វើអ្វីក៏ត្រូវបានមហាជនចាប់អារម្មណ៍ សម្រាប់តារាសម្ដែងរូបស្រស់ Lady Prang ឬអ្នកទស្សនាភាពយន្តថៃនិយមហៅថាម៉ែយីង ចាន់វ៉ាត ព្រោះបច្ចុប្បន្នរឿងភាគ «Bongha Sari» ភាពយន្តដែលកញ្ញាសម្ដែងជាមួយនឹងកំលោះ Jes កំពុងចាក់បញ្ចាំង ហើយកេរ្តិ៍ឈ្មោះកញ្ញាក៏មានជាប់ពាក់ព័ន្ធនឹងករណីដែលស្នេហា៤ឆ្នាំរវាង Jes និង Vill ដើរដល់ផ្លូវបញ្ចប់ថាជាជនទី៣ផងដែរ។
ថ្វីត្បិតកំលោះ Jes ចេញមកបដិសេធដាច់អហង្កាតាមរយៈបទសម្ភាសន៍ជាមួយនឹងបណ្ដាសារព័ត៌មានផ្សេងៗថាការដែលស្នេហារបស់ខ្លួននិងអតីតសង្សារបែកគ្នា មិនមានពាក់ព័ន្ធនឹងជនទី៣ និងទំនាក់ទំនងខ្លួនជាមួយនឹង Lady Prang ដែលជាដៃគូសម្ដែងជាមួយគ្នាក្ដី។
ថ្មីៗនេះកញ្ញា ប្រាង បានបង្ហោះឃ្លីបវីដេអូឈុតក្រៅឆាកដើម្បីប្រូម៉ូតផ្សព្វផ្សាយភាពយន្តជាមួយនឹងរូបភាពផ្អែមល្ហែមនៅខាងក្រោមទឹកព្រមជាមួយនឹង Caption ថា «ណេះ! យករូបភាពក្រៅឆាកឈុតក្រោមទឹកថ្ងៃនេះមកផ្ញើ @jesjpp #บุหงาส่าหรีep10 ថ្ងៃនេះរឿងល្អមើលអត់» ក្រោយការបង្ហោះនេះធ្វើឱ្យអ្នកដែលចាប់គូនិងចូលតួនាំគ្នារំភើបញាប់ញ័រជាខ្លាំង ប៉ុន្តែអ្នកដែលមិនពេញចិត្តបានចូលមកតិះទៀនថា៖ «ម៉េចមិនប្រកាសថាស្រលាញ់គ្នាតែម្ដងទៅ កុំមកនិយាយថាដើម្បីផ្សព្វផ្សាយរឿង រឿងផ្សេងមិនឃើញប្រូម៉ូតច្រើនដល់ថ្នាក់នេះ» ។
ក្រោយមានការលើកឡើងបែបនេះ អ្នកគាំទ្ររបស់កញ្ញា Prang មិនបណ្ដោយឱ្យរឿងនេះកន្លងហួសនោះទេ ពួកគេបានចេញមកការពារ Idol យ៉ាងច្រើន ដោយបានតបតត្រលប់ទៅវិញថា៖ «ម៉េចថារឿងផ្សេងអត់បង្ហោះផ្សព្វផ្សាយ បង្ហោះមួយគំនរ វគ្គដែលគូជាមួយបងប៉ាន់ ក៏មានអ្នកចាប់គូមិនតិចនោះទេ។ អត់ឃើញឬតាំងចិត្តចាប់កំហុស ពេលគេមានសង្សារក៏គេបង្ហោះរូបឱបជាមួយអ្នកផ្សេង រហូតត្រូវបានចាប់គូ ហើយកើតអី? គេស្រលាញ់គ្នាឬអត់គឺជារឿងរបស់គេ ជីវិតរបស់គេ ត្រលប់ទៅសំរាកវិញទៅ ស្ត្រេសមែន ស្រែកចេញមក»។
យ៉ាងណាមិញមកដល់ពេលនេះរឿងរ៉ាវរវាង Jes និង Vill គឺបានចប់សព្វគ្រប់ហើយ ប៉ុន្តែអ្វីដែលអ្នកគាំទ្រចាំតាមដានគឺមានតែម្យ៉ាងគត់ តើ Jes និង Prang ពិតជាស្ថិតក្នុងដំណាក់កាល In-Love ក្រៅសាច់រឿងដូចការសង្ស័យរបស់អ្នកគាំទ្រមែនឬអត់?