ក្រុមបាល់ទាត់អាស៊ីអឺរ៉ុប អង្គរថាយហ្គឺរ អគ្គីសនីកម្ពុជា ព្រៃវែង សុទ្ធតែរកបានម្នាក់១ពិន្ទុដូចគ្នាក្នុងសប្ដាហ៍ទី១០ នៃពានរង្វាន់លីគកំពូលកម្ពុជា Metfone Cambodian League 2021 នៅល្ងាចថ្ងៃអាទិត្យ ទី២៥ ខែកក្កដា ឆ្នាំ ២០២១។
ក្រុមអាស៊ីអឺរ៉ុប បានប្រកួតស្មើគ្នា ២ទល់២ ជាមួយអង្គរថាយហ្គឺរ លើទីលានកីឡដ្ឋាន AEU Sport Park ខណៈកីឡាករកាម៉េរ៉ូន Abbee Ndjoo និង វ៉ាន់ វីត បានរកគ្រាប់បាល់ឱ្យក្រុមអាស៊ីអឺរ៉ុប ហើយក្រុមអង្គរថាយហ្គឺរ រកគ្រាប់បាល់បានដោយកីឡាករ ឡុង ម៉េងហាវ និងកីឡាករ ប្រេស៊ីល Eliel da Cruz។
ចំណែកក្រុមម្ចាស់ផ្ទះអគ្គីសនីកម្ពុជា វិញបានប្រកួតស្មើគ្នាជាមួយក្រុមខេត្តព្រៃវែង ដោយលទ្ធផល ០ទល់០ លើទីលានអគ្គីសនីកម្ពុជា ម្តុំទួលសង្កែ។
លទ្ធផលសប្ដាហ៍ទី១០ នេះថ្ងៃសៅរ៍ ម្សិលមិញក្រុមសូលទីឡូអង្គរ ស្មើគ្នាជាមួយណាហ្គាវើល ៣-៣ ក្រុមគីរីវង់សុខសែនជ័យ ចាញ់ព្រះខ័នរាជស្វាយរៀង ៦ទល់០ និងក្រុមភ្នំពេញក្រោន ស្មើគ្នាជាមួយវិសាខា ៣ទល់៣។
ចំណែកប្រកួតបន្ទាប់ក្នុងសប្ដាហ៍ទី១០ នេះដែរក្រុម បឹងកេត ត្រូវជូបក្រុមអគ្គស្នងការដ្ឋាននគរបាលជាតិ នៅវេលាម៉ោង៣:៣០នាទីរសៀលលើទីលានកីឡដ្ឋាន Cambodia Airways Stadium នៅថ្ងៃអង្គារ ទី២៧ ខែកក្កដា ឆ្នាំ២០២១៕