សហព័ន្ធកីឡាបាល់ទាត់កម្ពុជា នៅថ្ងៃទិ២៧ ខែកញ្ញានេះ បានបញ្ចេញបញ្ជីឈ្មោះកីឡាករចុងក្រោយ របស់ក្រុមជម្រើសជាតិបាល់ទាត់ក្នុងសាលកម្ពុជា ប្រមូលផ្តុំបោះជំរុំហ្វឹកហាត់នៅប្រទេសថៃ ពីថ្ងៃទី២៨ ខែកញ្ញា ដល់ថ្ងៃទី០៤ ខែតុលា ឆ្នាំ២០២៣ ត្រៀមចូលរួមការប្រកួតពានរង្វាន់ AFC Futsal Asian 2024 វគ្គជម្រុះ នៅប្រទេសអ៊ូសបេគីស្ថាន។
បញ្ជីឈ្មោះកីឡាករចុងក្រោយ របស់ក្រុមជម្រើសជាតិបាល់ទាត់ក្នុងសាលកម្ពុជា ខាងក្រោម៖
ព្រឹត្តិការណ៍ ប្រកួតជើងឯកប្រចាំទ្វីបអាស៊ី AFC Futsal Asian Cup 2024 ធ្វើឆ្នាំនេះដោយក្រុមចូលរួមចំនួន ៣១ ត្រូវចាប់ចូលតាមពូលនីមួយៗ ដើម្បីប្រកួតជម្រុះ ស្វែងរកក្រុមខ្លាំងចំនួន ១៦ឡើងទៅជុំបន្តស្វែងរកជើងឯក។
ក្រុមបាល់ទាត់ហ្វូតសាលជម្រើសជាតិកម្ពុជា ស្ថិតនៅក្នុងពូល G ជាមួយអ៊ូបេគីស្ថាន, អ៊ីរ៉ាក់ និងម៉ាឡេស៊ី ក្នុងការប្រកួតជើងឯកប្រចាំទ្វីបអាស៊ី AFC Futsal Asian Cup 2024។
សម្រាប់ក្រុមកម្ពុជាធ្លាប់បង្ហាញខ្លួនក្នុងព្រឹត្តិការណ៍កម្រិតទ្វីបនេះចំនួន១លើកគឺនៅឆ្នាំ២០០៤ ដែលម៉ាកាវ ជាម្ចាស់ផ្ទះ ដោយកាលនោះកម្ពុជា ស្ថិតក្នុងពូល A ជាមួយអ៊ីរ៉ង់, អ៊ូបេគីស្ថាន,ឥណ្ឌូណេស៊ី និងហុងកុង។ ជាលទ្ធផលកម្ពុជា ឈ្នះហុងកុង ៨-៤ តែចាញ់អ៊ូប៊ែគីស្ថាន ១៣-១ ហើយបន្តចាញ់អ៊ីរ៉ង់ ២៤-១ និងចាញ់ឥណ្ឌូណេស៊ី ៥-២។
ពានរង្វាន់នេះធ្វើឡើងរាល់២ឆ្នាំម្តងគិតចាប់តាំងពីឆ្នាំ១៩៩៩ មកម៉្លេះ ដោយក្រុមជប៉ុន ជាម្ចាស់ជើងឯកឆ្នាំចាស់ក្នុងឆ្នាំ២០២២ ដែលប្រទេសគុយវ៉ែត ជាម្ចាស់ផ្ទះ ស្របពេលដែលក្រុមអ៊ីរ៉ង់ ក្រុមឈ្នះជើងឯកច្រើនជាងគេរហូតដល់ទៅ១២សម័យកាល៕