សិល្បៈជាតិ៖ កាលពីថ្ងៃទី២៦ ខែកញ្ញា ឆ្នាំ២០២៣ នៅក្នុងសហគមអនឡាញក្នុងចង្កោមអ្នកគាំទ្ររឿងភាគ TVB ដែលមានឈ្មោះក្រុមឬ Group ថា TVB Cambodia Fan ClubII បានលើកយកប្រធានបទក្ដៅពាក់ព័ន្ធនឹងករណីហេតុអ្វីបានជាបរទេស ឬចិនហុងកុងទៅថតរឿងនៅប្រទេសថៃ តែមិនមកថតនៅខ្មែរ និងរឿងដែលភ្ញៀវទេសចរណ៍សំរុកទៅលេងប្រទេសជិតខាង តែមិនមកកម្សាន្តនៅប្រទេសខ្មែរជាដើម។
ពិតណាស់មួយរយៈចុងក្រោយនេះមានការជជែកវែកញែកគ្នាច្រើនពាក់ព័ន្ធនឹងករណីភាពយន្តចិនមួយមានចំណងជើងថា «No More Bet» ដែលសាច់រឿងបានលាតត្រដាងពី ការប្រព្រឹត្តិល្បែងស៊ីសងនៅលើអនឡាញន៍ ការបោកប្រាស់តាមប្រព័ន្ធអនឡាញ ដោយមានគ្រប់រូបភាពដូចជា ការជួញដូរមនុស្ស និង ការចាប់ជំរិត ជាដើម។ ដោយសារតែបែបនេះទើបធ្វើឱ្យមានអ្នកលេងបណ្ដាញសង្គមខ្លះសម្ដែងអារម្មណ៍មិនសប្បាយចិត្ត ព្រោះយល់ថាកុនចិនមួយនេះកំពុងតែធ្វើឱ្យកេរ្តិ៍ឈ្មោះនិងកិត្តិយសប្រទេសកម្ពុជាកាន់តែយ៉ាប់យឺន ហើយអាចបង្កឱ្យប៉ះពាល់ដល់វិស័យទេសចរណ៍ថែមទៀត។ យ៉ាងណាមិញបើងាកមកចាប់អារម្មណ៍ក្រុមអ្នកនិយមទស្សនារឿងភាគចិនហុងកុង TVB បានវិភាគនិងបញ្ចេញទស្សនៈចំពោះករណីខាងលើផ្ទុយគ្នា ដោយការលើកឡើងនេះ កើតមានព្រោះតែសាច់រឿង TVB មួយដែលទើបបញ្ចាំងចប់នៅលើឆាណែល Youtube TVB គឺរឿង«ភ្នាក់ងារ POTT បង្ក្រាបបទល្មើស» ក៏មានរំលេចពីតួអង្គចិត្តអាក្រក់២រូប ដែលមានពាក់ព័ន្ធនឹងប្រទេសកម្ពុជាដែរ។
ការលើកឡើងនោះមានសេចក្ដីលម្អិតដូចតទៅ៖ «មិនបាច់ឆ្ងល់ទេថាហេតុអ្វីគេថតនៅថៃ គេមិនថតនៅខ្មែរ ដោយសារតែយើងគេនិយាយពីខ្មែរ2-3មាត់សោះ ប្រតិកម្មកើតទុក្ខមិនសុខចិត្តព្រាត។ បើយើងមើលរឿងចិនហុងកុងជាច្រើន គេនិយាយពីថៃអាក្រក់ៗច្រើនណាស់ ដូចជាតួឧក្រិដ្ឋជន ជួញដូរគ្រឿងញៀន ជួញដូរផ្លូវភេទ ភេរវជនចាប់ជំរិត ធ្វើអន្តោប្រវេសន៍ខុសច្បាប់ និងជាច្រើនទៀត។ល។ ហើយគេទៅថតនៅថៃផ្ទាល់ៗតែម្ដង ប្រជាជនគេច្រើនណាស់ បើគេជេរនិងទើសចឹងមែន ខ្ញុំជឿថាពួកចិនហុងកុងគេមិនសហការផលិតជាមួយថៃទៀតទេ។ តែរឿងភ្ញៀវទេសចរណ៍មកលេងខ្មែរ វាមិនអាស្រ័យទៅលើរឿងគេនិយាយអាក្រក់តែមួយមុខទេ វាអាស្រ័យទៅលើប្រជាជនយើងផ្ទាល់ថាបានផ្សព្វផ្សាយអ្វីខ្លះដែលជួយដល់ប្រទេសជាតិ ដែលធ្វើឱ្យគេមានចំណាប់អារម្មណ៍ចង់មកកម្សាន្ត។ បើគេលេងអាក្រក់ពីយើង ពួកយើងរួមគ្នាផ្សព្វផ្សាយអរិយធម៌ វប្បធម៌ កន្លែងទេសចរណ៍ឲ្យបានកាន់តែច្រើន រាជរដ្ឋាភិបាលពង្រឹងឲ្យប្រទេសមានសន្តិភាពកាន់តែល្អដើម្បីឲ្យពិភពលោកមើលឃើញថាយើងមិនអាក្រក់ដូចគេថាទេ។ ប្រជាជនប្រទេសណាក៏មានល្អមានអាក្រក់ដែរ។ យើងកុំតូចចិត្តពេលគេនិយាយអាក្រក់ពីយើង យើងត្រូវគិតថាធ្វើបែបណាទើបឲ្យប្រទេសយើងល្អ ឲ្យមានគេស្គាល់កាន់តែច្រើនឡើង។ ឧបមាថា មានគេលេងអាក្រក់ពីខ្មែរ ដូច្នេះគេ search មើលហើយថា ប្រទេសខ្មែរចឹងដូចគេថាអត់? បើវាជារឿងពិត យើងត្រូវតែពង្រឹងឡើងវិញ តែវាជារឿងប្រឌិតយើងត្រូវតែធ្វើឱ្យកាន់តែល្អ។ ហើយយើងជាប្រជាពលរដ្ឋត្រូវតែជួយគ្នាផ្សព្វផ្សាយចំណុចល្អៗពីប្រទេសជាតិឱ្យកាន់តែច្រើន មិនថាផ្សព្វផ្សាយតាមទម្រង់បែបណានោះទេ។ ចាសសូមអរគុណ វាគ្រាន់តែជាការគិតរបស់ខ្ញុំប៉ុណ្ណោះ ហើយខមិនពិចារណាតាមការគួរ»
អ្វីដែលជាការលើកឡើងនេះ ត្រូវបានអ្នកស្ថិតនៅក្នុងក្រុមជាមួយគ្នាយល់ស្របទាំងស្រុង ដោយភាគច្រើនមតិមានទំនោរដាក់បន្ទុកចំពោះ ក្រសួងនិងស្ថាប័នពាក់ព័ន្ធដូចជាការលើកឡើងរបស់អ្នកលេងបណ្ដាញសង្គមរូបនេះ៖ «បញ្ហាផ្សេងទៀតគឺធ្លាប់ឭគេថាពេលបរទេសចង់មកថតម្តងៗត្រូវរត់ការឯកសារច្រើនមធ្យមទេ ងំមានលើតុក្រោមតុឆ្វេងស្តាំមុខក្រោយរញ៉េរញ៉ៃច្រើនណាស់រីឯតំលៃ កន្លែងដេក ម្ហូបអាហាររបស់របរផ្សេងៗវិញគឺយើងដឹងស្រាប់ហើយខ្មែរគ្នាឯង នៅលក់កាប់មិនដាក់ទឹក ចុះទំរាំសាសន៍គេទៀត។ មិនដូចអ្នកជិតខាងយើងទេគេចេះចុះតំលៃហើយសេវាកម្មគេល្អរាក់ទាក់។ល។» ខណៈដែលមានអ្នកចូលមកឆ្លើយឆ្លងចំពោះការលើកឡើងនេះដែរថា៖ ប្រទេសគេ បើបានជនបរទេសមកថតរឿងគេបញ្ចុះតម្លៃឱ្យទៀតន៎ តែខ្មែរវិញ កោ សាហាវតែខ្មែរគ្នាឯងនៅកោ»
មែនទែនទៅការលើកឡើងជាមតិ យោបល់ ឬវិភាគ ទាំងអស់ដែលក្រុមអ្នកគាំទ្រភាពយន្ត TVB បានលើកឡើងមកនេះ សុទ្ធតែមានគោលបំណង និងចេតនារួមតែមួយគត់គឺចង់ចូលរួមកែលម្អ សំដៅធ្វើយ៉ាងណាឱ្យប្រទេសកម្ពុជា ដើរទាន់ប្រទេសជិតខាង ជាពិសេសគឺតម្កល់ផលប្រយោជន៍រួម ជូនជាតិនិងប្រជាពលរដ្ឋកម្ពុជាឱ្យទទួលបានអត្ថប្រយោជន៍ទាំងអស់គ្នា។
សូមជម្រាបជូនថាសម្រាប់អ្នកដែលនិយមទស្សនាភាពយន្តភាគចិនហុងកុង TVB សម្បូរបែប ឬចង់ទស្សនារឿងភាគ «ភ្នាក់ងារ POTT បង្ក្រាបបទល្មើស» អាចតាមដានទស្សនាបានដោយសេរីមិនមានចំណាយប្រាក់ នៅលើឆាណែល Youtube ដែលមានឈ្មោះថា TVB Cambodia Drama៕
ទស្សនាព័ត៌មានខាងលើនេះទាំងស្រុងខាងក្រោមនេះ៖
