សិល្បៈអន្តរជាតិ៖ យោងតាមការចេញផ្សាយរបស់សារព័ត៌មានវៀតណាម Tuoitre បានដឹងថា កញ្ញា Bui Quynh Hoa (ប៊ុយ គីង ហាវ) គឺជាម្ចាស់មកុដ Miss Universe Vietnam ឆ្នាំ ២០២៣នេះ។ ក្រោយបំពាក់មកុដនៅយប់ថ្ងៃទី ២៩ ខែកញ្ញា កន្លងមកនេះ ក៏ស្រាប់តែកើតមានករណីរិះគន់ព្រោងព្រាតពេញបណ្ដាញសង្គម។
មានអ្នកលេងបណ្ដាញសង្គម និងអ្នកនិយមគាំទ្រវិស័យបវរកញ្ញានៅវៀតណាម ខ្លះគាំទ្រចំពោះសមត្ថភាព និងសម្រស់របស់កញ្ញា Bui Quynh Hoa ប៉ុន្តែមានអ្នកខ្លះទៀតរិះគន់វែកញែកថា ម្ចាស់មកុដឆ្នាំ ២០២៣រូបនេះមិនស័ក្ដសមជាម្ចាស់មកុដឡើយ ព្រោះពួកគេគិតថា នាងមានខ្សែ ហើយការដាក់ពិន្ទុររបស់គណៈកម្មការគ្មានភាពសុក្រិតយុត្តិធម៌។
បញ្ហានេះបានបង្កភាពភ្ញាក់ផ្អើលយ៉ាងដល់ស្ថាប័ន Miss Universe ទើបមេស្ថាប័នស្រីស្អាតចក្រវាលនេះចេញសេចក្ដីថ្លែងការណ៍បន្ទាន់មួយ ដោយរៀបរាប់ថា ៖ «សូមអរគុណចំពោះការព្រួយបារម្ភអំពីការប្រកួតប្រជែងបវរកញ្ញាចក្រវាលវៀតណាមឆ្នាំ 2023 ដែលយើងបានដឹងនិងយកចិត្តទុកដាក់ ។ យើងបានទទួលដំណឹងពីអ្នកហើយ និងកំពុងធ្វើការអង្កេតលើរឿងនេះយ៉ាងលម្អិត។ បញ្ហានេះវាមានសារៈសំខាន់ខ្លាំងណាស់ចំពោះពួកយើង ដើម្បីឱ្យឃើញថា បេក្ខនារីទាំងអស់ត្រូវទទួលបាននូវការវិនិច្ឆ័យយ៉ាងសុក្រិតយុត្តិធម៌ ហើយយើងក៏ទទួលបានការទុកចិត្តពីអ្នកទាំងអស់គ្នា ចំពោះបញ្ហារបស់បេក្ខភាពនីមួយៗដែលបានចូលមកប្រកួត»។
មេស្ថាប័នកំពូលបវរកញ្ញាចក្រវាលបានបន្តថា «យើងកំពុងធ្វើការយ៉ាងជិតស្និទ្ធជាមួយដៃគូទិញសិទ្ធអាជីវកម្មរបស់យើងនៅក្នុងប្រទេសវៀតណាម ដើម្បីរកឱ្យឃើញយ៉ាងពិតប្រាដថា បញ្ហាដូចការរិះគន់នោះកើតឡើងពិតមែនឬអត់ និងធានាឱ្យបានថា គ្រប់ផ្នែកនៃកម្មវិធីប្រកួតបវរញ្ញាចក្រវាលអនុវត្តបាននូវសុចរិតភាពដែរឬទេ។ យើងសូមកោតសរសើរចំពោះការអត់ធ្មត់របស់អ្នក ហើយខណៈនេះដែលយើងនឹងពិនិត្យមើលកាន់តែដិតដល់ចំពោះបញ្ហានេះ។ ក្រុម JKN»។
គួរដឹងបន្ថែមថា កញ្ញា Bui Quynh Hoa កើតនៅឆ្នាំ ១៩៩៨ មកពីទីក្រុងហាណូយ។ មុនពេលក្លាយជាម្ចាស់មកុដបវរកញ្ញាចក្រវាលវៀតណាមឆ្នាំ២០២៣នេះ កញ្ញាក៏ធ្លាប់ជាបេក្ខភាព Top 10 នៅឆ្នាំ ២០២២ផងដែរ។ ហើយនៅឆ្នាំ ២០១៨ កញ្ញាធ្លាប់ឈ្នះបានពានរង្វាន់មាសពីកម្មវិធី Supermodel Vietnam 2018 និងឆ្នាំ ២០១៧ កញ្ញាធ្លាប់ចូលរួមប្រកួតបវរកញ្ញាវៀតណាម Ao Dai World 2017៕