ក្រុមជម្រើសជាតិបាល់ទាត់ក្នុងសាលកម្ពុជា បានចាញ់ក្រុមបាល់ទាត់ហ្វូតសាលជម្រើសជាតិអ៊ូសបេគីស្ថាន ក្នុងលទ្ធផល ៦-១ នៃការប្រកួតពានរង្វាន់ AFC Futsal Asian 2024 វគ្គជម្រុះ ដែលការប្រកួតធ្វើឡើងកាលពីថ្ងៃទី៧ ខែតុលា ឆ្នាំ២០២៣ ទីលាន SAMO SPORTS COMPLEX ក្នុងទីក្រុង Fergana នៅប្រទេសអ៊ូសបេគីស្ថាន។
សម្រាប់ក្រុមបាល់ទាត់ហ្វូតសាលជម្រើសជាតិកម្ពុជា ស្ថិតនៅក្នុងពូល G ជាមួយម្ចាស់ផ្ទះអ៊ូបេគីស្ថាន, អ៊ីរ៉ាក់ និងម៉ាឡេស៊ី ក្នុងការប្រកួតជើងឯកប្រចាំទ្វីបអាស៊ី AFC Futsal Asian Cup 2024 ដែលចាប់ផ្ដើមចាប់ពីថ្ងៃទី៧ ដល់ថ្ងៃទី១១ ខែតុលា ឆ្នាំ២០២៣។
ដោយឡែកសម្រាប់ជំនួនរួមពូលជាមួយកម្ពុជា អ៊ីរ៉ាក់ បានយកឈ្នះម៉ាឡេស៊ី ក្នុងលទ្ធផល ២-១។ កម្មវិធីប្រកួតទី២ របស់ក្រុមបាល់ទាត់ហ្វូតសាលជម្រើសជាតិកម្ពុជា នឹងត្រូវប៉ះ ក្រុមអ៊ីរ៉ាក់៖
- ថ្ងៃទី៩ តុលា៖ កម្ពុជា ប៉ះ អ៊ីរ៉ាក់
- ថ្ងៃទី១១ តុលា៖ ម៉ាឡេស៊ី ប៉ះ កម្ពុជា
ព្រឹត្តិការណ៍ ប្រកួតជើងឯកប្រចាំទ្វីបអាស៊ី AFC Futsal Asian Cup 2024 ឆ្នាំនេះដោយក្រុមចូលរួមចំនួន ៣១ ត្រូវចាប់ចូលតាមពូលនីមួយៗ ដើម្បីប្រកួតជម្រុះ ស្វែងរកក្រុមខ្លាំងចំនួន ១៦ឡើងទៅជុំបន្តស្វែងរកជើងឯក។
ពានរង្វាន់នេះធ្វើឡើងរាល់២ឆ្នាំម្តងគិតចាប់តាំងពីឆ្នាំ១៩៩៩ មកម៉្លេះ ដោយក្រុមជប៉ុន ជាម្ចាស់ជើងឯកឆ្នាំចាស់ក្នុងឆ្នាំ២០២២ ដែលប្រទេសគុយវ៉ែត ជាម្ចាស់ផ្ទះ ស្របពេលដែលក្រុមអ៊ីរ៉ង់ ក្រុមឈ្នះជើងឯកច្រើនជាងគេរហូតដល់ទៅ១២សម័យកាល៕