សិល្បៈជាតិ៖ ថ្មីៗនេះផលិតកម្មផលិតភាពយន្តឈានមុខរបស់កម្ពុជាគឺ វ័នឌើរហ្វីម អេនធើធេនម៉ីន និងផលិតកម្ម អឺរ៉ាយ ភីកឈ័រ បានចុះកិច្ចព្រមព្រៀងសហការគ្នាក្នុងភាពជាដៃគូជាមួយនឹងផលិតកម្ម Tham Studio 19 ដែលជាផលិតកម្មនិងចែកចាយភាពយន្តនៅឯប្រទេសថៃ។
នៅក្នុងពិធីចុះកិច្ចព្រមព្រៀងរវាងផលិតកម្ម វ័នឌើរហ្វីម និង អឺរ៉ាយ ភីកឈ័រ ជាមួយ Tham Studio 19 កាលពីថ្ងៃទី៦ ខែតុលា ឆ្នាំ២០២៣ កន្លងទៅគឺធ្វើឡើងដើម្បីបង្កើតទម្រង់នៃក្របខ័ណ្ឌកិច្ចព្រមព្រៀងផ្លូវការ ជាកិច្ចព្រមព្រៀងរវាងភាគី ដើម្បីធ្វើការរួមគ្នាក្នុងលក្ខណៈដែលលើកកម្ពស់បរិយាកាសនៃកិច្ចសហប្រតិបត្តិការពិតប្រាកដសម្រាប់ប្រសិទ្ធភាព ភាពជាដៃគូប្រកបដោយប្រសិទ្ធភាព និងអត្ថន័យនៃភាពជាអ្នកដឹកនាំ ដើម្បីការពារ និងនិរន្តរភាព និងកិច្ចសន្ទនាប្រកបដោយជំនាញក្នុងការផលិត និងចែកចាយភាពយន្ត។ ការផ្លាស់ប្តូរវប្បធម៌មិនរើសអើងលើគ្រប់បញ្ហាដែលទាក់ទងនឹងគម្រោងផ្សេងៗ ដើម្បីពង្រីកឱ្យកាន់តែទូលំទូលាយនៅក្នុងទីផ្សារក្នុងស្រុក និងអន្តរជាតិ។
ជាលទ្ធផលនៃកិច្ចសហប្រតិបត្តិការគ្នានេះ សម្រចបានជាសមិទ្ធិផលពីរគឺនាំយកខ្សែភាពយន្តខ្មែររបស់ ផលិតកម្ម វ័នឌើរហ្វីម អេនធើធេនម៉ីន គឺរឿង «កំណើតអរូប|TheRITUAL:BLACKNUN» ជាប្រភេទភាពយន្តរន្ធត់ដែលទទួលបានការគាំទ្រយ៉ាងខ្លាំងក្លាពីសំណាក់ប្រជាជនកម្ពុជា ដោយភាពយន្តនេះគ្រោងនឹងបង្ហាញខ្លួននៅប្រទេសឡាវ នៅថ្ងៃទី១៩ ខែតុលា ឆ្នាំ២០២៣ និងប្រទេសថៃ នៅថ្ងៃទី៣០ ខែវិច្ឆិកា ឆ្នាំ២០២៣ ខាងមុខនេះ។ ជាមួយគ្នានេះដែរ វ័នឌើរហ្វីម ក៏គ្រោងនាំយកភាពយន្ត «កុំដេក /Don’tSleep» ទៅចាក់បញ្ចាំងនៅដើមឆ្នាំ២០២៤។
តាមរយៈការចាប់ដៃគូសហការគ្នានៅពេលនេះ យើងសង្ឃឹមថា យើងនឹងបន្តសហការគ្នាឱ្យកាន់តែខ្លាំងក្នុងការចែកចាយភាពយន្តខ្មែរឱ្យបានកាន់តែទូលំទូលាយ និងអភិវឌ្ឍន៍គម្រោងផលិតភាពយន្តរួមគ្នានាពេលអនាគតបន្តទៅមុខទៀត។
ផលិតកម្មរបស់កម្ពុជាខាងលើនេះបានចាត់ទុកថាការចាប់ដៃសហការជាមួយនឹងផលិតកម្មថៃគឺជាជំហានថ្មីមួយទៀត សម្រាប់ផលិតកម្មខ្លួនដែលតែងតែប្រកាន់ខ្ជាប់ទស្សនៈ និងចក្ខុវិស័យ ក្នុងការនាំយកភាពយន្តខ្មែរឆ្ពោះទៅកាន់ទីផ្សារអន្តរជាតិ ក៏ដូចជាការនាំយកនូវភាពទំនើបនៃភាពយន្តពីអន្តរជាតិមកជួយជំរុញឧស្សហកម្មភាពយន្តខ្មែរឱ្យកាន់តែរីកចម្រើនទៅមុខ។
ជាមួយនឹងទស្សនៈវិស័យដ៏វែងឆ្ងាយនេះហើយ ទើប វ័នឌើរហ្វីម នៅក្រាញ់នរនាលក្នុងវិស័យភាពយន្តខ្មែរ ទោះអំឡុងពេលដ៏ពិបាកនៃការរាតត្បាតជំងឺកូវីដ១៩នៅលើសកលលោក ក៏ វ័នឌើរហ្វីម នៅតែរិះរកគ្រប់មធ្យោបាយដើម្បីផលិតភាពយន្តឱ្យមានគុណភាព ត្រៀមវាយលុកចូលទីផ្សារអន្តរជាតិ ដូចមានសមិទ្ធផលខាងលើនេះជាភស្ដុតាងស្រាប់៕
សូមទស្សនា Trailer ខាងក្រោមនេះ៖
