សមាគមបាល់ទះវិសាខា បានប្រកាសថាកីឡាករ គួន ម៉ុម នឹងផ្ទេរទៅចូលរួមជាមួយក្លិបបាល់ទះ Long An នៅប្រទេសវៀតណាម (ក្នុងលក្ខខណ្ឌខ្ចីជើង) កាលពីថ្ងៃអាទិត្យ ទី១៥ ខែតុលា ឆ្នាំ២០២៣។
ដូច្នេះ គួន ម៉ុម គឺជាកីឡាករខ្មែរទី២ បន្ទាប់ពី វឿន វាសនា ផ្លាស់ទៅចូលរួមក្លិបបាល់ទះ Lavie Long សមាជិកលីគកំពូលបាល់ទះរបស់ប្រទេសវៀតណាម ជាមួយតម្លៃខ្លួន២ម៉ឺនដុល្លារ ក្លាយជាកីឡាករបាល់ទះខ្មែរដែលមានតម្លៃខ្លួនថ្លៃជាងគេ។
គួន ម៉ុម វ័យ២៥ឆ្នាំ ជាកីឡាករដែលមានបទពិសោធន៍ខ្លាំងរបស់កម្ពុជា ដោយរូបគេធ្លាប់បានចេញទៅប្រកបអាជីពនៅប្រទេសឥណ្ឌូណេស៊ី នៅឆ្នាំ២០២០កន្លងទៅជាមួយក្រុម Garuda Jakarta ក្នុងរដ្ឋធានីហ្សាកាតា។ យ៉ាងណាក្ដីកីឡាករូបនេះដុះចេញពីក្រុមបាល់ទះក្រសួងមហាផ្ទៃចន្លោះឆ្នាំ២០១៥ ដល់២០១៨ មុនផ្ទេរចូលរួមជាមួយក្រុមវិសាខា ពីឆ្នាំ២០១៨ ដល់២០១៩។
ត្រឡប់មកពីឥណ្ឌូណេស៊ី វិញ គួន ម៉ុម ដែលមានស្រុកកំណើតនៅខេត្តតាកែវ បានបន្តចូលរួមជាមួយក្រុមវិសាខា វិញ រហូតដល់ពេលនេះទើបគេព្រមចេញទៅបន្តអាជីពនៅក្រៅប្រទេសម្តងទៀត ពោលគឺចូលរួមក្រុម Long An ក្នុងលីគបាល់ទះវៀតណាម ជើងទី២។
គួរដឹងថាពានរង្វាន់បាល់ទះជើងឯកនៃប្រទេសវៀតណាម ផ្នែកបុរសនឹងបន្តប្រកួតជើងទី២ ដោយពូល C មានក្រុម Sanest Khanh Hoa , Thể Công, Hà Tĩnh, Lavie Long An, TP. Hồ Chí Minh ហើយពូល D មាន Biên Phòng, Đà Nẵng, Hà Nội, Ninh Bình LVPB, VLXD Bình Dương។ ការប្រកួតនេះធ្វើឡើងនៅខេត្ត ដាក់ណាង ទាំង២ពូល នៃជុំទី២នេះ។
គួន ម៉ុម កីឡាករមានកម្ពស់១ម៉ែត្រ ៩៨សង់ទីម៉ែត បានជាប់ឈ្មោះក្នុងក្រុមជម្រើសជាតិកម្ពុជា ពីឆ្នាំ២០១៩ ដល់បច្ចុប្បន្ន ស្របពេលដែលគេក៏ជាតួរសំខាន់ជួយឱ្យបាល់ទះបុរសក្នុងសាលរបស់កម្ពុជា ឈ្នះមេដាយសំរឹទ្ធិ ព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម និងមេដាយប្រាក់ស៊ីហ្គេម លើកទី៣២ ក្នុងរាជធានីភ្នំពេញ កាលពីពេលថ្មីៗ។
ស្របពេលកីឡាករ វឿន វាសនា សមាជិកក្រុមបាល់ទះជម្រើសជាតិកម្ពុជា និងសមាគមបាល់ទះវិសាខា បានផ្លាស់ទៅចូលរួមក្លិបថ្មី Win Streak នៅតៃវ៉ាន់ កាលពីថ្ងៃអាទិត្យ ទី៨ ខែតុលា ឆ្នាំ២០២៣ កន្លងទៅ ពាក់អាវលេខ៩។
ខណ: វឿន វាសនា ជួយឱ្យ Win Streak ឈ្នះ២ប្រកួតជាប់ៗគ្នា៖
ប្រកួទី១ ក្លិប Win Streak បានយកឈ្នះក្រុម Pingtung Taipower ក្នុងលទ្ធផល ៣សិតទល់២ (20-25, 25-22, 23-25, 25-21, 15-10) កាលពីយប់ថ្ងៃទី១៤ ខែតុលា ឆ្នាំ២០២៣។
ប្រកួតទី២ ក្លិប Win Streak សមាជិកលីគបាល់ទះនៅតៃវ៉ាន់ (Enterprise Volleyball League) របស់ វឿន វាសនា បានបន្តយកឈ្នះក្រុម Taoyuan TFMI ក្នុងលទ្ធផល ៣សិតទល់២ (25-21, 22-25, 21-25, 26-24, 10-15)។
មុនចេញដំណើរទៅកោះតៃវ៉ាន់ វឿន វាសនា បានប្រាប់ក្រុមការងារសារព័ត៌មានត្រយង ថា រូបគេបានចុះកុងត្រា២ឆ្នាំជាមួយ ក្រុម Win Streak ជាថ្នូរនឹងថ្លៃនឿយហត់ បើកបូកទាំងប្រាក់ខែ ថ្លៃធ្វើដំណើរ ស្នាក់នៅ ហូបចុក និងអត្ថប្រយោជន៍ផ្សេងទៀតប្រមាណខ្ទង់ម៉ឺនដុល្លារអាមេរិក។
ចំពោះទីផ្សារដោះដូរកីឡាកររបស់ គួន ម៉ុម និង វឿន វាសនា ទៅកាន់ក្លិបវៀតណាម គឺបានឆ្លងកាត់ សហព័ន្ធកីឡាបាល់ទះកម្ពុជា, សហព័ន្ធកីឡាបាល់ទះអាស៊ី ក៏ដូចជាសហព័ន្ធកីឡាបាល់ទះពិភពលោកផងដែរ៕