សព្វថ្ងៃនេះជឿថាមិនមានអ្នកណាមិនស្គាល់ប្រុសស្អាត ទ្រី តារាវុធ នោះឡើយព្រោះបុរសសង្ហាឆក់បេះដូងអ្នកទស្សនារូបនេះបានក្ដោបក្ដាប់តំណែងជាតួឯកប្រុសស្ទើគ្រប់ស្ថានីយទូរទស្សន៍។
រឿងភាគដែលលោក ទ្រី តារាវុធ សម្ដែងមួយចំនួនបានចាក់បន្តកន្ទុយគ្នានៅលើស្ថានីយទូរទស្សន៍ល្បីៗ ធ្វើឱ្យលើកញ្ចក់ទូរទស្សន៍ស្ទើគ្រប់ប៉ុស្ដិ៍មានវត្តមានតួអង្គដែលលោកសម្ដែងដំណាលគ្នាជាច្រើនរឿង ដូចជានៅលើកញ្ចក់ទូរទស្សន៍ហង្សមាស ទូរទស្សន៍បាយ័ន ទូរទស្សន៍ភីអិនអិន ជាដើម។
រឿងភាគដែលពិធីករឆ្នើមកម្មវិធីប្រកួត Miss Universe ឆ្នាំ ២០១៩ និង ២០២០ សម្ដែងជាតួឯកហើយកំពុងបញ្ចាំង រឿងទីមួយបញ្ចាំងនៅទូរទស្សន៍បាយ័ន ក្រមុំមុខពីរ សម្ដែងជាមួយនឹងតួឯកស្រីព្រះកាយច័ន្ទ បញ្ចាំងថ្ងៃច័ន្ទដល់ព្រហស្បត្តិ វេលាម៉ោង៧ ទៅ៨យប់ រឿងទីពីរ Bro ខូចចិត្ត Sastra Film App ចាប់ដៃគូសម្ដែងជាមួយនឹងកញ្ញា ចិនចិន រឿងទីបី កញ្ញាមុខឈើ បញ្ចាំងនៅទូរទស្សន៍ ហង្សមាសHDTV សម្ដែងជាគូជាមួយនឹងកញ្ញា សឹម ស្រីនិច បញ្ចាំងថ្ងៃចន្ទ អង្គារ ពុធ វេលាម៉ោង ៨ទៅ៩យប់ រឿងទី ៤ ខណៈរឿងដែលត្រៀមបញ្ចាំងមាន អូនចុងភៅកំពូលស្នេហ៍ ត្រៀមបញ្ចាំងនៅទូរទស្សន៍ភីអិនអិន និងរឿងទី៥ ១០០%គឺស្រលាញ់ ត្រៀមបញ្ចាំងនៅស្ថានីយទូរទស្សន៍ BayonTV និងរឿង ឯណាខ្មោច ត្រៀមបញ្ចាំងនៅលើ App Angkor DC។
រំលឹកឡើងវិញ ទ្រី តារាវុធ គឺជាម្ចាស់ជ័យលាភី Freshie Boy ឆ្នាំ២០១៦ នៅឆ្នាំ២០១៩ បានចេញទៅប្រកួតនៅប្រទេសមីយ៉ាន់ម៉ា កម្មវិធី Man of the year 2019 ជាប់ក្នុងលំដាប់ Top10 និងឈ្នះពានប្រុសស្អាតញញឹមស្រស់ (Best smiles awards) បុរសសង្ហារូបនេះឈានជើងប្រឡូកក្នុងពិភពសិល្បៈដំបូងតាមរយៈការសម្ដែងភាពយន្តខ្នាតធំរឿង «សសរកន្លោង»៕
