សិល្បៈជាតិ៖ នៅសល់មិនដល់២ថ្ងៃពេញទេ ភាពយន្តខ្នាតធំបែបភ័យរន្ធត់ «កំណើតអរូប» របស់ផលិតកម្ម Wonder Film នឹងត្រូវចាក់បញ្ចាំងជាផ្លូវការនៅរោងភាពយន្តប្រទេសឡាវ ហេតុដូច្នេះហើយលោក សែម វិសាល ដែលជាផលិតករនិងជាចាងហ្វាងផលិតកម្មបានបញ្ចេញសារខ្លី ប្រកបដោយអត្ថន័យ។
ពីរម៉ោងមុននេះ នៅថ្ងៃទី១៧ ខែតុលា ឆ្នាំ២០២៣ ខណៈដែលលោកបានទៅដល់ប្រទេសឡាវ ដើម្បីរង់ចាំការចាក់បញ្ចាំងជាផ្លូវការនៃភាពយន្តខ្មែរដែលជាសមិទ្ធផលរបស់ផលិតកម្មលោកនៅឯទីក្រុង វៀងចន្ទ ប្រទេសឡាវ បុរសដែលបានបូជានិងលះបង់ខ្លួនដើម្បីវិស័យសិល្បៈនិងភាពយន្តរូបនេះបានរំលេចសារដ៏ល្អមួយដែលហាក់ដូចជាដាស់តឿន និងក្រើនរំលឹកដល់ផលិតករទាំងអស់ ឱ្យងាកមករួបរួមសាមគ្គីគ្នាដើម្បីជំរុញ និងអភិវឌ្ឍវិស័យភាពយន្តខ្មែរជាជាង ប្រជែងគ្នាដើម្បីចង់ឈ្នះចាញ់។ នេះគឺជាការលើកឡើងទាំងស្រុងរបស់លោក សែម វិសាល៖ «ក្នុងកាលៈទេសៈណាក៏ដោយ ក្នុងនាមផលិតករភាពយន្តខ្មែរ ត្រូវប្រឹងប្រែងឱ្យអស់ពីលទ្ធភាពដើម្បីពង្រឹងនិងពង្រីកវិសាលភាព ភាពយន្តខ្មែរទៅកាន់ទីផ្សារអន្តរជាតិ ដើម្បីចូលរួមចំណែកអភិវឌ្ឍ ផ្សព្វផ្សាយវិស័យភាពយន្ត តំបន់ទេសចរណ៍ វប្បធម៌ ការអភិវឌ្ឍ៍ និងកេរ្តិ៍ឈ្មោះរបស់ប្រទេសយើង។ ការហែកហួរ ឌឺដង ចង់ឈ្នះចង់ចាញ់ មើលបំណាំគ្នា ការលាបពណ៌គ្នាឯងក្នុងវិស័យ គួរតែត្រូវបានផ្លាស់ប្ដូរទៅជាការចែករំលែក មិត្តភាព ពួតដៃគ្នា សាមគ្គី ទើបជាវប្បធម៌រស់នៅពិតប្រាកដរបស់ជនជាតិយើង។»
គួរដឹងថាស្នាដៃភាពយន្ត «កំណើតអរូប» របស់ផលិតកម្ម wonder film ក្រោមការដឹកនាំដោយលោកចាងហ្វាង សែម វិសាល នឹងត្រូវចាក់បញ្ចាំងនៅរោងភាពយន្តឡាវ ចាប់ពីថ្ងៃទី១៩ ខែតុលា ខាងមុខនេះតទៅហើយ ដូច្នេះសូមកូនខ្មែរទាំងអស់ផ្ញើកម្លាំងចិត្តជូនដល់ផលិតករ ក្រុមការងារផលិត និងតារាសម្ដែងកម្ពុជាឱ្យទទួលបានការគាំទ្រ និងជោគជ័យក្នុងការបញ្ចាំងលើកនេះផងចុះ៕