សិល្បៈអន្តរជាតិ៖ តួឯកស្រីរឿងភាគ «Mask Girl» គឺជាមនុស្សម្នាក់ដែលឈ្លក់វង្វេងនឹងសិល្បៈសាក់លើដងខ្លួន ប៉ុន្តែថ្មីៗនេះស្នាមសាក់លើដងខ្លួននាងស្រាប់តែមើលទៅព្រាលប៉ុណ្ណោះ ដោយមូលហេតុនេះមានដំណើរដើមចមមកពីស្ដាប់តាមសម្ដីម្ដាយ។
ប្រិយមិត្តដែលនិយមទស្សនាភាពយន្តកូរ៉េ ប្រាកដជាមិនរំលងរឿងភាគ «Mask Girl» ដែលជារឿងកំពុងមានការចាប់អារម្មណ៍នៅលើ App Netflix នោះឡើយ ជាពិសេសគឺតួឯកស្រីដ៏ស្រស់ស្អាតដែលសម្ដែងដោយ Nana។
តួឯកស្រីដែលនិយមចូលចិត្តស្នាមសាក់រូបនេះរមែងចែករំលែករូបភាពរបស់ខ្លួនជាមួយនឹងស្នាមសាក់លើដងខ្លួននៅលើបណ្ដាញសង្គម Instagram ជាញឹកញយ ប៉ុន្តែស្រាប់តែថ្មីៗនេះអ្នកគាំទ្រលួចសង្កេតឃើញថាស្នាមសាក់នៅលើដងខ្លួនកញ្ញាស្រាប់តែមើលទៅឃើញព្រាល បើទោះជាមានចាំងនឹងអំពូលភ្លើងក្ដី រហូតធ្វើឱ្យមានអ្នកសង្ស័យថាតើតារាស្រីរូបនេះពិតជាលុបចោលស្នាមសាក់លើដងខ្លួនមែនឬ? ព្រោះតែកន្លងមកតារាស្រីរូបនេះធ្លាប់បានលើកឡើងថា កញ្ញាពិបាកនឹងសម្រេចចិត្តណាស់ បើសិនជាត្រូវលុបចោលស្នាមសាក់ដ៏ស្រស់ស្អាតលើដងខ្លួនរបស់នាង។
តាមដឹងតារាស្រីរូបនេះបានសម្រេចចិត្តលុបចោលស្នាមសាក់លើដងខ្លួន ដោយសារតែអ្នកម្ដាយរបស់នាងបាននិយាយទៅកាន់កូនស្រីថា៖ «ម៉ាក់ចង់ឃើញខ្លួនកូនស្រីរបស់ម៉ាក់ រលោងស្អាតគ្មានរូបសាក់ដូចកាលពីមុន»សម្ដីអស់ទាំងនេះហើយ ជំរុញទឹកចិត្ត Nana ឱ្យព្រមលុបចោលរូបសាក់ដែលខ្លួនស្រលាញ់ចោលដោយគ្មាស្ដាយស្រណោះ។
Nana ឬ Im Jin Ah កើតនៅថ្ងៃទី១៤ ខែកញ្ញា ឆ្នាំ១៩៩១ គឺជាតារាចម្រៀង និងតារាសម្ដែងកូរ៉េខាងត្បូង។ តារាស្រីរូបនេះត្រូវបានអ្នកគាំទ្រស្គាល់យ៉ាងច្បាស់តាមរយៈជាសមាជិកមួយរូបនៃក្រុមចម្រៀង «After School» ដោយក្រោយមកបានបំបែកជាក្រុមតូច Orange Caramel និង After School Red។ សម្រាប់ការសម្ដែង Nana បានសម្ដែងរឿងភាគល្បីៗជាច្រើនដូចជា «Love Weaves Through a Millenium 2015» «The Good Wife 2016» «Kill it 2019» «Justice 2019» និង «Mask Girl 2023»៕