សិល្បៈអន្តរជាតិ៖ អ្នកគាំទ្រផ្ញើក្ដីនឹករលឹកនិងបួងសួងដល់តារាចម្រៀង Pink ក្រោយមានដំណឹងជាបន្តបន្ទាប់ថាតារាចម្រៀងរូបនេះត្រូវបង្ខំចិត្តលុបចោលការប្រគំតន្ត្រីរបស់ខ្លួនដោយសារតែកើតជំងឺចម្លែក។
តារាចម្រៀងវ័យ៤៤ឆ្នាំដែលត្រូវបានអ្នកគាំទ្រស្គាល់ថាគឺជាអ្នកចម្រៀងដែលតែងតែនាំមកនូវផ្ទាំងទស្សនីយភាពនៃការសម្ដែងប្លែកៗមិនស៊ាំគ្នារាល់លើក ដូច្នេះគ្រប់កម្មវិធីរបស់តារាមួយដួងនេះត្រូវបានគេដឹងថាមានអ្នកគាំទ្រច្រើនណាស់អន្ទះសារចង់ចូលរយម។ យ៉ាងណាមិញអ្នកគាំទ្រនៅ Washington (វ៉ាស៊ីនតោន) ប្រហែលជាត្រូវរង់ចាំមួយរយៈធំទៀត ទើបអាចឃើញតារានេះចេញមកច្រៀងនិងលោតរាំឡើងវិញ។
ម្ចាស់បទ «Stupid Girls» បានចែករំលែកលើបណ្ដាញសង្គម Instagram របស់ខ្លួនថាកម្មវិធីចំនួន២របស់ខ្លួនដែលនឹងត្រូវធ្វើឡើងនៅ Tacoma (Washington) នៃការប្រគំតន្ត្រីទេសចរណ៍រដូវក្ដៅឆ្នាំ២០២៣ នឹងត្រូវលុបចោល។ «ខ្ញុំពិតជាសោកស្ដាយណាស់ដែលត្រូវប្រកាសប្រាប់ម្ចាស់សំបុត្រខនសឺត Tacoma ថាកម្មវិធីរបស់យើងនៅថ្ងៃទី១៨ និង១៩ ខែតុលានេះ នឹងត្រូវព្យួរទុកសិន»។ ហើយនេះគឺជាការលើកឡើងរបស់អ្នកម្ដាយកូនពីររូបនេះបន្ថែមទៀត៖ «បញ្ហាសុខភាពតម្រូវឱ្យពួកយើងត្រូវផ្ដោតការយកចិត្តទុកដាក់ជាចាំបាច់។ ខ្ញុំសូមផ្ញើពាក្យសុំទោសជូនចំពោះអ្នកគ្រប់គ្នាដែលធ្វើឱ្យមានអារម្មណ៍មិនស្រណុក។ ខ្ញុំគ្មានអ្វីផ្សេងផ្ញើជូនអ្នកទាំងអស់គ្នាក្រៅពីក្ដីស្រលាញ់និងសូមឱ្យមានសុខភាពល្អគ្រប់គ្នា។»
P!nk មិនបានបញ្ជាក់បន្ថែមលម្អិតពីបញ្ហាជំងឺរបស់ខ្លួននោះឡើយ តែបាននិយាយថាក្រុមការងារ LiveNation កំពុងតែញាប់ដៃញាប់ជើងធ្វើការងារដើម្បីពិនិត្យមើលលើកាលបរិច្ឆេទថ្មីនៃគារប្រគំតន្ត្រីរបស់ខ្លួន៕
ប្រភព៖ Newsner