តារាចម្រៀង Hee Chul បានចូលជាភ្ញៀវកិត្តិយសពិសេស នៅក្នុងកម្មវិធី «Fallen For Korea-International Couple» ដែលបានផ្សាយកាលពីថ្ងៃទី២៨ ខែកក្កដា ឆ្នាំ២០២១ ជាកម្មវិធីបង្ហាញពីជីវិតប្រចាំថ្ងៃរបស់គូស្វាមីភរិយាជនជាតិកូរ៉េដែលមានគូជាជនបរទេស ពាក់ព័ន្ធការលេងហ្គេម។
នៅក្នុងកម្មវិធីដែលបានបង្ហាញពីជីវភាពប្រចាំថ្ងៃរបស់ប្ដីប្រពន្ធមួយគូដែលភរិយាបានបង្ហាញអារម្មណ៍មិនសូវជាស្រណុកចិត្តចំពោះស្វាមីរបស់ខ្លួន ដែលញៀននឹងហ្គេមលេងចាប់តាំងពីព្រឹកទៅ។ ក្នុងវីដេអូនោះដែរភរិយារបស់បុរសកូរ៉េដែលជាស្ត្រីបរទេសបាននិយាយពីអារម្មណ៍ពិតចំពោះស្វាមីដែលញៀននឹងហ្គេម ជាងនោះទៀតរឿងដែល MC និងភ្ញៀវចូលរួមទាំងអស់មានការភ្ញាក់ផ្អើលនោះគឺប្រាក់ដ៏ច្រើនដែលស្វាមីបានប្រើទិញឧបករណ៍លេងហ្គេម។
បន្ថែមលើសពីនោះ Kim Hee Chul បានចាប់ផ្ដើមចែករំលែកពីជីវិតស្នេហារបស់ខ្លួន ដោយបានលើកឡើងថា លោកធ្លាប់បែកគ្នាជាមួយនឹងមិត្តស្រីដោយសារតែលោកញៀននឹងលេងហ្គេមខ្លាំងពេក។ ឆ្លើយតបទៅនឹងរឿងរ៉ាវរបស់ Kim Hee Chul ពិធីករក្នុងកម្មវិធី Kim Won Hee បានផ្ដល់នូវការចែករំលែកចំណេះដឹងថា «មុននឹងចង់រៀបការអ្នកគួរតែឈប់លេងហ្គេមសិន»។
ថ្វីត្បិតតែលោកបានលើកឡើងពីហ្គេមធ្វើឱ្យលោកបែកបាក់ស្នេហ៍ តែលោកមិនបានបញ្ជាក់នោះទេថាជាអតីតមិត្តស្រីរូបណា ដូច្នេះមិត្តស្រីដែលលោកឡើងនោះមិនអាចសន្និដ្ឋានថា ជាកញ្ញា MOMO ក្រុមចម្រៀង «TWICE» នោះទេ។
កម្មវិធីជីវិតពិតគូស្វាមីភរិយាជនជាតិកូរ៉េដែលមានស្វាមីឬភរិយាជាជនជាតិបរទេសដែលនិយាយពីបញ្ហាហ្គេមនេះមានផ្សាយឱ្យអ្នកទស្សនាកាលពីថ្ងៃទី២៨ ខែកក្កដា ឆ្នាំ២០២១ វេលាម៉ោង១១ ម៉ោងនៅប្រទេសកូរ៉េ៕
ប្រភព៖ allkpop