សិល្បៈអន្តរជាតិ៖ យោងតាមការផ្សាយពីគេហទំព័រ SK POP កាលពីពេលថ្មីៗនេះមានការភ្ញាក់ផ្អើលខ្លាំងមួយដោយសារតែគណនីគាំទ្រតារាចម្រៀង Lisa Blackpink នៅលើបណ្ដាញសង្គម ដ៏ពេញនិយមរបស់ចិន Weibo ស្រាប់តែត្រូវបានលុបបាត់ Search រកលែងឃើញ។
គណនីដែលបានបាត់នោះគឺជា Account ផ្លូវការដ៏ធំរបស់ក្រុមអ្នកនិយមគាំទ្រតារាស្រីរូបនេះនៅប្រទេសចិន។ ការបាត់គណនីគាំទ្ររបស់តារាស្រីរូបនេះបង្កឱ្យមានការសង្ស័យថា តើតារារូបនេះត្រូវបានគេបំបិទលែងឱ្យមានទីផ្សារនៅប្រទេសចិនឬក៏យ៉ាងណា?
បើតាមព័ត៌មានចចាមអារ៉ាមចេញពីបណ្ដាក្រុមអ្នកគាំទ្រ ពួកគេបានវិភាគថាការលុបបាត់គណនីគាំទ្រដ៏ធំរបស់តារាស្រីរូបនេះបណ្ដាលមកពីកញ្ញាបានទៅច្រៀងក្នុងកម្មវិធី Crazy Horse នៅក្នុងក្លឹបកម្សាន្តដ៏ពេញនិយមមួយនៅប្រទេសបារាំង។ ខណៈដែល Lisa ក៏កំពុងផ្ទុះដំណឹងស្នេហាជាមួយនឹងកូនប្រុសមហាសេដ្ឋីនៅក្នុងប្រទេសបារាំងផងដែរ។
មិនត្រឹមតែតារាចម្រៀងសញ្ជាតិថៃរូបនេះនោះទេដែលកំពុងជួបនឹងបញ្ហាបាត់គណនី សូម្បីតែតារាស្រី២ដួងទៀត ក៏កំពុងប្រឈមនឹងការបាត់បង់អាជីពរបស់ខ្លួនដែរ ព្រោះមានព័ត៌មានចចាមអារ៉ាមថាអ្នកទាំងពីរនោះគឺ Jenny Zhang និង Angela Baby បានលួចទៅមើលការសម្ដែងរបស់លីហ្សា នៅបារាំង៕