សិល្បៈជាតិ៖ នេះគឺជាប្រវត្តិសាស្ត្រមួយសម្រាប់បេក្ខនារីតំណាងប្រទេសកម្ពុជានៅក្នុងការប្រកួតកម្រិតអន្តរជាតិ Miss International 2023 នៅពេលដែលផេកផ្លូវការរបស់កម្មវិធីនេះបានបញ្ចេញរូបថតនិងបញ្ជីឈ្មោះបេក្ខនារី Top20 ដោយក្នុងនោះកម្ពុជាឈរនៅលេខរៀងទី១៦។
យោងតាមរយៈការចែករំលែកផ្ទាល់ពីផេករបស់កញ្ញា សំណាង អេលីណា Miss International Cambodia ឆ្នាំ២០២៣ បានរៀបរាប់ជាភាសាអង់គ្លេស បានបង្ហាញពីក្ដីរំភើបដែលខ្លួនបានបង្កើតប្រវត្តិសាស្ត្រថ្មីមួយសម្រាប់ជាតិនៅក្នុងកម្មវិធីប្រកួតសម្រស់មួយនេះ ដោយត្រយង សូមបកប្រែមិនផ្លូវការដូចខាងក្រោម
«សួស្ដីប្រជាជនកម្ពុជាជាទីស្រលាញ់! ខ្ញុំពិតជាមានមោទកភាព សូមជម្រាបជូនដំណឹងដល់អ្នកទាំងអស់គ្នាថា ពួកយើងធ្វើបានហើយយើងបានឡើងដល់ Top16 នេះបើយោងតាមការបង្ហោះដោយ MI ដែលបានផ្សាយចេញលទ្ធផលផ្លូវការនៃលំដាប់់ Top20 នៃកម្មវិធី។ នេះគឺជាលើកទីមួយដែលពួកយើងបានឡើងចូលដល់កម្រិត Top ក្នុងកម្មវិធីប្រកួតសម្រស់ដ៏ធំ។ ទីបំផុតយើងបង្កើតប្រវត្តិសាស្ត្របានហើយ។ ថ្វីត្បិតយើងមិនបានឮឈ្មោះប្រទេសយើងត្រូវបានគេហៅនៅលើឆាក ប៉ុន្តែខ្ញុំពិតជារីករាយណាស់ដែលបានឃើញកម្ពុជាយើងឈរនៅកម្រិត Top20 នៃបញ្ជីឈ្មោះ។ លទ្ធផលដ៏ធំនេះមិនអាចសម្រេចទៅបានឡើយបើសិនមិនមានការចូលរួមជួយជ្រោមជ្រែងពីអ្នកទាំងអស់គ្នា។ អ្នកទាំងអស់គ្នាបានឈរជាមួយខ្ញុំយ៉ាងរឹងមាំនៅក្នុងដំណើរការនៃការប្រកួតនេះ។ អ្នកទាំងអស់គ្នាអស្ចារ្យណាស់ ខ្ញុំនឹងចង់ចាំអ្នកគ្រប់គ្នានៅក្នុងបេះដូងជានិច្ច។ ខ្ញុំសង្ឃឹមថាលទ្ធផលនេះនឹងក្លាយជាកម្លាំងចលករសម្រាប់ឱ្យអ្នកដែលតំណាងឱ្យកម្ពុជាក្រោយៗទៀត។ សូមរីករាយចំពោះលទ្ធផលដែលពួកយើងសម្រេចបាននៅទីនេះ។ ខ្ញុំស្រលាញ់អ្នកទាំងអស់គ្នាខ្លាំងបំផុត!»
