តារាចម្រៀងវ័យក្មេងពីរដួងប្រចាំផលិតកម្មហង្សមាស សុខ សុជាតា និង ឡុង លីងគ័ង្គ ដែលត្រូវអាយុ ចាក់វ៉ាក់សាំងការពារជំងឺកូវីដ-១៩ ដែរនោះ បានចេញមកសំពះឱ្យលោកឪពុកអ្នកម្ដាយជូនកូនទៅចាក់វ៉ាក់សាំងឱ្យបានគ្រប់គ្នា។
ខណៈដែលថ្ងៃស្អែកថ្ងៃទី១ ខែសីហា ឆ្នាំ២០២១ គឺជាថ្ងៃដែលរាជរដ្ឋាភិបាលកម្ពុជា ក៏ដូចជាក្រសួងសុខាភិបាល បានប្រកាសឱ្យមាតាបិតា ដែលមានកូនប្រុសស្រី អាយុចាប់ពី ១២ដល់១៨ឆ្នាំ ទៅចាក់វ៉ាក់សាំងបង្ការជំងឺកូវីដ-១៩ ដើម្បីបង្កើនប្រព័ន្ធភាពស៊ាំឱ្យរាងកាយដើម្បីប្រយុទ្ធប្រឆាំង នឹងការចម្លងរីករាលដាលនៃជំងឺដ៏កាចសាហាវមួយនេះ ហ្វេសប៊ុកហ្វេនផេក របស់កុមារា ឡុង លីងគ័ង្គ បានបង្ហោះរូបភាពសំពះជាច្រើនសន្លឹករបស់ ឡុង លីងគ័ង្គជាមួយនឹង សុខ សុជាតា លើកដៃសំពះអមជាមួយសំណេរយ៉ាងទាំងស្រុងយ៉ាងដូច្នេះ៖
«សូមជម្រាប
ជូនដំណឹងដល់បងប្អូនប្រជាពលរដ្ឋដែលជាមាតាបិតា និងអាណាព្យាបាលរបស់កូន ព្រមទាំង កុមារ យុវវ័យទាំងអស់ ដែលមានអាយុ ចាប់ពី១២ឆ្នាំឡេីងដល់ក្រោមអាយុ១៨ឆ្នាំ សូមភ្ជាប់ជាមួយនូវឯកសារពាក់ព័ន្ធសំបុត្រកំណើត ឬអត្តសញ្ញាណប័ណ្ណ ឬលិខិតឆ្លងដែន ឬលិខិតបញ្ជាក់ផ្សេងៗដែលអាចប្រេីប្រាស់សម្រាប់ការចាក់វ៉ាក់សាំង។ សូមមាតាបិតា ឬអាណាព្យាបាលមេត្តានាំកូន ព្រមទាំងកុមារ យុវវ័យដែលមានក្រុមអាយុខាងលេីចូលរួមចាក់វាក់សាំងអោយបានគ្រប់ៗគ្នាដេីម្បីការពាអាយុជីវិត និងដេីម្បីបង្កេីតភាពសាំក្នុងសហគមន៍ ឈានកាត់ផ្តាច់ការចម្លង់ជំងឺកូវីដ១៩ក្នុងប្រទេសរបស់យេីង។ សូមអរគុណ»
រំលឹកឡើងវិញ ឡុង លីងគ័ង្គ បច្ចុប្បន្នមានអាយុ១៣ ឆ្នាំហើយ ចំណែក សុខ សុជាតា ដែលឡើងប្រឡង The Voice Cambodia កាលពីអាយុ១២ ឆ្នាំ មកដល់ឆ្នាំ២០២១ នេះមានអាយុ ១៦ឆ្នាំ ដូច្នេះអាយុអ្នកទាំងពីរគឺស្ថិតក្នុងចន្លោះអាយុដែលត្រូវបានប្រកាសឱ្យទៅចាក់ថ្នាំបង្ការកូវីដ-១៩ ចាប់ពីថ្ងៃទី១ ខែសីហា ស្អែកនេះតទៅ។
