ប៉ុស្ដិ៍ទូរទស្សន៍ ស្រីលង្កា មួយបានធ្វើឱ្យអ្នកគាំទ្រក្រុមចម្រៀង K-Pop ដ៏ល្បីល្បាញ BTS ខឹងសម្បារខ្លាំង ដោយសារតែប៉ុស្តិ៍នេះរមែងតែងតែនិយាយថាក្រុមចម្រៀងបុរសដ៏ល្បីនេះនឹងបង្ហាញវត្តមានលើប៉ុស្តិ៍របស់ខ្លួន ប៉ុន្តែមិនដែលឃើញវត្តមានម្ដងណាមួយឡើយ។
កម្មវិធី «Jathika Rupavahini» កំពុងតែត្រូវអ្នកទស្សនិកជន ពិសេសក្រុមអ្នកគាំទ្រក្រុម BTS ខឹងព្រោះតែប៉ុស្តិ៍មួយនេះចេះតែលើកឡើងរហូតថានឹងធ្វើការអញ្ជើញ BTS មកសម្ភាសន៍ក្នុងកម្មវិធី ដោយពិធីករបានលើកឡើងថាស្ថានីយរបស់ខ្លួននឹងអញ្ជើញក្រុមបុរសដែលមានកេរ្តិ៍ឈ្មោះល្បីល្បាញលំដាប់ពិភពលោក BTS មកកាន់ស្ថានីយរបស់ខ្លួន ប៉ុន្តែជារឿយៗ កម្មវិធីតែងតែលើកហេតុផលដោះសារផ្សេងៗពីមួយសប្ដាហ៍ទៅមួយសប្ដាហ៍ដោយលើកឡើងថា ក្រុម BTS មានតារាងការងារដ៏ណែនដែលធ្វើឱ្យពិបាកនឹងដកឃ្លារួច។
យ៉ាងណាមិញពិធីកររបស់ស្ថានីយនេះបានអះអាងថានៅថ្ងៃទី៣០ ខែកក្កដា ក្រុម BTS នឹងបង្ហាញវត្តមានជាភ្ញៀវកិត្តិយសក៏ដូចជាសម្ដែងបទចម្រៀងរបស់ខ្លួនក្នុងកម្មវិធី ប៉ុន្តែពេលដល់ថ្ងៃពិធីករបានដោះសារដដែលជាដដែលថា ក្រុមនេះមិនអាចមកបានដោយសារមានសមាជិករវល់ ម្យ៉ាងដោយកម្មវិធីចង់អញ្ជើញសមាជិកក្រុមមកទាំងអស់មិនមែនមកម្ដងមួយឬពីរទើប មិនទាន់អាចឱ្យក្រុម BTS ឡើងមកចូលរួមកម្មវិធីបាន។
មកដល់ពេលនេះ អ្នកទស្សនា ពិសេសក្រុមអ្នកគាំទ្រ BTS កំពុងតែខឹងយ៉ាងខ្លាំងដោយគេជឿថាកម្មវិធីទូរទស្សន៍របស់ប្រទេសសិរីលង្កាមួយនេះបានផ្ដល់ព័ត៌មានបោកប្រាស់ដល់អ្នកទស្សនាដើម្បីទាក់ទាញចំណាប់អារម្មណ៍ពិសេសអត្រាទស្សនាពីមួយសប្ដាហ៍ទៅមួយសប្ដាហ៍ ដោយអ្នកទាំងអស់នោះបានបង្ហាញពីភាពក្ដៅក្រហាយរបស់ខ្លួនលើបណ្ដាញសង្គមថាពួកគេពេលនេះបានដឹងហើយថាកម្មវិធីបានបន្ដកុហកប្រជាជនលើប្រព័ន្ធផ្សព្វផ្សាយជាតិជាសាធារណៈ៕
