សិល្បៈជាតិ៖ មួយរយៈហើយដែលអ្នកគាំទ្រអ្នកនាង ទ្រី ដាណា បានចាប់ផ្គូផ្គងអ្នកនាង និងបុរសសង្ហា សេង មង្គល ដែលជា BA ប្រចាំផលិតផលរបស់ក្រុមហ៊ុន N.N.P។ ប៉ុន្តែថ្ងៃនេះអ្នកគាំទ្រកប៉ាល់ ដាណានិងមង្គល ប្រហែលជាត្រូវខកចិត្តខ្លាំង ព្រោះព្រះរាជបុត្រពិតក្នុងបេះដូងរបស់ឧកញ៉ា ទ្រី ដាណា គឺបុរសសង្ហា រស់ រាជ្ជសាល ដោយថ្ងៃនេះ អ្នកទាំងពីរបានដឹកដៃគ្នាចូលរោងជ័យ ក្នុងពិធីភ្ជាប់ពាក្យយ៉ាងគគ្រឹកគគ្រេង ក្រោមសំឡេងអបអរសាទររបស់ចាស់ទុំ មិត្តភក្ដិ និងញាតិមិត្តទាំងសងខាង។
មែនទែនទៅ ការផ្គូផ្គងតារាសម្ដែងរូបសង្ហា សេង មង្គល និងអ្នកនាង ទ្រី ដាណា ព្រោះតែអ្នកជុំវិញខ្លួនមើលឃើញពីភាពស្និតស្នាលរវាងអ្នកកំលោះរូបសង្ហា ដែលជា BA និងម្ចាស់ប្រេន ថែមទាំងឧស្សាហ៍ឃើញវត្តមានលោកមាននៅគ្រប់កម្មវិធីសំខាន់ៗរបស់ក្រុមហ៊ុនអ្នកនាងថែមទៀតផង ខណៈដែលភាពយន្តដំបូងដែលអ្នកនាង ទ្រី ដាណា បានសម្ដែងក្នុងរឿង «តាមចាប់ស្នេហ៍» ក៏មានលោក សេង មង្គល ជាតួឯកប្រុសផងដែរ។
យ៉ាងណាមន្ទិលសង្ស័យនៃទំនាក់ទំនងស្នេហារវាងឧកញ៉ារូបស្រស់និង តួឯកប្រុសដ៏ល្បីប្រចាំប្រទេស បានលាតត្រដាងនៅថ្ងៃទី៩ ខែវិច្ឆិកា ឆ្នាំ២០២៣នេះ នៅពេលដែលអ្នកជំនួញស្ត្រីដ៏ជោគជ័យរូបនេះ បានចូលរោងជ័យភ្ជាប់ពាក្យជាមួយនឹងបុរសវ័យក្មេងដ៏ស្រស់សង្ហាគឺលោក រស់ រាជ្ជសាល។
តាមពិតដើមឈើស្នេហ៍រវាង អ្នកនាង ទ្រី ដាណា និងលោក រស់ រាជ្ជសាល បានដាំបណ្ដុះមួយរយៈកន្លងមកហើយ ប៉ុន្តែ មិនសូវជាមានអ្នកចាប់អារម្មណ៍ រហូតដល់ថ្ងៃអាទិត្យ ទី៥ ខែវិច្ឆិកា ដែលស្នេហាដ៏ផ្អែមល្ហែមនេះកាន់តែច្បាស់លាស់ ថែមទាំងភាគីខាងប្រុស បានចេញមកបង្ហោះរូបភាពផ្អែមល្ហែមរបស់ខ្លួននិងនារីបណ្ដូលចិត្តនៅលើបណ្ដាញសង្គមទាំង ហ្វេសប៊ុក និង Tiktok ហើយទទួលបានការអបអរសាទរយ៉ាងច្រើនកុះករ ពីបណ្ដាមិត្តភក្ដិ និង បងប្អូន សាច់ញាតិគ្រប់ៗគ្នា។
សូមជំរាបជូនថា បុរសដែលជាគូដណ្ដឹងដ៏ស្រស់សង្ហារបស់អ្នកនាង ទ្រី ដាណា មានឈ្មោះពិតថា រស់ រាជ្ជសាល លោកគឺជាមនុស្សម្នាក់ដែលមានសមត្ថភាពនិងដុងសិល្បៈពេញប្រៀប ព្រោះលោកមិនត្រឹមតែជាតារាសម្ដែង – តារាម៉ូដែល ប៉ុណ្ណោះទេ ប៉ុន្តែលោកក៏ជាតារាចម្រៀងដែលមានបទចម្រៀង Original ផ្ទាល់ខ្លួនមានចំណងជើងថា «រាល់ថ្ងៃទុកបងជាអ្វី» បានចេញឱ្យអ្នកនិយមចូលចិត្តស្ដាប់បទចម្រៀងបានស្ដាប់កម្សាន្តកាលពី២ឆ្នាំមុន ពោលគឺឆ្នាំ២០២១។ ដំណឹងដ៏រីករាយនេះ បានធ្វើឱ្យអ្នកដែលស្រលាញ់ និងគាំទ្រអ្នកនាង ទ្រី ដាណា ចូលរួមរំភើបនិងរីករាយ ព្រោះទីបំផុត ស្ត្រីជើងខ្លាំងក្នុងវិស័យជំនួញរូបនេះ រកបានបុរសល្អម្នាក់ដែលចូលខ្លួនមកជួយមើលថែនិងស្អំបេះដូងដែលធ្លាប់ខ្ទេចខ្ទាំរបស់អ្នកនាង ឱ្យត្រលប់មកស្រស់ស្រាយនិងមានជីវិតជីវ៉ាឡើងវិញ។