សិល្បៈអន្តរជាតិ៖ កាលពីពេលថ្មីៗនេះ អតីតតារាសម្ដែងហុងកុង ដែលបច្ចុប្បន្នបានវិវត្តន៍ខ្លួនមកជាអ្នកដឹកនាំរឿងលោក Stephen Fung បានសរសើរដោយចំហរចំពោះភរិយាខ្លួនគឺអ្នកនាង Shu Qi ថាមានភាពឆ្លាតវៃ ពូកែវិនិយោគ និងគ្រប់គ្រងហិរិញ្ញវត្ថុ។
នៅក្នុងឱកាសចូលរួមក្នុងកម្មវិធីសិល្បៈមួយលោក Stephen Fung បានទម្លាយថា ប្ដីប្រពន្ធខ្លួន មានភាពឯករាជ្យផ្នែកហិរញ្ញវត្ថុ ថែមទាំងលើកសរសើរចំពោះភរិយាលោកថា មានជំនាញគ្រប់គ្រងហិរញ្ញវត្ថុបានល្អ និងដឹងពីរបៀបវិនិយោគលើ ផ្នែក ដែលអាចរកប្រាក់ចំណេញបាន បើទោះជាលោកមិន ពូកែគ្រប់គ្រងលុយ និងមិនដឹងអ្វីពីភាគហ៊ុន ឬអចលនទ្រព្យ ហើយលោកមិនបាន វិនិយោគលើវិស័យមួយនេះក្ដី។
សូមរំលឹកឡើងវិញថា តារាសម្តែងស្រី Shu Qi បានរៀបការជាមួយស្វាមីដែលជាតារាសម្ដែងដូចគ្នាគឺ លោក Stephen Fung នៅ ចុងឆ្នាំ ២០១៦ បន្ទាប់ពី បានរាប់អាន និងមើលចិត្តថ្លើមគ្នាជាច្រើនឆ្នាំ។ ក្រោយពី ថ្ងៃរៀបការរួច អ្នកទាំងពីរ ហាក់មាន ភាពមមាញឹកនឹងការងារ ប៉ុន្តែក៏នៅតែអាចឆ្លៀតពេល ដើម្បីពង្រឹងទំនាក់ទំនង និងរក្សាចំណងស្នេហារបស់ខ្លួន ឱ្យនៅតែស្រស់បំព្រងនិងរឹងមាំដដែល៕