សិល្បៈជាតិ៖ អ្នកនិយមលេងបណ្ដាញសង្គម tiktok ភាគច្រើនប្រាកដជាស្គាល់យុវជន Tara Sotaro ដែលជាអ្នកលក់នំ Crepe ជប៉ុនដ៏ល្បីនៅក្នុងខេត្តសៀមរាប។ មិនត្រឹមតែនំគាត់មានរសជាតិឆ្ងាញ់ទើបធ្វើឱ្យគាត់ត្រូវបានអ្នកខេត្តសៀមរាបស្គាល់នោះឡើយ ប៉ុន្តែទង្វើនិងសកម្មភាពដ៏ល្អរបស់គាត់នោះទេ ដែលបានចងចិត្តបងប្អូនអ្នកខេត្តសៀមរាបឱ្យស្រលាញ់និងចូលចិត្ត យុវជនវ័យក្មេងរូបនេះ។
ជារឿយៗ Tara Sotaro ក្រៅពីលក់នំហើយនោះ គេសង្កេតឃើញថាលោកតែងតែធ្វើនំទៅចែកឱ្យក្មេងៗក្រីក្រនៅក្នុងខេត្តសៀមរាបជារឿយៗ។ បើតាមការសម្ភាសន៍ពីផេកមួយមានឈ្មោះថា BPro កាលពីថ្ងៃទី២ ខែវិច្ឆិកា ថ្មីៗនេះ Tara មកប្រទេសកម្ពុជា និងកំពុងរស់នៅខេត្តសៀមរាប ព្រោះគេមានគោលបំណង សង់សាលារៀន និងជីកអណ្ដូងទឹកសម្រាប់បងប្អូនរស់នៅក្នុងសហគមន៍។
ខណៈដែលវីដេអូរបស់ Tara មួយរយៈក្រោយនេះ កំពុងតែធ្វើយុទ្ធនាការរំដោះខេត្តសៀមរាបចេញពីសំរាម ក្នុងនោះក៏មានយុវជននិងបងប្អូនអ្នករស់នៅខេត្តសៀមរាបជាច្រើននាក់បានស្ម័គ្រចិត្តចូលរួមសំអាតទីក្រុងដែលជាគោលដៅទេសចរណ៍ដ៏ទាក់ទាញរបស់ប្រទេសកម្ពុជាមួយនេះផងដែរ។
បងប្អូនអាចចូលរួមជួយកសាងសាលារៀន និងជីកអណ្ដូងទឹក ក៏ដូចជាសកម្មភាពផ្សេងៗជាមួយ Tara តាមរយៈការមិនចោលសំរាម ដោយការទិញនំដែលគាត់លក់បាន ឬទាក់ទងដើម្បីចូលរួមសកម្មភាពជាមួយគាត់តាមតំណភ្ជាប់តេឡេក្រាមនៅលើឆាណែល tiktok របស់គាត់៕
