ក្រុមបាល់ទាត់ជម្រើសជាតិសហរដ្ឋអាមេរិក បានក្លាយជាម្ចាស់ជើងឯកពានរង្វាន់ CONCACAF Gold Cup ជាលើកទី៧ ក្រោយយកឈ្នះលើក្រុមម៉ិចស៊ីកូ ដោយលទ្ធផល ១ទល់០ ក្នុងវគ្គផ្ដាច់ព្រ័ត្រនៅព្រឹកថ្ងៃទី២ ខែសីហា ឆ្នាំ២០២១ លើទីលានកីឡដ្ឋាន Allegiant Stadium ក្នុងទីក្រុង Paradise រដ្ឋ Nevada សហរដ្ឋអាមេរិក។
🇺🇸💥 GOAL! Miles Robinson for the #USMNT to make it 1-0 in extra time!#GoldCup21 🏆 #ThisIsOurs #OurFinal pic.twitter.com/shzoNqUt3w
— Gold Cup (@GoldCup) August 2, 2021
កីឡាករ Miles Gordon Robinson ជាអ្នករកបានគ្រាប់បាល់ក្នុងជ័យជម្នះលើទឹកដីខ្លួនរបស់សហរដ្ឋអាមេរិក នេះនៅនាទីទី១១៨ ពោលគឺក្នុងម៉ោងបន្ថែម១៥នាទី២ដង ខណៈលទ្ធផលនៅម៉ោងប្រកួត៩០នាទីពេញ បានត្រឹមស្មើគ្នា ០ទល់០។ ការប្រកួតនេះក្រោមការកាត់សេចក្ដីពីអាជ្ញាកណ្ដាល Said Martínez ជនជាតិហុងឌុយរ៉ាស់ ក្រោមក្រសែភ្នែកទស្សនិកជនប្រមាណជាង៦ម៉ឺននាក់។
ពានរង្វាន់ 2021 CONCACAF Gold Cup រៀបចំឡើងពីថ្ងៃទី១០ ខែកក្កដា ដល់ថ្ងៃទី១ ខែសីហា ឆ្នាំ២០២១ នៅ១០កីឡដ្ឋាន ក្នុងចំណោម៩ទីក្រុងរបស់សហរដ្ឋអាមេរិក ដោយមានក្រុមចំនួន១៦ចូលរួម បែងចែកជា៤ពូល។ ក្រុមចំណាត់ថ្នាក់លេខ១និងលេខ២ក្នុងពូលមានឈ្មោះឡើងទៅប្រកួតវគ្គ៨ក្រុមចុងក្រោយ និងបន្តជម្រុះរហូតដល់វគ្គផ្ដាច់ព្រ័ត្រ។
ពានរង្វាន់ CONCACAF Gold Cup ជាការប្រកួតជើងឯកដែលមានក្រុមជម្រើសជាតិនៅទ្វីបអាមេរិកខាងជើង (បន្ថែមតំបន់អាមេរិកកណ្ដាល និងតំបន់ការ៉ាប៊ីន) ហើយរៀបចំនៅរាល់២ឆ្នាំម្តង ខណៈក្រុមជម្រើសជាតិម៉ិចស៊ីកូ ជាអ្នកឈ្នះជើងឯកបានច្រើនជាងគេគឺរហូតដល់១១លើកឯណោះ៕
