សិល្បៈជាតិ៖ បុរសសង្ហាល្បីថាជា Boy Pakorn ស្រុកខ្មែរ បានចេញមុខបញ្ជាក់ភាពស្អាតស្អំឱ្យខ្លួនឯងវិញ ក្រោយរងការចោទប្រកាន់ជាប់ឈ្មោះជាចោរអស់ ១ខែ។
ករណីភ្ញាក់ផ្អើលពេញបណ្ដាញសង្គមហ្វេសប៊ុក និង TikTok នាពេលកន្លងដែលល្បីថា ចោរសង្ហាមុខដូច Boy Pakorn នៅស្រុកខ្មែរ គឺលោក ចាន់ តុលា ដែលមានមុខរបរជាជាងជួសជុលទូរស័ព្ទ បានរងការចោទប្រកាន់ថាបានជាប់ពាក់ព័ន្ធជាមួយករណីចោរកម្មដែលជនសង្ស័យជាបក្សពួកបានប្រព្រឹត្តិនៅថ្ងៃទី ១៤ ខែតុលា ឆ្នាំ ២០២៣ នៅវេលាម៉ោង ៤ ទៀបភ្លឺ ស្ថិតនៅចំណុច ភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល ។
ហើយក៏ត្រូវបានមហាជនច្រើនវែកញែកលាន់មាត់ ដោយការហួសចិត្តថា មិនគួរណាមុខមាត់ស្អាតនិងស្លូតបូត បែរជាមកធ្វើរឿងឆក់ប្លន់ និងខ្លះទៀតថា ធ្វើដល់ជាតារា TikTok តែដាច់យ៉ៃបែកគំនិតចង់មានឆាប់ទើបលេងផ្លូវកាត់ ជាដើម។
ក្រោយទទួលបានភាពស្អាតស្អំត្រលប់មកវិញ ពេលនេះលោកបានចេញមកបកស្រាយនិងបញ្ជាក់ការពិតឱ្យគ្រប់គ្នាបានយល់និងដឹងថា លោកមិនបានពាក់ព័ន្ធជាមួយករណីខាងលើនេះឡើយ។ ករណីដែលកើតឡើងរហូតដល់ខ្លួនជាប់សង្ស័យនេះ ក៏ដោយសារតែជនដែលបានលួចទូរស័ព្ទពីជនរងគ្រោះនោះបានយកទូរព័ស្ទមកឱ្យខ្លួនជួសជុលដោះកូដទូរស័ព្ទ ហើយក្នុងនាងមជាជាងជួសជុលបានធ្វើទៅតាមតួនាទីប៉ុណ្ណោះ។
ក្រោយពីបញ្ជាក់ភាពស្អាតស្អំដោយសំអាងថា រឿងគ្រប់យ៉ាងគឺជាការយល់ច្រឡំ លោក ចាន់ តុលា បានអំពាវនាវឱ្យមហាជនឈប់បន្តយល់ច្រឡំចំពោះលោកទៀត។ ក្នុងឱកាសនោះលោក ក៏ឆ្លៀតឱកាស ប្រកាសដែរថា លោកក៏មានបំណងចិត្តចង់ចូលប្រឡូកការសម្ដែងក្នុងវិស័យសិល្បៈឱ្យពេញដៃពេញជើង ព្រោះនេះជាចំណូលចិត្តរបស់លោកដែលមានយូរណាស់មកហើយ ប៉ុន្តែមិនទាន់មានឱកាសល្អហុចឱ្យនៅឡើយ។
សូមជម្រាបថា លោកក៏បានទទូចសុំឱកាសពីផលិករឱ្យខ្លួនបានចូលរួមសម្ដែង បើទោះបីត្រូវចាប់ផ្ដើមពីតួតូចតាចបែបណាក៏ដោយ ព្រោះវាគឺជាសេចក្ដីស្រមៃរបស់ខ្លួន។ តុលា បានបញ្ជាក់ដែរថានេះគឺជាឱកាសមួយល្អសម្រាប់ខ្លួនលោកដើម្បីបានស្ដារប្រជាប្រិយភាព និងកេរ្តិ៍ឈ្មោះដែលញាំញីដោយការយល់ច្រឡំផង និងជាឱកាសដើម្បីស្ដារជីវភាពប្រចាំថ្ងៃផង៕