សិល្បៈជាតិ៖ ម៉ាមី ដ៏មានឥទ្ធិពលរបស់អង្គការ PSE គឺលោកស្រី ម៉ារីហ្វ្រង់ ដេប៉ាលីយែរ ដែលជាសហស្ថាបនិកអង្គការដើម្បីភាពញញឹមនៃកុមារ អាចអាចទាញតារាល្បីលំដាប់ពិភពលោកឱ្យចូលរួមសហការជួយកុមារកម្ពុជារាប់ពាន់នាក់។
បើតាមការបង្ហោះឡើងនៅលើហ្វេសប៊ុកផេកផ្លូវការរបស់អង្គការ ប៉េ អេស អឺ នាពេលថ្មីៗនេះបានឱ្យដឹងថា កាលពីសប្ដាហ៍កន្លង អង្គការបានទទួលស្វាគមន៍ដំណើរមកដល់នៃក្រុមការងារអង្គការដើម្បីភាពញញឹមនៃកុមារសាខាប្រទេសស្វីសរយៈពេលពេញមួយសប្ដាហ៍ក្នុងមណ្ឌលដោយផ្ទាល់។ ហើយក្នុងចំណោមក្រុមការងារប្រទេសស្វីស ក្នុងនោះក៏មានវត្តមាន Chef Marco Brüschweiler ដែលត្រូវជាឪពុករបស់តារាចម្រៀងស្រី Lisa នៃក្រុមចម្រៀង Blackpink បានមកទស្សនាមណ្ឌលដោយផ្ទាល់ ចូលរួមចម្អិនម្ហូបដ៏ឈ្ងុយឆ្ងាញ់ជាមួយសិស្សមកពីសាលាបដិសណ្ឋារកិច្ច និងទេសចរណ៍ ជូនកុមារកម្ពុជារាប់ពាន់នាក់ ព្រមទាំងដំណើរទស្សនកិច្ចទៅកាន់សហគមន៍របស់អង្គការថែមទៀតផង។
តាមរយៈដំណើររបស់ Chef Marco Brüschweiler ដែលត្រូវជាឪពុកបង្កើតរបស់នាង Lisa Lalisa សមាជិកក្រុមចម្រៀង Blackpink មកកាន់កម្ពុជាលើកនេះ តារាចម្រៀងស្រីដើមកំណើតថៃ បានជួយឧបត្ថម្ភដល់អង្គការ PSE ព្រមទាំងផ្ញើសារមកកាន់កុមារទាំងអស់ថា ៖ «ទោះបីជាផែនការ និងសុបិនរបស់អ្នកសម្រាប់អនាគតបែបណាក៏ដោយ ចូរចងចាំថា៖ កុំបោះបង់ឱ្យសោះ ទោះបីជាបញ្ហាតែងតែកើតឡើងក្នុងដំណើរជីវិតអ្នកក៏ដោយ»។
រគត់សម្គាល់ដែរថា តាមរយៈសកម្មភាពមួយនេះ លោកស្រី ម៉ារីហ្វ្រង់ ដេប៉ាលីយែរ ពិតជាស័ក្ដសមណាស់នឹងទទួលបានកិត្តិនាមជាស្ត្រីកំពូលមួយរូបដ៏មានឥទ្ធិពល ក្នុងការផ្ដល់ស្នាមញញឹម និងជួយស្រោចស្រង់ដល់កុមារកម្ពុជារាប់ពាន់នាក់ ដែលកំពុងតែប្រឈមនឹងស្ថានភាពកំព្រាឪពុកម្ដាយ ការរំលោភបំពាន និងការបង់បោះចោលការសិក្សា ជាដើម។
សូមជម្រាបថា ជារៀងរាល់ថ្ងៃ អាហារចំនួន ៧០០០ចាន ត្រូវបានរៀបចំ និងចែកចាយដោយអង្គការដើម្បីភាពញញឹមនៃកុមារ។ អាហារនេះគឺជាសម្រាប់កុមារតូចៗនៅក្នុងអង្គការបរិភោគមួយពេលតែប៉ុណ្ណោះ។ ពួកគេម្នាក់ៗកំពុងត្រូវការអាហារដែលមានសារធាតុចិញ្ចឹមគ្រប់គ្រាន់ដើម្បីការលូតលាស់។
គួរដឹងបន្ថែមថា អង្គការដើម្បីស្នាមញញឹមនៃកុមារ ឬ For a Child’s Smile ត្រូវបានបង្កើតឡើងដោយលោក គ្រិស្តស្យង់ ដេប៉ាលីយែរ (Christian des Pallieres) និងភរិយារបស់លោកគឺលោកស្រី ម៉ារីហ្វ្រង់ ដេប៉ាលីយែរ (Marie-France des Pallieres ) រយៈពេល ២៨ ឆ្នាំហើយ តាំងពីឆ្នាំ ១៩៩៥ មកម្ល៉េះ។ អ្នកទាំងពីរបានរៀបការនៅឆ្នាំ១៩៦៤ និងកូនទាំងអស់៤នាក់ ហើយបានសម្រេចចិត្តធ្វើដំណើរមកបម្រើការងារនៅប្រទេសកម្ពុជាដំបូងនៅឆ្នាំ១៩៩៣ ជាមួយនឹងអង្គការ Sipar។ ជាអកុសល លោក គ្រិស្តស្យង់ ដេប៉ាលីយែរ បានទទួលមរណភាព ថ្ងៃទី២៤ ខែកញ្ញា ឆ្នាំ២០១៦ ដោយជរាភាព ក្នុងជន្មាយុ ៨២ឆ្នាំ។ ទោះជាស្វាមីបានទទួលអនិច្ចកម្មក្ដី ក៏លោកស្រី ម៉ារីហ្វ្រង់ នៅតែបន្តបេសកកម្មផ្ដល់ស្នាមញញឹមដល់កុមារកម្ពុជារហូតមក៕
