ឌី សូនិត្តា គឺតារាសម្ដែង ពិធីការនី ដ៏មានសមត្ថភាព និងមានប្រជាប្រិយភាពមួយរូបនៅក្នុងរង្វង់សិល្បៈ។ មិនត្រឹមតែមានជាអ្នកសិល្បៈដ៏ជោគជ័យនោះឡើយ ប៉ុន្តែអ្នកនាងក៏ជាអ្នកជំនួញដ៏ជោគជ័យនិងស្ដុកស្ដម្ភមួយរូបផងដែរ។ ថ្វីត្បិតជីវិតបច្ចុប្បន្នរបស់អ្នកម្ដាយកូនមួយរូបនេះមានពន្លឺ និងស្រស់បំព្រងក្ដី ប៉ុន្តែយូរៗម្ដងអ្នកនាងក៏មិនអត់ជួបទុក្ខ និងឆ្លងឧបសគ្គក្នុងជីវិតនោះដែរ ដូចជារឿងរ៉ាវដែលទើបនឹងកើតឡើងថ្មីៗដែលអ្នកនាងត្រូវបានអ្នកជិតខាង គប់ដុំថ្ម និងវិះចូលផ្ទះ រហូតដល់បែកកញ្ចក់ផ្ទះ តែសំណាងល្អ ដែលមិនមានអ្នកណារងរបួស។
ជីវិតរបស់មនុស្សយើងអ្នកណាក៏មានទុក្ខដែរ ហើយមានតែមនុស្សខ្លួនឯងប៉ុណ្ណោះដែលដឹងថាទំហំទុក្ខរបស់ខ្លួនលំបាកយ៉ាងណានោះ ដូចគ្នានឹងអ្នកនាង ឌី សូនិត្តា ដែរ នៅពេលដែលអ្នកនាង បានឃើញកញ្ចក់បែកបាក់មួយនៅលើគំនរសំរាម ស្រាប់តែធ្វើឱ្យអ្នកនាង នឹកស្រណោះខ្លួន ព្រោះតែជីវិតរបស់អ្នកនាង ក៏មិនពេញលេញប្រៀបដូចជាកញ្ចក់បែកបាក់ដែលគេយកទៅចោលលើគំនរសំរាមនោះដែរ។
អ្នកនាងបានរៀបរាប់ថា៖ «ដើរកាត់កញ្ចក់មួយផ្ទាំងដែលបែកជាចំណែកហើយគេយកមកចោលនៅគំនរសំរាម ក្រឡេកឃើញរូបខ្លួនឯងក៏ភ្ញាក់ព្រើត ឃើញកញ្ចក់មួយផ្នែកនៅស្អាតល្អ ចៃដន្យដៃកំពុងកាន់ទូរស័ព្ទស្រាប់ក៏ទាញយកមកថត ។ អ្វីដែលធ្វើឱ្យអារម្មណ៍ប្រែមួយរំពេចទឹកភ្នែកក៏ស្រក់ចុះកាត់ម៉ាស់ដែលកំពុងពាក់ ស្រាប់តែនឹកឃើញរឿងគ្រប់យ៉ាងដែលខ្លួនធ្លាប់ឆ្លងកាត់ នៅពីក្រោយភាពស្រស់ស្អាត ក៏មានភាពឈឺចាប់ នៅពីក្រោយភាពឈឺចាប់ ក៏មានក្តីសង្ឃឹម នៅពីក្រោយក្តីសង្ឃឹមក៏មានភាពរឹងមាំ នៅពីក្រោយភាពរឹងមាំក៏ត្រូវការការតស៊ូ»។
ទោះជាជីវិតជួបនឹងបញ្ហាយ៉ាងណាក៏ដោយ អ្នកម្ដាយរូបនេះនៅតែបន្តឈរយ៉ាងរឹងមាំ មិនព្រមចុះចាញ់នឹងបញ្ហាដែលខ្លួនជួបប្រទះនោះឡើយ។ រឿងមួយដែលអ្នកនាង ឌី សូនិត្តា ផ្ដល់ជាតម្លៃអប់រំសម្រាប់អ្នកដែលបានឆ្លងកាត់ឬអានសំណេររបស់ខ្លួនគឺ៖ «ជីវិតវាពិតជាដូចកញ្ចក់មួយផ្ទាំងនេះ បើអ្នកមិនចេះច្នៃខ្លួនឲមានតម្លៃ អ្នកក៏ស្ថិតនៅទីតាំងនេះ កញ្ចក់មួយបំណែកវាអាចផ្លាស់ប្តូរជីវិតអ្នកបានបើអ្នកចេះច្នៃវាឲមានប្រយោជន៍។ វាសនាមើលមិនឃើញទេ សូមកុំថ្កោលទោសរឺបន្ទាបតម្លៃខ្លួនឯងតាមមាត់អ្នកដទៃ»
មែនទែនទៅ ឌី សូនិត្តា គឺជាមនុស្សស្រីម្នាក់ដែលមានការតស៊ូ អំណត់អត់ធន់ ទោះបីមានឈ្មោះជា Single Mom ក្ដី ប៉ុន្តែអ្នកនាង មិនបណ្ដោយឱ្យជីវិតធ្លាក់ទៅក្នុងជ្រោះព្រោះតែសម្ដីអ្នកដទៃ ឬមជ្ឈដ្ឋានជុំវិញដែរ ដែលនេះគឺជាឧទាហរណ៍មួយយ៉ាងល្អដែលគួរឱ្យយកគំរូតាម៕