នៅថ្ងៃសៅរ៍ ទី១៨ ខែវិច្ឆិកា ឆ្នាំ២០២៣ ក្លិបបាល់ទាត់វិសាខា បានប្រកាសនាំចូលខ្សែប្រយុទ្ធអេស្ប៉ាញ Victor Blasco ដើម្បីចូលរួមជាមួយក្រុមក្នុងរដូវកាល នៃពានរង្វាន់លីគកំពូលកម្ពុជា នៃពានរង្វាន់ Cambodian Premier League 2023-2024។
ខ្សែប្រយុទ្ធអេស្ប៉ាញ Victor Blasco បានប្រកាសចែកផ្លូវជាមួយ ក្លិបបាល់ទាត់អង្គរថាយហ្គឺរ កាលពីថ្ងៃព្រហស្បិ៍ ទី៩ ខែវិច្ឆិកា ឆ្នាំ២០២៣ មុនទីផ្សារដោះដូរកីឡាករ ៥ថ្ងៃ ក្រោយចូលរួមជាមួយក្រុមកាលពីដើមរដូវកាល នៃពានរង្វាន់លីគកំពូលកម្ពុជា។
ខ្សែប្រយុទ្ធ Victor Blasco ជាអតីតកីឡាករ Deportivo y Social VIDA ម្ចាស់ជើងឯក ២សម័យលីគកំពូលហុងឌូរ៉ាស មុនចូលរួមជាមួយព្រះខ័នរាជស្វាយរៀង នៅជុំទី២ នៃពានរង្វាន់ Cambodian Premier League 2022។ កីឡាករវ័យ២៧ឆ្នាំរូបនេះ ជាអតីតយុវជនថ្នាលរបស់ក្រុមអ្នកមានបុណ្យ FC Barcelona ដោយរូបនេះមានដើមកំណើតនៅទីក្រុង Barcelona ប្រទេសអេស្ប៉ាញ តួនាទីជាខ្សែប្រយុទ្ធស្លាបឆ្វេង មានកម្ពស់ ១.៧៨ម៉ែត្រ។
គួរដឹងថា Victor គឺជាមិត្តភក្តិដ៏ជិតស្និតរបស់ Marcus Haber អំឡុងពេលដែលគេប្រកបអាជីពបាល់ទាត់នៅក្របខណ្ឌ Canadian Premier League លីគកំពូលកាណាដា Pacific FC និងនៅព្រះខ័នរាជស្វាយរៀង ក្របខណ្ឌ Cambodian Premier League លីគកំពូលកម្ពុជា។
រំលឹកថា ក្រុមហ៊ុន Cambodian Premier League បានចេញផ្សាយពីកាលបរិច្ឆេទនៃការផ្ទេរកីឡាករជាតិ និងកីឡាករអន្តរជាតិ លើកទី២ (Transfer Window 2) សម្រាប់ តាមប្រព័ន្ធអនឡាញ (FIFA TMS and FIFA CONNECT) ដែលនឹងចាប់ផ្ដើមនៅចុងឆ្នាំនេះ។
ខ្លឹមសារសង្ខេបនៅលើសេចក្តីជូនដំណឹងបញ្ជាក់ថាទីផ្សារដោះដូរកីឡាករលើកទី២ នឹងបើកទ្វារនៅថ្ងៃទី១៤ ខែវិច្ឆិកា ២០២៣ ហើយបិទទៅវិញថ្ងៃទី១១ ខែធ្នូ ២០២៣ ដោយក្នុងនោះក្លិបជាសមាជិកអាចបន្ថែមកីឡាករក្នុងក្រុមខ្លួនបាន៖ កីឡាករជាតិ ៦រូប,កីឡាករអន្តរជាតិ ៣រូប៕