ផ្លូវរត់សម្រាប់កីឡាអត្តពលកម្មកម្រិតស្តង់ដារ១ខ្សែមាន៨ខ្សែបន្ទាត់ នៅក្នុងវិទ្យាស្ថានជាតិអប់រំកាយនិងកីឡា ដែលជាជំនួយរបស់មិត្តជប៉ុន តាមរយៈគម្រោង KISANONE បានសាងសង់រួចរាល់ហើយ នៅដើមខែសីហា ឆ្នាំ២០២១ នេះ។
លោកស្រី ហ៊ូ សិទ្ធិសោភាល័យ នាយិកាវិទ្យាស្ថានជាតិអប់រំកាយនិងកីឡា បានប្រាប់ក្រុមសារព័ត៌មានត្រយង តាមបណ្តាញសង្គម Telegram ថា៖«ផ្លូវរត់អត្តពលកម្មនេះនៅមិនទាន់អាចប្រើប្រាស់បាននៅឡើយទេ រង់ចាំការចុះមកពិនិត្យដោយស្ថានទូតជប៉ុនសិន»។
លោកស្រីបន្តថាការសាងសង់ផ្លូវរត់អត្តពលកម្ម ចំនួន ៨ ខ្សែបន្ទាត់ ក្រោមជំនួយឥតសំណងរបស់រដ្ឋាភិបាលជប៉ុន ប្រជាជនជប៉ុន តាមរយៈគម្រោង KISANONE ។ភាពជោគជ័យនៃការទទួលបាននេះក៏ដោយសារការទទួលបានការគាំទ្រយ៉ាងខ្លាំងពីថ្នាក់ដឹកនាំក្រសួងអប់រំយុវជននិងកីឡា ពីអង្គការក្រៅរដ្ឋាភិបាលបេះដូងមាស និង ស្ថានទូតជប៉ុន ប្រចាំនៅកម្ពុជា៕
រូបថត៖Naoki Nishiyama