សិល្បៈជាតិ៖ ជាថ្មីម្ដងទៀត ឧកញ៉ា ទ្រី ដាណា បានធ្វើឱ្យមជ្ឈដ្ឋានមហាជនមានការភ្ញាក់ផ្អើលយ៉ាងខ្លាំងក្រោយអ្នកនាង បានប្រកាសបើកទ្វារផ្ទះស្វាគមន៍សមាជិកថ្មី ដែលត្រូវជាអនាគតស្វាមីខ្លួនកាលពីរសៀលថ្ងៃទី២៩ ខែវិច្ឆិកា ឆ្នាំ២០២៣។
យោងតាមរយៈការបង្ហោះរបស់អ្នកជំនួញជោគជ័យវ័យខ្ទង់៣០ប្លាយរូបនេះ បានបង្ហាញនៅលើបណ្ដាញសង្គមហ្វេសប៊ុក អ្នកនាងបានបង្ហោះរូបភាពទទួលស្វាគមន៍គូដណ្ដឹងចូលមករស់នៅក្នុងភូមិគ្រឹះរបស់អ្នកនាងដោយមានភ្ជាប់សំំណេរសង្ខេបខ្លីថា៖
«ស្វាគមន៍សមាជិកថ្មី បងសាល។ ថ្ងៃនេះជាថ្ងៃល្អដែលបងសាលចូលមកនៅត្រៀមសម្រាប់ពិធីមង្គលការពួកយើង ថ្ងៃទី៣ ខាងមុខនេះ។» ការលើកឡើងយ៉ាងខ្លីរបស់អ្នកនាងនេះ គឺធ្វើឡើងនៅក្រោយពេលដែលអ្នកនាងបានបង្ហោះវីដេអូមួយមានប្រវែង៧នាទីនិង៣៣វិនាទី។
យោងតាមវីដេអូនោះគេឃើញគូដណ្ដឹងអ្នកនាង ទ្រី ដាណា គឺលោក រស់ រាជ្ជសាល បានយួរវ៉ាលីចំនួនពីរចុះពីលើឡាន ហើយមានបុរសពីរនាក់ដែលទំនងជាអង្គរក្សឬបុគ្គលិកបម្រើការងារក្នុងភូមិគ្រឹះឧកញ៉ាសម្បូរទ្រព្យរូបនេះបានឈរកាន់ក្រណាត់ក្រហមរង់ចាំឃាត់ដំណើរ បុរសសង្ហាដែលត្រូវជាគូដណ្ដឹងអ្នកនាង ទ្រី ដាណា លុះត្រាតែមានការឆ្លើយសំនួរឬដោះដូរដោយអាំងប៉ាវទើបអាចឆ្លងកាត់បាន។ ហេតុដូច្នេះហើយបុរសរូបសង្ហារបស់យើងត្រូវឆ្លងកាត់ឧបសគ្គម្ដងមួយដំណាក់ម្ដងមួយដំណាក់ទម្រាំអាចឡើងដល់បន្ទប់ទទួលភ្ញៀវជាន់ទីពីរ។ តាមសម្ដីអ្នកនាង ទ្រី ដាណា គូដណ្ដឹងអ្នកនាងនៅមិនទាន់អាចរួមបន្ទប់ជាមួយអ្នកនាងបាននៅឡើយទេ គឺត្រូវរង់ចាំលុះដល់ថ្ងៃទី៣ ដែលជារៀបការរបស់អ្នកនាងទាំងពីរសិន។
នៅពេលឮសម្ដីលោក រាជ្ជសាលហៅអ្នកនាង ទ្រី ដាណា ប្រពន្ធពេញៗមាត់ ថែមទាំងម្ចាស់ខ្លួនប្រកាសដោយរីករាយក្នុងវីដេអូនោះថា «ថ្ងៃនេះបានប្រពន្ធហើយ» ធ្វើឱ្យអ្នកដែលបានទស្សនាវីដេអូគ្រប់គ្នា ខ្លះអៀនរមួល ខ្លះទៀតរំភើបរហូតសើចបិទមាត់លែងជិតជំនួសសមីខ្លួនទៀតផង។
កន្លងមកអ្នកនាង ទ្រី ដាណា ត្រូវបានមហាជនទទួលស្គល់ថាពូកែខាងធ្វើជំនួញ និងមានដុងសិល្បៈពេញខ្លួន អ្នកនាងមិនត្រឹមតែអាចច្រៀងបានយ៉ាងពីរោះនោះទេ ថែមទាំងអាចសម្ដែងបានល្អមិនចាញ់អ្នកសម្ដែងអាជីពនោះឡើយ។ ប៉ុន្តែបើនិយាយដល់រឿងស្នេហា អ្នកនាងហាក់ដូចរាងអភ័ព្វបន្តិចព្រោះជួបតែស្នេហាបរាជ័យ ដូច្នេះអ្នកគាំទ្រអ្នកនាងភាគច្រើន នៅពេលឃើញពីទំនាក់ទំនងស្នេហាបើកចំហររវាងអ្នកនាងនិងកំលោះសង្ហា ពួកគេបានប្រាថ្នានឹងនាំគ្នាខមមិន សូមឱ្យបុរសដែលកំពុងក្ដោបបេះដូងអ្នកនាងមានចិត្តស្មោះត្រង់ ស្រលាញ់ ថ្នាក់ថ្នមអ្នកនាង កុំឱ្យជួបរឿងសោះហ្មងដូចគ្រាកន្លងទៀត។
ត្បិតនៅមានអ្នកសោកស្ដាយ ដែលស្វាមីរបស់អ្នកនាង ទ្រី ដាណា មិនមែនជា BA ជំនិត ដែលធ្លាប់ត្រូវបានហ្វេនៗផ្គូរផ្គងជាមួយគ្នាដោយមើលឃើញពីភាពស្និទ្ធស្នាលនិងស័ក្តិសមគ្នាក្ដី ប៉ុន្តែអ្នកដែលស្រលាញ់និងមានបំណងល្អជាមួយនឹងអ្នកនាង ទ្រី ដាណា សង្ឃឹមថាគូគាប់របស់អ្នកនាងម្ដងនេះគឺជាគូពិត ដែលនឹងអាចកាន់ដៃគ្នារួមសុខរួមទុក្ខរហូតចាស់ព្រឹទ្ធចាស់ព្រេងរៀងខ្លួន៕
