ទេសចរណ៍៖ ថ្មីៗនេះ មានការចាប់អារម្មណ៍ខ្លាំងនៅពេលដែលប្ដីប្រពន្ធ Youtuber ជនជាតិអូស្ត្រាលីបានចេញមកទម្លាយនូវរឿងរ៉ាវដ៏គួរឱ្យចាប់អារម្មណ៍មួយពាក់ព័ន្ធនឹងការមកដើរលេងកម្សាន្តនៅកម្ពុជា។ ដំបូងឡើយ ប្ដីប្រពន្ធមួយគូនេះគ្រោងមកលេងត្រឹម៣ថ្ងៃប៉ុណ្ណោះ តែបែរជាជ្រុលខ្លួននៅលេងស្រុកខ្មែរ រហូតដល់ទៅ២សប្ដាហ៍។
នៅក្នុងវីដេអូរបស់អ្នកទាំងពីរនេះ ពួកគេបានដើរលេងនៅផ្សារអ៊ីអន១ និង២ ហើយនៅពេលដែលពួកគេរ៉េកាមេរ៉ាទៅចំប្រជាពលរដ្ឋខ្មែរ តែងតែទទួលបានស្នាមញញឹមជាប់ជានិច្ច ចំណែកបុគ្គលិកហាងវិញ ទោះមិនទិញ ដើរកាត់ក្ដីក៏ទទួលបានស្នាមញញឹមរាក់ទាក់ដែរ។ អ្នកទាំងពីរដើរទៅដល់ទីណាតែងតែឮពាក្យថា Welcome to Cambodia ពីប្រជាពលរដ្ឋខ្មែរ ហើយនៅពេលបានជួបជាមួយនឹងកូនសិស្សសាលា ពួកគេបាននិយាយស្វាគមន៍ថា Hello ទៅកាន់ពួកគាត់ជាប់រហូត ថែមទាំងសួរពួកគាត់ទៀតថា ពួកគាត់មកពីណា ហើយបញ្ចប់ដោយពាក្យថា Thanks for Visiting Cambodia និង ពាក្យ Welcome ជាដរាប។
ដោយសារតែមូលហេតុនេះហើយ ទើបធ្វើឱ្យប្ដីប្រពន្ធអូស្ត្រាលីលង់ស្នេហ៍កម្ពុជាហើយ ជ្រុលខ្លួនដើរលេងហួសច្រើនថ្ងៃ។ ពួកគាត់បានលើកឡើងថា មិនដែលមានស្រុកណាមានបុគ្គលិកនៅផ្សារទំនើប និងប្រណិត ចេះញញឹមរាក់ទាក់ និងនិយាយលេងជាមួយពួកគាត់នោះទេ មានតែប្រទេសកម្ពុជានេះឯង។ ពួកគាត់បានបន្តទៀតថា ប្រទេសផ្សេងៗនៅតាមផ្សារទំនើប ប្រភេទ Luxury គឺ គេមិនងាយនិយាយរក ឬញញឹមដាក់មុននោះទេ។
ក្រៅពីការរៀបរាប់បទពិសោធន៍ដែលខ្លួនបានជួបប្រទះនៅកម្ពុជាហើយនោះពួកគេក៏បានទិញឥវ៉ាន់ប្រេនៗ ដោយគាត់ថា ឥវ៉ាន់ប្រេនៗម៉ាកល្បីៗដូច Puma Nike Adidas…និង មុខម្ហូបនៅតាមហាងល្បីៗនៅជុំវិញពិភពលោកនៅស្រុកខ្មែរដូចជា Starbucks, KFC, Texas, Burger King …មានតម្លៃថោកជាងនៅថៃ និង អូស្រ្ដាលី ហើយពួកគេក៏បានទិញសម្លៀកបំពាក់ផងដែរ។ នៅស្រុកគេផ្សេងៗ ដោយមានថៃក្នុងនោះដែរ ពួកគាត់ថា ចូលផ្សារទំន ដើរមើលឥវ៉ាន់ គេមិនសួរនាំនោះទេ លុះតែគាត់សួររកមុន បាននិយាយរកគាត់ ហើយមិនចេះញញឹមនោះទេ តែនៅស្រុកខ្មែរ ដើរកាត់ញញឹមដាក់មុន សួរមួយម៉ាត់ តែបកស្រាយអំពីឥវ៉ាន់អស់អាលីងម៉ង ។
ពួកគាត់បាន Recommend អ្នកចង់ shopping នៅហាងល្បីៗ សាកមកស្រុកខ្មែរម្តងទាំងតម្លៃថោក និង សេវ៉ាកម្មល្អ ថែមទាំងទទួលបានស្នាមញញឹមជាប់ជានិច្ចផងដែរ៕