សហព័ន្ធខ្មែរកីឡាហែលទឹក នៅព្រឹកថ្ងៃសុក្រ ទី៦ ខែសីហា ឆ្នាំ២០២១ នេះបានប្រកាសគាំទ្រដល់កូនកំព្រាខ្មែរមួយរូបដែលត្រូវយកទៅចិញ្ចឹមនៅសហរដ្ឋអាមេរិកតាំងពីតូច មានឈ្មោះចូលរួមប្រកួតក្នុងព្រឹត្តិការណ៍កីឡាអូឡាំពិក Olympic Games 2020 កំពុងរៀបចំនៅប្រទេសជប៉ុន លើវិញ្ញាសាកីឡាលោតទឹក។ កីឡាកររូបនោះមានឈ្មោះ Jordan Windle។
សហព័ន្ធបានបញ្ជាក់ថា៖«សូមចូលរួមគាំទ្រកីឡាករលោតទឹកជម្រើសជាតិ សហរដ្ឋអាមេរិក (ជាជនខ្មែរសញ្ជាតិអាមេរិក) ដែលត្រូវចាប់ផ្តើមប្រកួត នៅថ្ងៃសុក្រ ទី០៦ ខែសីហា ឆ្នាំ២០២១នេះ វេលាម៉ោង ១៣:០០ រសៀល ម៉ោងនៅកម្ពុជា ទីកន្លែងប្រកួតស្ថិតនៅទីក្រុងតូក្យូ ប្រទេសជប៉ុន នៃមណ្ឌលហែលទឹកTokyo Aquatics Center (Tokyo 2020)។ សម្រាប់វិញ្ញាសារបស់ កីឡាករលោតទឹកJordan Windle ត្រូវប្រកួតគឺបុរសឯកត្តជន ១០ម ឆ្នាន់រឹង»។
សហព័ន្ធខ្មែរកីឡាហែលទឹក កោតសរសើ នូវសមត្ថភាព និងការខិតខំប្រឹងរបស់កីឡាករ Jordan Windle និងសូមជូនពរអោយរូបគេទទួលបានជោគជ័យ និងលទ្ធផលល្អក្នុងការប្រកួតព្រឹត្តិការណ៍ កីឡាអូឡាំពិក រដូវក្ដៅ ក្នុង ទីក្រុងតូក្យូ ប្រទេសជប៉ុន៕