ភ្នំពេញ ៖ ចាប់ផ្តើមនៅឆ្នាំ២០១៦ យុវនិស្សិតពេទ្យម្នាក់ បានណែនាំនូវម៉ាស៊ីនបូមទឹកដោះ ដល់អតិថិជនជាម្តាយជាច្រើនពាន់នាក់នៅប្រទេសកម្ពុជាតាមរយះហ្វេសប៊ុកផេក 1990 Online Clinic។ មកដល់សព្វថ្ងៃ លោកវេជ្ជបណ្ឌិតបានរៀបចំសេវាប្រឹក្សាផ្នែកទឹកដោះម្តាយ ដែលអាចជួយស្ត្រីដែលកំពុងបំបៅដោះកូន និងស្ត្រីដែលកំពុងបូមទឹកដោះ នូវដំណោះស្រាយផ្សេងៗដែលត្រឹមត្រូវ ដែលអាចធានាឱ្យស្ត្រីដែលជាអតិថិជនអាចមានលទ្ធភាពផលិតទឹកដោះឱ្យកូនបៅបានរយៈពេល១ឆ្នាំពេញ។
លោកវេជ្ជបណ្ឌិត យី រ៉ាស៊ី បានលើកឡើងថា ស្ត្រីខ្មែរភាគច្រើនបច្ចុប្បន្ន ជាមាតាដែលរវល់ការងារ និងភាគច្រើនជួបបញ្ហាកង្វះទឹកដោះឱ្យកូនបៅ មិនគ្រប់គ្រាន់។ ភាគច្រើនការបំបៅលាយម្ស៉ៅដោះគោតាំងពីថ្ងៃសម្រាល ហើយចុងក្រោយបោះបង់ការចិញ្ចឹមកូនដោយទឹកដោះម្តាយ ដោយសារទឹកដោះអត់ចេញ បូមទឹកដោះបានតិច ម្តាយបាក់ទឹកចិត្ត មិនមានអ្នកប្រឹក្សាដំណោះស្រាយត្រឹមត្រូវ។ ម្តាយភាគតិចណាស់ ដែលអាចចិញ្ចឹមកូនដោយទឹកដោះម្តាយបានរយះពេល៦ខែ នៃជីវិតរបស់បុត្ររបស់ពួកគេ។ តាមស្ថិតិរបស់ Cambodia Demographic and Health Survey ដែលបានចុះផ្សាយលើគេហទំព័ររបស់ UNICEF បានបញ្ជាក់ថានៅឆ្នាំ២០២១ ចំនួនស្ត្រីខ្មែរដែលបំបៅដោះកូនបានដល់អាយុ៥ខែ មានត្រឹមតែ 51%ប៉ុណ្ណោះ។
អស់រយៈពេល៦ឆ្នាំនេះ លោកវេជ្ជបណ្ឌិតបានបណ្តុះបណ្តាលភ្នាក់ងារប្រឹក្សាផ្នែកទឹកដោះម្តាយ និងបានជួយស្ត្រីជាមាតាជាច្រើននាក់អោយអាចចិញ្ចឹមកូនដោយទឹកដោះម្តាយ។ អតិថិជនដែលជាមាតា បើទោះរវល់ការងារក្រោយពេលចប់មាតុភាព ៣ខែ ក៏អាចបន្តចិញ្ចឹមកូនដោយទឹកដោះម្តាយបន្តទៀតបាន។ អតិថិជនរបស់លោកវេជ្ជបណ្ឌិតភាគច្រើនទៀត សុទ្ធតែជាមាតាដែលមានបញ្ហាកង្វះទឹកដោះក្រោយសម្រាល តែក្រោយបានទទួលសេវាប្រឹក្សាផ្នែកទឹកដោះម្តាយ ពួកគេក៏បានការប្រឹក្សាយ៉ាងដិតដល់ជារៀងរាល់ថ្ងៃ រាល់អាទិត្យ និងរាល់ខែ។
ជាលទ្ធផល ពួកគេអាចមានទឹកដោះគ្រប់គ្រាន់អោយកូនមឹមបានគ្រប់ៗគ្នា ព្រមទាំងមានទឹកដោះស្តុកបង្កកជាច្រើន ដែលអាចអោយពួកគេទៅធ្វើការចាកចេញពីកូនបាន តែកូននៅតែមានទឹកដោះម្តាយមឹមគ្រប់គ្រាន់ជារៀងរាល់ថ្ងៃ។ មតិរបស់អតិថិជនលោកវេជ្ជបណ្ឌិតម្នាក់បានលើកឡើងថា កូនគាត់ពីរនាក់ដំបូងដែលអត់បានមឹមទឹកដោះម្តាយ សុខភាពមិនល្អទេ ឆាប់ឈឺ ងាយឆ្លងជំងឺ តែកូនទី៣ដែលបានមឹមទឹកដោះម្តាយគ្រប់គ្រាន់ គឺសុខភាពល្អណាស់ មិនងាយឈឺធ្ងន់ទេ ត្រឹមក្តៅខ្លួន ឬផ្តាសសាយតិចតួច តែអាចជាវិញបានដោយមិនបាច់យកទៅសម្រាកនៅមន្ទីរពេទ្យទេ។
លោកវេជ្ជបណ្ឌិតបានប្រាប់ក្រុមការងាររបស់ត្រយ៉ងថា ចក្ខុវិស័យរបស់ស្ថាប័នរបស់លោក គឺចង់ឃើញស្ត្រីខ្មែរគ្រប់រូបអាចចិញ្ចឹមកូនដោយទឹកដោះម្តាយបានគ្រប់ៗគ្នា បើទោះក្នុងលក្ខខណ្ឌលំបាកណាមួយក៏ដោយ ក៏ក្រុមការងារអ្នកប្រឹក្សាផ្នែកទឹកដោះម្តាយអាចជួយមាតាគ្រប់រូបបាន។ សម្រាប់មាតាត្រៀមសម្រាលទាំងអស់ លោកវេជ្ជបណ្ឌិតសូមណែនាំអោយពួកគាត់គិតគូរបន្ថែមពីការត្រៀមខ្លួនក្នុងការចិញ្ចឹមកូនដោយទឹកដោះម្តាយ ពីព្រោះវាពិតជាមានការលំបាកខ្លាំងណាស់សម្រាប់ស្ត្រីក្នុងការផលិតទឹកដោះក្រោយសម្រាល។ ការត្រៀមខ្លួនទុកជាមុន និងការមករកដំណោះស្រាយផ្នែកទឹកដោះនៅសេវាប្រឹក្សាផ្នែកទឹកដោះគឺជាដំណោះស្រាយតែមួយគត់ដែលធានាជូនមាតាគ្រប់រូបអោយអាចចិញ្ចឹមកូនដោយទឹកដោះម្តាយបាន៕
